ދިވެހިރާއްޖޭގެ މަސްވެރިކަމުގެ ދާއިރާ "ފުނޑިގެން" ގޮސްފައިވަނީ ސިޔާސީ ބޭނުމަށް، މަސްވެރިކަން ކުރަމުން އައި ޒުވާނުންނަށް ފެނަކައިން ވަޒީފާދިނުމުން ކަމަށް މަހިބަދޫ ދާއިރާގެ މެންބަރު އަހުމަދު ޠާރިގު ވިދާޅުވެއްޖެއެވެ. 

ސިޔާސީ ނޫން ވަޒީފާތަކުން އާންމު ވަކި ނުކުރައްވާނެ ކަމަށް ވިދާޅުވެ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ރިޔާސީ ކެމްޕޭނުގައި ވެވަޑައިގެންނެވި ވައުދުފުޅާއި ޚިލާފަށް ފެނަކަ ކޯޕަރޭޝަނުން މުވައްޒަފުން ވަކިކުރަމުން ގެންދާ ކަމަށް ބުނެ މަޖިލީހަށް ހުށައެޅި ކުއްލި މައްސަލައަށް ވާހަކަދައްކަވަމުން ތާރިގު ވިދާޅުވީ ފެނަކައިން ވަކި ކޮށްފައިވަނީ، ކޮންޓްރެކްޓް އުސޫލުން އިންޖީނުގެ އެޅުން ފަދަ ކަންކަން ކުރަން ނަގާފައި ތިބި މުވައްޒަފުން ތަކެއް ކަމަށެވެ. އަދި އެ މުވައްޒަފުންގެ ކޮންޓްރެކްޓްގެ މުއްދަތު ހަމަ ވުމުން އެ މުވައްޒަފުން ވަޒީފާއިން ވަކިވާނެ ކަމަށް ވެސް އޭނާ ވިދާޅުވި އެވެ. 

ޠާރިގު އިތުރަށް ވިދާޅުވީ ދިވެހިރާއްޖޭގެ ލޭ ނާރު ކަމުގައިވާ މަސްވެރިކަން ފުނޑިގެން ދިޔައީވެސް، ކުޑަ މުސާރައެއް ދިނުމަށްފަހު ފެނަކަށް ޒުވާނުން ނަގާފައި ބެއިތިއްބުމުގެ ސަބަބުން ކަމަށެވެ. އޭގެ ސަބަބުން މުޅި އިގްތިސާދު ވެސް ފުނޑިގެން ގޮސްފައިވާ ކަމަށް އޭނާ ވިދާޅުވި އެވެ. 

މިއާއެކު ޠާރިގު ވިދާޅުވީ، ކަންނެލި މަސްވެރިކަން ކޮށްގެން ޒުވާނުންނަށް ބޮޑު މުސާރަ ލިބެން އޮއްވައި، ފެނަކައިން ވަޒީފާ ދިނުމަށްފަހު، އެ ޒުވާނުން ގޭގައި ކުޅިވަރު ކުޅެން ބައިތިއްބާ، ކުރީ ސަރުކާރުން ވަނީ ޒުވާނުން ކަންނެތް ބަޔަކަށް ހަދާފައި ކަމަށެވެ. 

ޠާރިގު މިހެން ވިދާޅުވެފައި ވާއިރު، ދައުލަތުގެ ޔޫޓިލިޓީ ކުންފުންޏެއް ކަމަށްވާ ފެނަކަ ކޯޕަރޭޝަނުގެ ދަރަނި 4 ބިލިއަން ރުފިޔާއަށްވުރެ މައްޗަށް އަރާފައިވާއިރު، އެކުންފުނިން ފައިސާ ދޭންޖެހި ނުދީ ހުރި އަމިއްލަ ވިޔަފާރިތަކުގެ އަދަދު 1،149 އަަށް އަރާކަމުގަ އައު ސަރުކާރުން ވަނީ ހާމަކޮށްފައެވެ. 

އަދި ފެނަކައިގެ ދަރަނީގެ ހާލަތު އިންތިހާއަށް ގޯސްކޮށް އޮތްއިރު އެކުންފުނިން ވަނީ ގިނަ އަދަދެއްގެ އައު ވަޒީފާ އުފައްދާފައިވާ ކަމަށާ، އެގޮތުން 2018 ވަނަ އަހަރުގެ ނިޔަލަށް އެ ކުންފުނީގައި 2756 މުވައްޒަފުން ތިބިއިރު 2023 ވަނަ އަހަރުގެ މިހާތަނަށް އެ ކުންފުނީގައި 8126 މުވައްޒަފުން ތިބިކަން އައު ސަރުކާރުން ވަނީ ބުނެފައެވެ.