މަސްވެރިކަމުގެ ސިނާއަތުގައި މަސައްކަތް ކުރާ ހުރިހާ މަސްވެރިންގެ ކަންބޮޑުވުންތަކާއި ދަތިތަކަށް ޚާއްސަ ސަމާލުކަމެއް ދެއްވަވައިގެން މަސްވެރިންގެ ޤައުމީ ދަފްތަރެއް އެކުލަވާލުމުގެ މަސައްކަތް ކުރެވެމުންދާކަމުގައި މަސްވެރިކަމާއި ކަނޑުގެ ވަސީލަތްތަކާއި ބެހޭ ވަޒީރު އަޙުމަދު ޝިޔާމް ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، ރޭ ޕީއެސްއެމްގެ "ރާއްޖެ މިއަދު" ޕްރޮގްރާމުގައި މަސްވެރި ސިނާޢަތާ ގުޅޭ ސަރުކާރުގެ ސިޔާސަތުތަކާ، 'ހަފްތާ 14 ' ތަންފީޒުކުރެވެމުންދާ މިންވަރާ، ތަންފީޒުކުރަން ރާވާފައިވާގޮތަށް އަލި އަޅުވާލައި ދެއްކެވި ވާހަކަ ފުޅުގައެވެ.
އެމަނިކުފާނުގެ ވާހަކަފުޅުގައި ވިދާޅުވީ، މަސްވެރިކަމަކީ ރަސްމީކޮށް އާމްދަނީ ހޯދުމަށް ކުރާ މައިގަނޑު މަސައްކަތަށް ވާނަމަ އެ ފަރާތެއްގެ، ޕްރޮފައިލެއް ވަކިން ހެދުމުގެ މަސައްކަތް މިހާރު ފަށައިފައިވާކަމަށެވެ.
އިރާދަ ކުރެއްވިއްޔާ މި މަސައްކަތާއެކު މަސްވެރިންނަކީ ދަޢުލަތް ދަންނަ އަދި ދައުލަތުން މަސްވެރިން އެ ކުރައްވާ ކަންކަން އެޕްރިޝިއޭޓް ކުރާކަން މަސްވެރިންނަށް އިހްސާސްވާވަރު އިރާދަކުރެއްވިއްޔާ ވެގެންދާނެ މި މަސައްކަތްތައް ނިންމާލެވޭ ވަރު ވާއިރު
އަހްމަދު ޝިޔާމް
ހަމައެޔާއެކު މަސްވެރިންގެ ދަފްތަރުގައި ހިމެނުމުގައި ބަލާނެ ކަންކަމުގެ މައްޗަށް އަލި އަޅުވާލަމުން ވަޒީރު ވިދާޅުވީ، އެންމެ މުހިއްމު ކަމެއްގެ ގޮތުގައި އެ ފަރާތަކީ ރަސްމީ / މައިގަނޑު މަސައްކަތެއްގެ ގޮތުގައި މަސްވެރިކަން ކުރާ ފަރާތަކަށް ވާންޖެހޭނެ ކަމަށައި އެއީ ކޮންމެ ބާވަތެއްގެ މަސްވެރިކަމެއް ކަމުގައިވިޔަސް މި ގިންތީގެ ތެރޭގައި ހިމެނިގެން ދާނެކަމަށެވެ.
މީގެ އިތުރުން ވަޒީރު ދެއްކެވި ވާހަކަފުޅުގައި ވިދާޅުވީ މަސްވެރިކަމަކީ ސިއްހީ ފަރުވާދޭ ތަންތަނާއި ދުރުގައި ކަނޑުމަތީގައި ހެދާކުރާ މަސައްކަތެއްކަމަށާއި، އެހެންކަމުން އެކަށީގެވާ ފެންވަރު ރަނގަޅު އިންޝުއަރެސްގެ ނިޒާމެއް އެ ފަރާތްތަކަށް ގާއިމްކޮށްދެވުމަކީ ލިބޭނެ ވަރަށްބޮޑު ލުޔެއްކަމުގައެވެ.
Advertisement
This content is created and paid for by advertisers and does not involve Voice Journalists
