ރައްޔިތުންގެ މަޖިލީހުގެ އިންތިޚާބުގައި، ސިޔާސީ ޕާޓީއެއްގެ ޓިކެޓްގައި ވާދަކުރާ ކެންޑިޑޭޓަކީ އެޕާޓީ އެއްގެ މެންބަރަކަށްވުން ކޮންމެހެން ލާޒިމެއް ނޫން ކަމަށް އީސީގެ ނާއިބު ރައީސް އިސްމާއީލް ހަބީބު ވިދާޅުވެއްޖެެއެވެ. 

ހަބީބު މިރޭ އެކްސްގައި ކުރެއްވި ޕޯސްޓެއްގައި ވިދާޅުވީ، ރައްޔިތުންގެ މަޖިލީހުގެ އިންތިޚާބުގައި، ސިޔާސީ ޕާޓީއެއްގައި ރަޖިސްޓަރީ ވެފައިވާ މީހަކަށް އަމިއްލަގޮތުން ވާދަ ކުރެއްވިދާނެކަމަށެވެ. 

އަދި ސިޔާސީ ޕާޓީއެއްގެ ޓިކެޓުގައި ރައްޔިތުންގެ މަޖިލީހުގެ އިންތިޚާބުގައި ވާދަކުރައްވާ މީހަކު އެޕާޓީ އެއްގެ މެންބަރަކަށްވުން ލާޒިމު ނޫން ކަމަށްވެސް ވިދާޅުވި އެވެ. 

Advertisement

މިއާއެކު ހަބީބު ވިދާޅުވީ، ސިޔާސީ ޕާޓީއެއްގެ ޓިކެޓުގައި ވާދަކުރައްވާ ނަމަ، ބޭނުންވާނީ އެ ޕާޓީއަކުން އެ ކެންޑިޑޭޓަކު ހުށަހަޅާކަމުގެ ގަރާރު ކަމަށެވެ. 

އަދި އަމިއްލަގޮތުން ވާދަކުރައްވާ ނަމަ، ބޭނުންވާނީ، އެ ދާއިރާ އަކުން އެ މީހަކަށް ތާއީދުކުރާ 50 މީހުންގެ ސޮއި ކަމަށް އޭނާ ވިދާޅުވި އެވެ. 

ހަބީބު މިފަދައިން ވިދާޅުވެފައި ވާއިރު، ސިޔާސީ ޕާޓީ ތަކުން މަޖިލީހަށް ވާދަކުރާ ކެންޑިޑޭޓް ކަނޑައެޅުމަށް ބާއްވާ ޕްރައިމަރީތަކުގައި، އެ ވާދަކުރައްވާ ކެންޑިޑޭޓަކީ އެ ސިޔާސީ ޕާޓީގެ ކެންޑިޑޭޓަށް ވުން ލާޒިމު ކުރެއެވެ. 

އެގޮތުން މިފަހަރު ޕާޓީ ތަކުން ކޮށްފައިވާ ހުރިހާ އިއުލާން ތަކުގައިވެސް ޕާޓީ މެންބަރަކަށް ޝަރުތު ކޮށްފައިވެއެވެ.