ރައްޔިތުންނަށް ތަކުލީފަކަށް ވާގޮތަށް މާވެޔޮ މިސްކިތް ކައިރީ، މަގުމައްޗަށް ވާގޮތަށް ބަހައްޓާފައިވާ ސަބްސްޓޭޝަން އެތަނުން ނެގުމުގެ މަސައްކަތް ސްޓެލްކޯއިން ފަށައިފި އެވެ.
ސްޓެލްކޯގެ އައު މެނޭޖިންގ ޑިރެކްޓަރު ހުސައިން ފަހުމީ މަގާމާއި ހަވާލުވެވަޑައިގެންނެވި ފުރަތަމަ ދުވަހު ވަނީ ރައްޔިތުންނަށް ތަކުލީފަކަށް ވާގޮތަށް މާވެޔޮ މިސްކިތް ކައިރީ، މަގުމައްޗަށް ވާގޮތަށް ބަހައްޓާފައިވާ ސަބްސްޓޭޝަން އެތަނުން ނަގާނެ ކަމުގެ ޔަގީންކަން ދެއްވާފައެވެ.
އެކަމާއި ގުޅިގެން މިއަދު ސްޓެލްކޯއިން ކުރި ޓުވީޓެއްގައި ބުނީ، އެ ސަބްސްޓޭޝަން ނެގުމަށްޓަކައި ބަހައްޓަންޖެހޭ ފުރަތަމަ ޓްރާންސްފޯމަރު ރޭ ބަހައްޓާފައިވާ ކަމަށެވެ.
އަދި އެ ކުންފުނީގެ އަމާޒަކީ މި އަހަރު ނިމުމުގެ ކުރިން އައު ސަބްސްޓޭޝަންގެ މަސައްކަތް ނިންމައި، މާވެޔޮ މިސްކިތް ސަރަހައްދުގައި ހުރި ސަބްސްޓޭޝަން ނަގައި، އޭގެ ފަސޭހަ ރައްޔިތުންނަށް ލިއްބައިދިނުން ކަމަށްވެސް ބުނެފައިވެއެވެ.
އައު އެމްޑީ ހުސައިން ފަހުމީ މަގާމާއި ހަވަާލުވެ ވަޑައިގެންނެވުމަށްފަހު ވަނީ މާވެޔޮ މިސްކިތް ކައިރީގައި މަގުމައްޗަށް ވާގޮތަށް ބަހައްޓާފައިވާ ސްޓެލްކޯގެ ޓްރާންސްފޯމަރު ހުންނަ ސަރަހައްދަށް ވަޑައިގެން އެތަން ބައްލަވާލައްވާފައެވެ.
އެ ޓްރާންސްފޯމަރަކީ އެ ސަރަހައްދާއި، އެމަގު ބޭނުން ކުރާ ގިނަ އަދަދެއްގެ ރައްޔިތުންނަށް ތަކުލީފަކަށްވެފައިވާކމުގެ ޝަކުވާ ލިބިފައިވާ ޓްރާންސްފޯމަރެއްކަމުގައި ސްޓެލްކޯއިން ބުނެއެވެ.
ސްޓެލްކޯގެ އައު އެމްޑީ ފަހުމީ ވަނީ އެ ސަރަހައްދަށް ވަޑައިގެން އެ ޓްރާންސްފޯމަރާއި ހެދި ވަމުންދާ އުނދަގޫތަކަށް ރައްޔިތުންގެ ކިބައިން މާފަށް އެދިވަޑައިގެންފައެވެ. އަދި އެ ޓްރާންފޯމަރު ނެގުމުގެ އަމަލީ މަސައްކަތް ފައްޓަވައި، މި އަހަރު ނިމުމުގެ ކުރިން މަގުމަތިން އެ ޓްރާންސްފޯމަރު ނަގާނެ ކަމަށް ފަހުމީ ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
