ދިވެހިރާއްޖޭގެ މަސްވެރިންގެ ކަންބޮޑުވުންތަކާއި ޚިޔާލު ސަރުކާރާއި ހިއްސާކުރުމަށް މަސްވެރިންގެ ދުވަހާއި ގުޅިގެން މަސްވެރިކަމާއި ކަނޑުގެ ވަޞީލަތްތަކާއި ބެހޭ ވުޒާރާއިން އިންތިޒާމުކޮށްގެން ކުރިއަށް ގެންދާ މަސްވެރިންގެ ގުންޒަރު ފަށައިފިއެވެ. 

މިއަދު ހެނދުނު 09:00 ން ހަވީރު 17:00 ގެ ނިޔަލަށް ކުރިއަށްދާ މި ގުންޒަރު އިފްތިތާހް ކޮށްދެއްވީ މަސްވެރިކަމާއި ކަނޑުގެ ވަޞީލަތްތަކާއި ބެހޭ ވަޒީރު އަހްމަދު ޝިޔާމެވެ. 

ރާއްޖޭގެ އެކި ސަރަހައްދުތަކުން ޖުމުލަ 40 މަސްވެރިންނާއެކު ކުރިއަށްދާ މި ގުންޒަރުގައި މަސްވެރިކަމުގެ ސިނާއަތުގައި ހަރަކާތްތެރިވާ ބައެއް ފަރާތްތަކުންވެސްވެސް ވަނީ ބައިވެރިވެފައެވެ. 

 މި ގުންޒަރުގައި މަސްވެރިކަމާ ގުޅޭ އެކި އެކި ދާއިރާތަކާއި ގުޅޭގޮތުން މަޝްވަރާކުރުމަށް ވަނީ ހަމަޖެހިފައެވެ.

އެގޮތުން ބޮޑުކަންނެލީގެ މަސްވެރިކަން ދެމެހެއްޓުމައްޓަކައި ހިންގަމުންދާ މަސައްކަތްތަކާއި ބެހޭ ގޮތުން ބައިވެރިންނަށް މައުލޫމާތު ދެވޭނެއެވެ. އަދި މަސްދޯނިފަހަރުގައި ރެސްކިއު ޑައިވިނަށް ސެޓިފައިވެފައިވާ ފަޅުވެރިން ތިބުމުގެ މުހިންމުކަމާއި، ކަނދުފަތި ގާއިމްކުރުމުގައި ބަލަންޖެހޭ ބައެއް ފަންނީ ކަންކަމަށްވެސް އަލިއަޅުވާލެވޭނެއެވެ.

އަދި ހަމަަ މީގެ އިތުރުން، ކަޅުބިލަމަހުގެ އެމް.އެސް.ސީ ސެޓްފިކެޓް ދެމެހެއްޓުމަށް ކުރަންޖެހޭ ކަންތައްތަކާއި ބޮޑުކަންނެލީގެ މަސްވެރިކަން ދެމެހެއްޓުމަށްޓަކައި ހިންގަމުންދާ ފިޝަރީޒް އިންޕްރޫވްމެންޓް ޕްރޮޖެކްޓްގެ މަސައްކަތްތަކާގުޅޭގޮތުން މި ގުންޒަރުގެ ބައިވެރިންނަށް މައުލޫމާތު ދިނުމަށް ހަމަޖެހިފައިވާއިރު، މަސްވެރިންނާއި މަސްވެރިކަމާއި ގުޅޭ ތަފާތު އެކި ދާއިރާތަކާއި ބެހޭގޮތުން މަޝްވަރާ ކުރުމަށް ވަނީ ހަމަޖެހިފައެވެ.