ކުރިއަށް އޮތް ރައްޔިތުުންގެ މަޖިލީހުގެ އިންތިހާބުގައި ވެރިކަން ކުރާ ޕީޕީއެމް/ޕީއެންސީ ކޯލިޝަންގެ މަޖިލިސް ޕްރައިމަރީގައި ދަނގެތީ ދާއިރާގެ މެންބަރު މުހައްމަދު ނާޒިމްގެ ޕާޓީ، މޯލްޑިވްސް ނެޝަނަލް ޕާޓީ, އެމްއެންޕީގެ ފަރާތުން ވާދަކުރުމަށް ޝައުގުވެރިވާ ފަރާތްތަކަށް އެ ޕާޓީން އެ ފުރުސަތު ހުޅުވާލައިފި އެވެ. 

އެމްއެންޕީން މިކަމާއި ގުޅިގެން ކުރި އިއުލާނެއްގައި ބުނީ، ޕީޕީއެމާއި ޕީއެންސީގެ ކޮންގްރެސް ކޯލިޝަނާއި އެމްއެންޕީ ގުޅިގެން، ކޯލިޝަންގެ ލީޑަރޝިޕްގެ މެދުގައި އެއްބަސްވެވޭ އުސޫލުތަކެއްގެ މަތިން، 2024 ވަނަ އަހަރުގެ މަޖިލީހަށް، ކެންޑިޑޭޓުން ނެރުމަށް ހަމަޖެހިފައިވާ ކަމަށެވެ.

އެހެންކަމުން އެ ކޯލިޝަނުން ބާއްވާ ޕްރައިމަރީގައި އެމްއެންޕީގެ ފަރާތުން ވާދަކުރަން ބޭނުންވާ ފަރާތްތަކަށް އެ ފުރުސަތު ހުޅުވާލެވިފައިވާ ކަމަށް އިއުލާނުގައިވެއެވެ. 

އެހެން ކަމުން، މަޖިލިސް ޕްރައިމަރީގައި ވާދަކުރަން ޝައުގުވެރިވާ ފަރާތްތަކުން 10 ޑިސެންބަރު ގެ 14:00 ގެ ކުރިން އެޕާޓީގެ އޮފީހަށް ނުވަތަ [email protected] އަށް މެއިލް ކުރުމަށް ވަނީ އެދިފައެވެ. 

މި ޕްރައިމަރީގައި ބައިވެރިވެވޭނީ 9 ޑިސެމްބަރު 2023 ގެ ނިޔަލަށް އެ ޕާޓީގެ މެންބަރުންގެ ގޮތުގައި ތިބި މެންބަރުންނަށް ކަމަށްވެސް އިއުލާނުގައި ބުނެފައިވެއެވެ. 

އެމްއެންޕީގެ އިތުރުން އިންތިޚާބުގެ ދެވަނަ ބުރުގައި ޕީޕީއެމް ޕީއެންސީ ކޯލިޝަނަށް ތާއީދު ކުރި އެމްޑީއޭއިން ވެސް ވަނީ ޕީޕީއެމް/ޕީއެންސީގެ ޕްރައިމަރީގައި ވާދަކުރަން ފުރުސަތު ހުޅުވާލައިފިއެވެ.