މަސްވެރިންގެ ދުވަހާއި ގުޅުވައިގެން މަސްވެރިކަމާއި އެ ސިނާއަތާއިގުޅުން ހުރި މައުލޫމާތު ކުޑަކުދިންނަށް ހިއްސާކުރުމަށް "މިފްކޯ ކުޑަކުދިންގެ ހަވީރު" ނަމުގައި ކުޑަކުދިންގެ ހަވީރެއް ބޭއްވުމަށް ނިންމައިފިއެވެ. 

ފިޝަރީޒް މިނިސްޓްރީން ބުނީ، މި ކުޑަކުދިންގެ ހަވީރަކީ އެ މިނިސްޓްރީ އާއި މިފްކޯއިން ގުޅިގެން އިންތިޒާމްކުރާ ހަވީރެއް ކަމަށާ އެ ހަވީރުގެ ހޮސްޓިންގް ޕާޓްނަރަކީ އަރބަންކޯ ކަމަށެވެ.

8 ޑިސެމްބަރ 2023 ވަނަ ދުވަހު ހަވީރު 4:00 އިން 6:00 އަށް ހުޅުމާލެ، ސެންޓްރަލް ޕާރކްގައި، ބާއްވާ މި ހަވީރަކީ ހުނަރުވެރި، ހޭލުންތެރި އަދި ޝައުގުވެރިކަމާއިއެކު ކުދިންނަށް ހޭދަކޮށްލެވޭ ދެގަޑިއިރަށް ހެދުމަށް ގިނަ ކަންކަން ރޭވިފައިވާ ކަމަށް އެ މިނިސްޓްރީން ބުނެއެވެ. 

Advertisement

އެގޮތުން އިވެންޓްއަށް ވަންނަ މަގު ހާއްސަކުރެވިފައިވަނީ ދިވެހި މަސްވެރިކަމުގެ ތައާރަފެއް ދޭ މަގެއްގެ ގޮތުގައި ކަމަށާ، މި އިވެންޓުގެ ތެރެއިން މަސްވެރިކަމާއި ގުޅޭ ހުށަހެޅުންތައް ދައްކާލެވޭނެ ކަމަށް ބުނެފައިވެއެވެ. އޭގެ ތެރޭގައި، މަސް ކެނޑުމުގެ ހުނަރު ދައްކާލުމާއި، މަހުން ދިވެހި ތަފާތު ކާނާ ތައްޔާރު ކުރުމާއި މަހުގެ އުފެއްދުންތައް ދައްކާލުން ހިމެނޭ ކަމަށް މައުލޫމާތު ދީފައިވެއެވެ. 

މީގެ އިތުރުން މިނިސްޓްރީން ބުނީ، މި ކުޑަކުދިންގެ ހަވީރުގެ ތެރެއިން ކުރެހުމުގެ މުބާރާތްތަކާއި "ފަސްމީރު ޔަންގް ޝެފް" ނަމުގައި މުބާރާތެއް ވެސް ބޭއްވުމަށް ހަމަޖެހިފައިވާ ކަމަށާ މުބާރާތުގައި ވާދަކޮށް މަތިން މާކްސް ހޯދާ ކުދިންނަަށް ހާއްސަ އިނާމެއް ދެވޭނެ ކަމަށެވެ.

މިިނިސްޓަރީން ބުނީ، މި ކުޑަކުދިންގެ ހަވީރުގެ ކުޅިވަރުތައް ރޭވުމުގައި އެކި އުމުރުގެ ކުދިންނާއި ނުކުޅެދުންތެރިކަން ހުންނަ ކުދިންނަށްވެސް ބައިވެރިވެވޭނެ ގޮތަށް އިސްކަންދީފައިވާނެ ކަމަށެވެ.