ރާއްޖޭގެ ދެކުނުގައި، މަސް ބަންދުކުރާ 50 ޓަނުގެ ފެސިލިޓީއެއް ޤާއިމުކުރުމުގެ މަސައްކަތް ކުރައްވަމުންގެންދަވާ ކަމަށް މަސްވެރިކަމާއި ކަނޑުގެ ވަސީލަތްތަކާއި ބެހޭ ވަޒީރު އަޙުމަދު ޝިޔާމް ވިދާޅުވެއްޖެއެވެ.

ޕީއެސްއެމްގެ "ރާއްޖެ މިއަދު" ޕްރޮގްރާމްގައި ވަހަކަ ދައްކަވަމުން ވަޒީރު ވިދާޅުވީ، މަސްބަންދުކުރާ ކާރުޚާނާއެއް ދެކުނުގައި ތަރައްޤީކުރުމަކީ ރައީސުލްޖުމްހޫރިއްޔާ ޑރ މުހައްމަދު މުއިއްޒުގެ ސަރުކާރުގެ ވަރަށް ބޮޑު ޢަމާޒެއްކަމަށާއި މިއީ މަސްވެރިކަމުގެ ދާއިރާ ކުރިއެރުވުމަށް ކޮންމެހެން ކުރަންޖެހިފައިވާ މަސައްކަތެއް ކަމަށެވެ. 

އެގޮތުން މަސް ޕްރޮސެސްކުރުމަށް 50ޓަނުގެ ޕްލާންޓެއް ނުވަތަ، 25 ޓަނުގެ ދެ ޕްލާންޓް ބެހެއްޓުމަކީ ސަރުކާރުގެ އަމާޒު ކަމުގައި ވިދާޅުވެ ވަޒީރު ވަނީ، ރާއްޖޭގެ ދެކުނަކީ މަސްވެރިކަން ރަނގަޅު ސަރަޙައްދަކަށް ވުމާއެކު، އެކަމުގެ ބޭނުން ވަރަށް ބޮޑަށް އޮތްކަން ފާހަގަ ކުރައްވައިފައެވެ. އެހެންނަމަވެސް، މިމަސައްކަތް ކުރިއަށްގެންދާނެ ވަކި ތަނެއް އަދި ސަރުކާރުން ނިންމަވާފައި ނުވެއެވެ.

އަދި މީގެ އިތުރުން ސަރުކާރުން ޚާއްސަ އިސްކަމެއް ދޭނެ ކަންކަމުގެ ތެރޭގައި ގަނޑުކުރި ރޯމަހުގެ ބަދަލުގައި ރޯ މަހުން ބާވަތްތައް އުފައްދާ އެއަށް އަގެއް އިތުރުކޮށް ވިއްކުން ހިމެނޭކަމަށާއި، ރޯމަހުން އިތުރު ބާވަތްތައް އުފައްދައި އެކްސްޕޯޓް ކުރުމަކީ، ލިބޭ އާމްދަނީ ވަރަށް ބޮޑަށް އިތުރުކުރެވޭނެ ކަމެއްކަމުގައި ވަޒީރު ވިދާޅުވިއެވެ. 

ހަމަ އެޔާއެކު ވަޒީރު ޝިޔާމް ވިދާޅުވީ، މަސް ދަޅުގެ އިތުރުންވެސް ރޯމަސް ޕްރޮސެސްކޮށް އާމްދަނީ ހޯދޭނެ އިތުރު ގޮތްތައް ބައްލަވާނެކަމަށެވެ. އެގޮތުން ބޭރުގެ މާކެޓްތަކުގައި ޑިމާންޑް އޮންނަ ބާވަތްތައް ދިރާސާކޮށް، މަސައްކަތްތައް ކުރައްވާނެކަމަށްވެސް ވަޒީރު ވިދާޅުވިއެވެ.