މިދިޔަ ހުކުރު ދުވަހުގެ ރޭ އައްޑޫ ސިޓީގައި ދެ ގްރޫޕެއްގެ ދެމެދުގައި ހިންގި މާރާމާރީއެއްގައި ހައްޔަރު ކުރި 4 މީހުން ޝަރީއަތް ނިމެންދެން ބަންދު ކޮށްފިއެވެ.
ފުލުހުން ބުނީ އެމީހުންގެ ބަންދާއި މެދު ގޮތެއް ނިންމަން ހިތަދޫ މެޖިސްޓްރޭޓް ކޯޓަށް ގެންދިއުމުން, އެ ކޯޓުން މައްސަލައިގެ ޝަރީއަތް ނިމެންދެން ބަންދުގައި ބެހެއްޓުމަށް އަމުރު ކޮށްފައިވާ ކަމަށެވެ.
މި މާރާމާރީ އާއި ގުޅިގެން ހައްޔަރު ކޮށްފައިވަނީ 18 އަހަރާއި 19 އަހަރާއި 20 އަހަރާއި 23 އަހަރުގެ ދިވެހި ފިރިހެނުންނެވެ.
ހުކުރު ދުވަހު ހިނގާ ދިޔަ މާރާމާރީގައި, އުމުރުން 30 އަހަރުގެ ދިވެހި ފިރިހެނަކަށް ތޫނު އެއްޗަކުން ހަމަލާދީފައިވެއެވެ. ޒަހަމްވި މީހާ އަށް އައްޑޫ އިކުއިޓޯރިއަލް ހޮސްޕިޓަލްގައި ފަރުވާދެމުން އަންނައިރު އޭނާގެ ހާލު ސީރިއަސް އެވެ.
އިއްޔެ ވެސް އައްޑޫސިޓީގައި އިތުރު މާރާމާރީއެއްގ ވަނީ ހިންގާފައެވެ.
މި މާރާމާރީ ހިނގާފައިވަނީ ގެޔަކަށް ވަދެ , 20 އަހަރުގެ ފިރިހެނެއްގެ ގަޔަށް ވަޅި ހަރައިގެންނެވެ. ދުވަސްކޮޅަކީ ވެރިކަން ކުރާ މާލޭގައިވެސް އަންނަނީ މާރާމާރީތައް ގިނަ ދުވސްކޮޅެއްކަން ފާހަގަ ކޮށްލަން ޖެހެއެވެ.
މި މާރާމާރީތަކުގާއި ސީރީއަސް އަނިޔާއެއް މީހަކަށް ނުލިބުނު ނަމަވެސް ތިން މީހަކު ވަނީ އެ މައްސަލަތަކާ ގުޅިގެން ހައްޔަރުކޮށްފަ އެވެ.
ފުލުހުން ވަނީ މާލެ އާއި އައްޑޫގައި ހިނގަމުންދާ ގޭންގު މާރާމާރީތަކާ ގުޅިގެން ސަލާމަތާއި ރައްކާތެރިކަން ބެލެހެއްޓުމުގެ ހާއްސަ މަސައްކަތެއް ފަށާފައި އެވެ.
Advertisement
This content is created and paid for by advertisers and does not involve Voice Journalists
