އިންޑިޔާގެ ދެކުނުގެ ސަރަހައްދުތަކަށް އައި ތޫފާން މިޗިގަން ގައި އެސަރަހައްދަށް ބޯކޮށް ވާރޭ ވެހި ފެންބޮޑުވުމެގެ ސަބަބުން ބަޔަކު މަރުވެއްޖެއެވެ.
އިންޑިޔާގެ ދެކުނުގެ އަންދަރް ޕްރަދޭޝް އަށްވެސް މި ތޫފާނުގެ އަސަރު ކޮންމެވެސް ވަރަކަށް ކޮށްފައިވެއެވެ. ނަމަވެސް ތޫފާނުގައި އެންމެ ބޮޑަށް އަސަރުކޮށްފައިވަނީ ތަމިލް ނާޑޫގެ ޗެންނާއީ އަށެވެ.
ތޫފާން މިޗިގަން އެރުމުގެ ސަބަބުން ކުރި ވިއްސާރައިގައި ފެންބޮޑުވެގެން 4 މީހަކު ވަނީ މަރުވެފައި ކަމަށް އަލްޖަަޒީރާގައި ވަނީ ބުނެފައެވެ.
އަލްޖަޒީރާގައި ބުނެފައިވަނީ ވިއްސާރައިގެ ސަބަބުން ފެންބޮޑުވެ އިންޑިޔާގެ އެންމެ ބާރުބޮޑު އެއަރޕޯޓަށްވެސް ވަނީ ފެންވަދެފައި ކަމަށެވެ. އަދި އެކަމުގެ ސަބަބުން އެއެއަރޕޯޓް ބަންދުކުރަން ޖެހިފައިވާ ކަމަށާއި، ގިނަ ފެކްޓްރީ ތަކެއްވެސް ބަންދު ކުރަން ޖެހިފައިވާ ކަަމަށް އަލްޖަޒީރާގައި ބުނެފައިވެއެވެ.
ޗެންނާއީގެ ގިނަ ސަރަހައްދުތަކެއްގައި ކަކޫތާ ފެނަށް ފެންބޮޑުވެފައިވާ ކަމަށާއި، ކާރުތަކާއި އެހެނިހެން ވެހިކަލްތަކަށްވެސް ފެން ބޮޑުވުމުގެ ސަބަބުން ވަނީ ގެއްލުންތަކެއް ލިބިފައެވެ.
ތުފާނުގެ ސަބަބުން ތަމިލް ނާޑޫ އާއި އަންދަރް ޕްރަދޭޝްގެ މޫސުމާއި ބެހޭ އިދާރާއިން ވަނީ އެންމެ މަތީގެ ދަރަޖައިގެ އެލާޓް ނެރެފައެވެ.
ފެންބޮޑުވުމުގެ ސަބަބުން ގިނަ ބަޔަކު ހާލުގައި ޖެހިފައިވާއިރު، ގިނަ ޢަދަދެއްގެ ބަޔަކު ރައްކާތެރި ސަރަހައްދުތަކަށް ވަނީ ބަދަލުކޮށްފައެވެ.
ވިއްސާރައިގެ ސަބަބުން ފެންބޮޑުވެފައިވާތީ ޓަމިލް ނާޑޫގެ 4 ޑިސްޓްރިކެއްގެ ސްކޫލްތަކާއި ކޮލެްޖްތައް ވަނީ ސަރުކާރުން ވަކި އެއްޗެއް އަންގަންދެން ބަންދު ކޮށްފައެވެ.
Advertisement
This content is created and paid for by advertisers and does not involve Voice Journalists
