ހައްދުފަހަނަ އަޅާފައިވާ އިސްރާއީލުން ފަލަސްތީނުގެ ޣައްޒާއަށް ހަމަލާދޭ މިންވަރު އިތުރުވަމުންދާތީ، އދ އިން ކަންބޮޑުވުން ފާޅުކޮށްފިއެވެ.

އދ ގެ އިންސާނީ ހައްގުތަކާ ބެހޭ ހައި ކޮމިޝަނަރު ވޯލްކަރ ޓާކް ވިދާޅުވާ ގޮތުގައި މިހާރު އޮތް ހާލަތަކީ ބިރުވެރި ހާލަތެއް ކަމަށާއި ދެ ފަރާތުން ވެސް އަނިޔާވެރި ޖަރީމާތައް ހިންގުމުގެ ނުރައްކާ އެބައޮތް ކަމަށެވެ.

 ވޯލްކަރ ޓާކް ވަނީ އިސްރާއީލާއި ހަމާސް އަދި ނުފޫޒުގަދަ ބައިނަލްއަގްވާމީ ފަރާތްތަކަށް އަނިޔާވެރި ޖަރީމާތައް ހުއްޓުވުމަށް ގޮވާލައްވާފައެވެ.

ޣައްޒާގައި ފަލަސްތީނުގެ މީހުން އުޅެނީ ރައްކާތެރި ނޫން، ތޮއްޖެހިފައިވާ އަދި ސާފުތާހިރުކަން ނެތް ހާލަތްތަކުގައި ކަމަށާއި އެތައް މިލިއަން ފަލަސްތީނު ރައްޔިތުންގެ ގެތަށް ފުޑު ފުޑުވުމާއި ބިރުވެރިކަމުގެ ސަބަބުން މީހުން ގެދޮރު ދޫކޮށްލުމާއި ނިޒާމީ ގޮތުން މަހުރޫމް ވެފައި ވާކަން ޓާކް ފާހަގަ ކުރެއްވިއެވެ.

އދ އިން ފަލަސްތީނުގެ ރެފިއުޖީންނާ ބެހޭ އިދާރާ (ޔޫއެންއާރުޑަބްލިއުއޭ) އިން އޭނާ ގެ ވާހަކަ ތަކަށް އެއްބާރުލުންދީ، ޣައްޒާގެ ހާލަތު "ކޮންމެ މިނެޓަކުން ގޯސްވަމުން" އަންނަ ކަމަށް އިންޒާރު ދީފައިވެއެވެ.

ޚާން ޔޫނިސްގެ އުތުރާއި އިރުމަތީގައި ފަލަސްތީނުގެ ހަނގުރާމަވެރިންނާ ޓެންކްތައް ހަނގުރާމަ ކުރަމުން ދިޔަ ކަމަށް ވެސް ރިޕޯޓްތައް ބުނެ އެވެ.

އިސްރާއީލުން ޣައްޒާއަށް ދެމުންގެންދާ ބޮމުގެ ހަމަލާތައް  ވަރުގަދަވެ، އާންމުންގެ އެތައް ބަޔަކު ޝަހީދުވެ އެތައް ބަޔަކު ވަނީ ޒަޚަމްވެފައެވެ.