ދެޕާޓީ ގުޅިގެން އެއްރޫހެއްގައި މަސައްކަތްކޮށްފިނަމަ، ކުރިއަށް އޮތް ރައްޔިތުންގެ މަޖިލިސް އިންހާބު ބޮޑު ނަތީޖާއަކުން ކާމިޔާބު ކުރެއްވޭނެކަމަށް ރައީސުލްޖުމްހޫރިއްޔާ ޑރ. މުހަންމަދު މުއިއްޒު ވިދާޅުވއެއްޖެއެވެ.

ޕީއެންސީގެ އޮފީސް ރަސްމީކޮށް ހުޅުވުމަށްފަހު ވާހަކަފުޅު ދައްކަވަމުން ރައީސް ވިދާޅުވީ، މިއީ ވަރަށް މުހިންމު ފެށުމެއްކަށެވެ. އެގޮތުން މިރޭ އޮންނަ ސެނެޓް ބައްދަލުވުމާއި އެކު ކުރިއަށްއޮތް އިންތިހާބުތަކަށް ޕީޕީއެމްއާއި ޕީއެންސީ ދެޕާޓީގުޅިގެން ރާއްޖޭގެ ހުރިހާ ކަންކޮޅުތަކެއްގައި އެންމެ އެއްރޫހެއްގައި ގައުމު އިސްކޮށް ކުރައްވާ މަސައްކަތް ފެށިގެންދާނޭކަމަށް ރައީސް ވިދާޅުވިއެވެ.

ރައީސް ވިދާޅުވީ، ދެޕާޓީ ގުޅިގެން ކުރައްވަން ނިންމަވާފައިވާ މަސައްކަތްތަކުގެ ނަތީޖާއަކަށް ވެގެންދާނީ ކުރިއަށް އޮތް ރައްޔިތުންގެ މަޖިލީހުގެ އިންތިހާބު ބޮޑު ނަތީޖާއަކުން ކާމިޔާބުކުރެއްވުން ކަމަށެވެ.

Advertisement

ގޮންޖެހުންތައްވެސް ހުންނާނޭކަމަށާއި، އެއީ ކުރިއެރުމަށް ލިބިގެންދާ އިތުރު ހިތްވަރެއްކަންފާހަގަ ކުރައްވާ ރައިސް ވިދާޅުވީ، މަސައްކަތްކުރައްވާނީ އަބަދުވެސް ރައްޔިތުންގެ ލާބައާއި މަންފާއަށްޓަކައި ކަމަަށެވެ.

ރައީސް ވިދާޅުވީ، ދީނާއި ގައުމާއި އަދި ރައްޔިތުންގެ ހައްގުގައި މަސައްކަތް ކުރުންމަތީ ސަރުކާރު އަބަދުވެސް ދެމިއޮންނާނޭކަމަށާއި، މިގޮތުގައި ކުރިއަށް ދިއުމަށް ދެޕާޓީގެ މެންބަރުންނާއި އަދި ދެޕާޓީއަށް ތާއީދުކުރައްވާ އެންމެހާ ބޭފުޅުންގެވެސް އެއްބާލުން މުހިންމުކަމަށެވެ.

އިތުރަށް ރައީސް ޑރ. މުއިއްޒު ވިދާޅުވީ، ޖާގަ ތަނަވަސް އޮފީހެއް ލިބިގެން ދިއުމަކީ ލިބުނު ވަރަށް ބޮޑު ކުރިއެެރުމެއް ކަމަށާއި، މިކަމުގައި މަސައްކަތް ކުރެއްވި ލީޑާޝިޕްގެ ހުރިހާ ބޭފުޅުންނަށް އަދި އެހެނިހެން ހުރިހާ ބޭފުޅުންނަށްވެސް ޝުކުރުއަދާކުރައްވާ ކަމަށެވެ.