ފަހި ދިރިއުޅުން ކޯޕަރޭޝަން (އެފްޑީސީ) ގެ ރަސްމީ ދަތުރުތަކަށް ހޭދަވާ ޚަރަދުތައް އެ ދަތުރެއް ނިމޭތާ 15 ދުވަހުގެ ތެރޭގައި ހާމަކުރަން ނިންމައި އެ ކުންފުނިން އެކަން އިއުލާނުކޮށްފިއެވެ.
އެ ކުންފުނިން މިއަދު ކުރި ޓުވީޓެއްގައި ބުނެފައިވަނީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިސްނެންގެވުމާއި އެއްގޮތަށް ކޮންމެ ދަތުރެއް ނިންމާތާ 15 ދުވަހުގެ ތެރޭގައި އެފްޑީސީން ކުރާ ރަސްމީ ދަތުރުފަތުރުގެ ޚަރަދުތައްވެސް ހާމަކުރާނެ ކަމަށެވެ.
މިއާއެކު އެފްޑީސީވެގެން މިދިޔައީ ރައީސް ޑރ މުއިއްޒު ދެއްކެވި ނަމޫނާއާ އެއްގޮތަށް އަމަލުކުރަން ނިންމި ސަރުކާރުގެ ފުރަތަމަ ކުންފުންޏަށެވެ.
ރައީސް މުޢިއްޒު ކުރައްވާ ރަސްމީ ދަތުރުފުޅުތަކަށް ދައުލަތުގެ ބަޖެޓުން ހިނގާ ޚަރަދުތަކުގެ މައުލޫމާތު ކޮންމެ ދަތުރުފުޅެއް ނިމޭތާ 15 ދުވަހުގެ ތެރޭގައި ހާމަކުރައްވާ ގޮތަށް ވަނީ ނިންމަވައިފައެވެ.
ފަހި ދިރިއުޅުން ކޯޕަރޭޝަނަކީ ރައްޔިތުންނަށް އަތްފޯރާ ފަށުގައި ބޯހިޔާވަހިކަން ފޯރުކޮށްދިނުމުގެ ސިޔާސަތުގެ ދަށުން މުޅި ރާއްޖެއަށް އަމާޒުކޮށް ބޯހިޔާވަހިކަން ފޯރުކޮށްދިނުމުގެ މަޝްރޫއުތައް އެއްފުރާޅެއްގެދަށުން ކުރިއަށް ގެންދިއުމުގެ މަގުސަދުގައި 25 މާރިޗު 2019 ގައި އުފައްދާފައިވާ ކުންފުންޏެކެވެ.
Advertisement
This content is created and paid for by advertisers and does not involve Voice Journalists
