ސަރުކާރުގެ ބޯޖިޔާވަހިކަމުގެ މަޝްރޫޢުގެ ތެރެއިން ހިއްކުމަށް ހަމަޖެހިފައިވާ ފުށި ދިއްފަރު ފަޅުގެ މަޝްރޫޢަށް ހުރަސް އެޅުމަކީ ސީދާ ރައްޔިތުންނަށް ދެވޭ ދެރައެއް ކަމުގައި ރައްޔިތުންގެ މަޖިލިހުގެ ކުޑަހުވަދޫ ދާއިރާގެ މެމްބަރު އަހުމަދު އާމިރު ވިދާޅުވެއްޖެއެވެ.

އަންނަ އަހަރަށް ލަފާކޮށް ފިނޭންސް މިނިސްޓްރީން މަޖިލީހަށް ހުށަހެޅި ބަޖެޓަށް ކޮމިޓީން ގެނައި އިސްލާހާއެކު ފާސް ކުރި 49.8 ބިލިއަން ރުފިޔާގެ ބަޖެޓު ފާސްކުރި އިރު އެއިން ސަރުކާރުގެ ބޯހިޔާވަހިކަމުގެ މަޝްރޫޢުގައި ހިމެނޭ އެންމެ ބިޔަ އެއް މަޝްރޫޢުކަމަށްވާ ފުށި ދިއްގަރުފަޅު ހިއްކުމުގެ މަޝްރޫޢުވަނީ އުނިކޮށްފައެވެ. 

މިކަމާއި ގުޅިގެން ޕީއެސްއެމްއަށް ދެއްވި އިންޓަރވިއުއެއްގައި އާމިރު ވިދާޅުވީ، ރައްޔިތުންގެ މަޖިލީހަކީ ރައްޔިތުންގެ ތަރައްޤީއާއި ކުރިއެރުމަށް މަސައްކަތް ކުރާ ބަޔަކު ތިބޭ ތަނަކަށް ވާންޖެހޭ ކަމަށާއި، މަޖިލީހަކީ ކޮންމެ ސަރުކާރެއް އޮތް ނަމަވެސް ރައްޔިތުންގެ ތަރައްޤީއަށް ހުރަސް އަޅާ ބަޔަކު ތިބި ތަނަކަށްވެގެން ނުވާނެކަމުގައެވެ. 

ރައްޔިތުންގެ މަޖިލިހުގެ ބަޖެޓް ކޮމެޓީގައި ފާއިތު 15 އަހަރުވެސް މަސައްކަތްކުރެެއްވި އާމިރު އިތުރަށް ވިދާޅުވީ، ޕާޓީ ސިސްޓަމްގެ ތެރެއިން ވެރިކަން ކުރާއިރު، ޚިޔާލު ތަފާތުވުން ހުންނާނެ ކަމަށާއި އެހެންނަމަވެސް ކަނޑައެޅިގެން ރައްޔިތުންނާއި ގުޅުންހުރި މުހިންމު ކަންކަމުގައި ދަތި ކުރުމުގެ ނިޔަތުގައި ކަންކަން ކުރުމަކީ އެއްގޮތަކަށްވެސް ކޮށްގެންވާނެ ކަމެއް ނޫންކަމަށެވެ.

ރައީސުލްޖުމްހޫރިއްޔާ ހުވާ ކުރެއްވި ޖަލްސާގައި މަޖިލިސް ރައީސް މުޙައްމަދު އަސްލަމް، މަޖިލިސް ތެރެއިން ސަރުކާރެއް ހިންގުމަށް ފުރިހަމަ އެއްބާރުލުން ދެއްވާނެކަމުގެ ޔަގީންކަން ދެއްވައި ދެއްކެވި ވާހަކަފުޅަށް އިޝާރާތް ކުރައްވައި އާމިރު ވިދާޅުވީ ފެނިގެން ދަނީ މުޅިއަކުން އެގޮތަށް ކަންކަން ހިނގާ މަންޒަރެއް ނޫންކަމަށެވެ. އަދި މީގެ އިތުރުން އެ އިރަކު އޮންނަ ސަރުކާރެއްގެ މެނިފެސްޓޯގައި ހުށަހަޅާ ކަންކަން ކޮށްދިނުމަށް މަޖިލީހުން ހުރަސް އެޅުމަކީ ކޮށްގެންވާނެ ކަމެއްނޫންކަމުގައިވެސް އާމިރު ވިދާޅުވިއެވެ. 

ރައީސުލްޖުމްހޫރިއްޔާ ޑރ. މުޢިއްޒާއި، އެމަނިކުފާނުގެ ނާއިބު ހުވާކުރެއްވުމަށް ޖުމްހޫރީ މައިދާނުގައި ބޭއްވި ޖަލްސާގައި ވާހަކަފުޅުދައްކަވަމުން މަޖިލީހުގެ ރައީސް މުޙައްމަދު އަސްލަމް ވަނީ، ރައީސުލްޖުމްހޫރިއްޔާއަށާއި، އެ މަނިކުފާނުގެ ސަރުކާރަށް ފުރިހަމަ އެއްބާރުލުން ދެއްވާނެކަމުގެ ޔަގީންކަން ދެއްވާފައެވެ. އަދި ސަރުކާރުގެ ފަރާތުން މަޖިލީހަށް ހުށައަޅާ ކަންކަން، ޤާނޫނުގެ ތެރެއިން ވީ އެންމެ ރަނގަޅަކަށް ކޮށްދެއްވާނެކަމުގެ ޔަޤީންކަންވެސް އަސްލަމް ވަނީ ދެއްވާފައެވެ.