އައްޑޫ ސިޓީ ގައި ހިންގި މާރާމާރީއާއި ގުޅިގެން އައްޑޫ ހިތަދޫ އިން ތޫނު ހަތިޔާރުތަކެއް ފުލުހުން ހޯދައިފިއެވެ.
އެތަކެތި ހޯދައިފައިވަނީ އައްޑޫ ސިޓީ ހިތަދޫގައި ގްރޫޕު ހަދައިގެން އެއްވެ އުޅޭ އުސްގަނޑު ބީޗު ސަރަހައްދު ބަލައި ފާސްކުރުމުގެ ތެރެއިންނެވެ.
އެތަންބަލައި ފާސްކުރުމުގެ ތެރޭގައި ފުލުހުން ތޫނު ހަތިޔާރާއި މާރާމާރީ ހިންގުމަށް ބޭނުންކުރާ އެހެނިހެން ތަކެތި ވަނީ ހޯދައިފައެވެ.
ފުލުހުން ބުނެފައިވަނީ އިއްޔެ ހަވީރު ކުރިއަށް ގެންދިޔަ މިއޮޕަރޭޝަނުގައި މިތަކެތި ހޯދާފައިވަނީ އުސްގަނޑު ބީޗުގެ އެކި ސަރަހައްދުތަކުގައި ފޮރުވާފައި ހުއްޓާ ކަމުގައެވެ.
އެތަނުން ހޯދި ތަކެތީގެ ތެރޭގައި މާރާމާރީ ހިންގުމަށް ތައްޔާރުކޮށްފައި ހުރިކަމަށް ބެލެވޭ ތޫނު ހަތިޔާރު، މޫނު ނިވާކުރުމަށް ބޭނުންކުރާ މާސްކު، އަންގި، އަންނައުނު އަދި އެހެނިހެން ބައެއް އާލާތްތައް ހިމެނޭކަމަށްވެސް ފުލުހުން ބުނެފައި ވެއެވެ.
ފުލުހުން ބުނެފައިވަނީ މި އޮޕަރޭޝަންގައި ހިތަދޫ ޕޮލިސް ސްޓޭޝަން، ސައުތު ޕޮލިސް ސީރިއަސް ކްރައިމް ސެލް، ސްޕެޝަލިސްޓް އޮޕަރޭޝަންސް އަދި އިންޓެލިޖެންސް ހަރަކާތްތެރިވެފައިވާ ކަމުގައެވެ.
އައްޑޫ ސިޓީގައި މި ޑިސެމްބަރު މަހުގެ 1 ވަނަ ދުވަހާއި 3 ވަނަ ދުަވަހު ވަނީ ގޭންގް މާރާމާރީތަކެއް ހިންގައިފައެވެ. މި މާރާމާރީތަކާއި ގުޅިގެން މާރާމާރީތައް ހުއްޓުވުމަށް ފުލުުހުން ދަނީ މަސައްކަތް ތަކެއް ކުރަމުންނެވެ.
އެގޮތުން މާލެއިން ޚާއްސަ ފުލުހުންގެ ފައުޖެއް ވަނީ އައްޑޫ ސިޓީއަށް ގޮސްފައެވެ.
Advertisement
This content is created and paid for by advertisers and does not involve Voice Journalists
