އާބަންކޯގެ މުވައްޒަފުން ހުޅުމާލޭ ގެ ފޭސް 1، ފޭސް 2 އަދި ހިޔާ ސަރަހައްދު ހިމެނޭހެން ހުޅުމާލެ ގެ ވަރަށް ބޮޑު ސަރަހައްދެއް ސާފުކޮށްފިއެވެ.

މިކަމާއި ބެހޭގޮތުން އާބަންކޯއިން ނެރުނު ނޫސްބަޔާނެއްގައި ބުނީ މި މަސައްކަތް ކުރިއަށް ގެންދިޔައީ އެ ކޯޕަރޭޝަންގެ މެނޭޖިންގް ޑިރެކްޓަރ ފަޒުލް ރަޝީދުގެ އިރުޝާދުގެ ދަށުން ކަމަށެވެ.

30 ނޮވެމްބަރ އިން ފެށިގެން ކުރިއަށް ގެންދިޔަ ސާފުކުރުމުގެ މަސައްކަތުގައި ހުޅުމާލޭގެ އެކި ސަރަހައްދުތަކުން ގިނަ އަދަދެއްގެ ކުނި ނަގައި ސާފުކުރެވާކަމަށާއި އެގޮތުން ހުޅުމާލެ ފޭސް 1، ފޭސް 2 އަދި ހިޔާ ސަރަހައްދުން ޖުމްލަ 60 ޓަނުގެ ކުނި އެއްކުރެވިފައި ވާކަމަށް އާބަންކޯ އިން މައުލޫމާތު ދެއެވެ.

Advertisement

ބޮޑު އާބާދީއެއް ދިރިއުޅޭ ހުޅުމާލެއަކީ ސާފުތާހިރު އަދި ހިތްފަސޭހަ ތަނެއްގެ ގޮތުގައި ދެމެހެއްޓުމަށް އާބަންކޯއިން ދަނީ ގިނަ މަސައްކަތްކަތެއް ކުރަމުންނެވެ. އަދި ހުޅުމާލޭގެ އެކި ސަރަހައްދުތައް ސާފުކޮށް ކުނި ނައްތާލުމުގެ މަސައްކަތް މީގެ ކުރިންވެސް އާބަންކޯއިން ވަނީ ކުރިއަށް ގެންގޮސްފައިއެވެ. މިގޮތުން މަދިރި މަދުކުރުމަށް ދާދި ފަހުން ކުރިއަށް ގެންދިޔަ 'ޑެންގީ އިޖާބަ' ކެންޕެއިން ގައި ވެސް ހުޅުމާލޭގެ އެކި ސަރަހައްދުތައް ސާފުކޮށް، މަދިރި އާލާވުން މަދުކުރުމަށް ގިނަ މަސައްކަތްތަކެއް ކުރެވިފައި ވެއެވެ. 

އާބަންކޯގެ ނޫސްބަޔާނުގައި ވަނީ އެ ކޯޕަރޭޝަންގެ އަމާޒަކީ ހުޅުމާލެއަކީ ސާފްތާހިރު ތަނެއްގެ ގޮތުގައި ދެމެހެއްޓުންކަމަށެވެ.އެހެންކަމުން މި އަމާޒަށް ވާސިލްވުމަށް ވަކިވަކި ފަރުދުންވެސް އެބައެއްގެ ފަރުދީ ޒިންމާ އަދާކޮށް، ކުނި ޖަމާކުރަން ކަނޑައެޅިފައިވާ ސަރަހައްދުތަކަށް ކުނި ޖަމާކުރުމަށާއި، ރައްކާތެރި ގޮތުގައި ކުނި ނައްތާލުމަށް ހާއްސަ ސަމާލުކަމެއް ދިނުމަށް ވެސް އާބަންކޯއިން ވަނީ އެދިފައެވެ.

މިފަދަ އިޖްތިމާއީ މަސައްކަތްތަކުގައި ހުޅުމާލޭގެ ރައްޔިތުން އާބަންކޯއަށް ދެމުން ގެންދާ އެއްބާރުލުން އެ ކޯޕަރޭޝަނުން ވަނީ ފާހަގަ ކޮށްފައެވެ.