ދިވެހި ރާއްޖޭގެ އެސެޓް ރިކަވަރީ ގާނޫނުގެ ނަމޫނާ ސަރުކާރާއި މަޖިލީހަށް ވަރަށް އަވަހަށް ހުށައަޅުއްވާނެ ކަމަށް އެންޓިކޮރަޕްޝަން ކޮމިޝަން (އޭސީސީ) ގެ ރައީސް އާދަމް ޝާމިލް ވިދާޅުވެއްޖެއެވެ.
އެބޭފުޅާ މިފަދައިން ވިދާޅުވީ މިއަދު ބައިނަލްއަޤްވާމީ އެންޓި-ކޮރަޕްޝަން ދުވަހުގެ މުނާސަބަތުގައި ބޭއްވެވި ޖަލްސާގައި ވާހަކަފުޅު ދައްކަވަމުންނެވެ.
މިގޮތުން ޝާމިލް ވިދާޅުވީ މަސައްކަތާއި ހަވާލުވިއިރު އެސެޓް ރިކަވަރީ ގެ ނިޒާމް ފާހަގަ ކުރެވުނީ ދިވެހި ރާއްޖޭގައި އެންމެ އިސްކަމެއް ދޭންޖެހިފައި އޮތް ނިޒާމުކަމަށެވެ. އެގޮތުން އޭސީސީގެ މަސައްކަތާއި ހަވާލުވެވަޑައިގަތުމަށް ފަހު އެންމެ ފުރަތަމަ ފެށި މަސައްކަތަކީ ދިވެހި ރާއްޖޭގެ އެސެޓް ރިކަވަރީގެ ނިޒާމުގެ ތެރެއިން އަނބުރާ ދައުލަތަށް ހޯދަން ޖެހޭ ފައިސާ އާ މުދަލާ ތަކެތި ހޯދުމަށް ކުރަން ޖެހޭ މަސައްކަތުގެ ދިރާސާ ކުރުން ކަމަށް އެބޭފުޅާ ވިދާޅުވިއެވެ.
އަދި ދިރާސާ އަށް ފަހު އޭސީސީން ވަނީ ފަސް އަހަރު ދުވަހުގެ ދިގު ރާސްތާ ޕްލޭނެއް ގެ ދަށުން މަސައްކަތް ފަށައި، މޮނިޓަރިން އެންޑް އިވެލުއޭޝަން ޕްލޭނާއި އޭގެ ކަންކަން އެންފޯސްމެންޓްގެ ހިސާބަށް ގެނެއްސައިކަމަށް އެބޭފުޅާ ފާހަގަ ކުރެއްވިއެވެ.
މީގެ އިތުރުންވެސް ޝާމިލް ވިދާޅުވީ ދިވެހި ރާއްޖޭގެ އެސެޓް ރިކަވަރީ ގެ މޮޑެލް ލޯ އެއް އޭގެ ހާއްސަ ބޭފުޅެއްގެ އެހީތެރިކަމާއި އެކު ހަދާފައިވާ ކަމަށާއި އޭގެ ނަމޫނާއެއް އޭސީސީ ގައި އެބައޮތް ކަމަށެވެ. މާ ގިނަ ދުވަސްތަކެއް ނުވެ ސަރުކާރާއި މަޖިލީހާއި ދިވެހި ރާއްޖޭގެ އެސެޓް ރިކަވަރީ ނިޒާމެ ގެ ގާނޫނު އޮންނަން ވީގޮތް ފަރުމާކޮށްފައި ބާއްވަން ޖެހޭ ގޮތުގެ ނަމޫނާއެއް އަރުއްވާނެ ކަމަށް ވެސް ވިދާޅުވިއެވެ.
"އިރާދަ ކުރެއްވިއްޔާ މާ ގިނަ ދުވަސްތަކެއް ނުކޮށް އަޅުގަނޑު ވެރިކަމާއި ގާނޫނު ހެދުމުގެ ބާރާއި މި މޮޑެލް ލޯ ހަވާލުކޮށް ދިވެހި ރާއްޖޭގެ އެސެޓް ރިކަވަރީ ނިޒާމް ގެ ގާނޫނު އޮންނަން ވީގޮތް ފަރުމާކޮށްފައި ބާއްވަން ޖެހޭ ގޮތުގެ ނަމޫނާއެއް އަރުވާނަން."
ޝާމިލް ވިދާޅުވިއެވެ.
ޝާމިލް ވަނީ މި މަސައްކަތް ކޮށްދެއްވި އެންމެހާ ފަރާތްތަކަށް ޝުކުރު އަދާ ކުރައްވާފައެވެ.
އެސެޓް ރިކަވަރީގެ ގާނޫނަކީ ވަގަށް، އޮޅުވާލައިގެން ނުވަތަ އެނޫންވެސް ގޮތަކުން ހޯދައިފައިވާ މުދަލެއް އޭގެ ހައްގުވެރިޔާ އަށް ހޯދައި ދިނުމަށް ހަދާފައިވާ ގާނޫނެކެވެ.
Advertisement
This content is created and paid for by advertisers and does not involve Voice Journalists
