ވައްކަމުގެ މައްސަލަތަކާއި މަކަރާއިހީލަތުން ފައިސާއާއި މުދާ ހޯދުމުގެ މައްސަލަތަކުން ތ. ވޭމަންޑޫ ވިޔަފާރިވެރިންނަށް މައުލޫމާތުދިނުމުގެ ޕްރޮގްރާމެއް އެރަށު ޕޮލިސް ސްޓޭޝަނުން ކުރިޔަށް ގެންގޮސްފިއެވެ.
މިކަމާއި ބެހޭގޮތުން ދިވެހި ފުލުހުންގެ ހިދުމަތުން ނެރުނު ނޫސް ބަޔާނެއްގައި ބުނީ މި ޕްރޮގްރާމް ކުރިއަށް ގެންގޮސްފައި ވަނީ މި ޑިސެމްބަރު މަހުގެ 3 އަދި 4 ވަނަ ދުވަހު ކަމަށެވެ.
މި ޕްރޮގްރާމްގައި އެ ބާވަތުގެ މައްސަލަތައް މަދުކުރުމަށްޓަކައި، ވިޔަފާރިތަކަށް ޒިޔާރަތްކޮށް ފުލުހުން ވަނީ މައުލޫމާތުދީފައިއެވެ. އެގޮތުން، ވައްކަމުގެ މައްސަލަތަކުން ރައްކާތެރިވުމަށްޓަކައި އެޅެންހުރި ފިޔަވަޅުތައް ބުނެދީ އަދި މަކަރާއި ހީލަތްހަދައި ފައިސާ ޓްރާންސްފަރ ކުރުމަށް ބުނާ މައްސަލަތަކުގައި އަމަލުކުރާނެ ރައްކާތެރި ގޮތްތައް އެ ފަރާތް ތަަކަށް ވަނީ ބުނެދީފައެވެ.
މި ޕްރޮގްރާމްގެ ތެރެއިން އެ ރަށުގައި ހިންގަމުންދާ ފިހާރަތަކާއި ސައިހޮޓާ އަދި ރެސްޓޯރަންޓުތަކަށް ޒިޔާރަތްކޮށް އެފަރާތް ތަކަށް މައުލޫމާތު ހިއްސާ ކޮށްފައިވާ ކަމަށް ވެސް ފުލުހުންގެ ހިދުމަތުން ނެރުނު ނޫސް ބަޔާނުގައި ވެއެވެ.
އަދި މިފަދަ މައްސަލަތައް ފުލުހުންނަށް ރިޕޯޓުކުރުމަށް ގުޅާނެ ނަމްބަރުތަކާއި، ބެންކަށް މިފަދަ މައުލޫމާތުތައް ހިއްސާކުރެވޭނެ ނަމްބަރު ހިއްސާކޮށް،ފިހާރަތަކުގައި ބޭނުންކުރާ މޮބައިލް ފޯނުގެ މޮޑެލް އާއި ސިމް ނަމްބަރާއި އައިއެމްއީ ނަމްބަރު ނަގައި އެ މައުލޫމާތު ފުލުހުން ވަނީ މި ޕްރޮގްރާމް ގެ ތެރެއިން ރައްކާކޮށްފައެވެ.
Advertisement
This content is created and paid for by advertisers and does not involve Voice Journalists
