މި އަހަރު ބޭއްވުނު ރިޔާސީ އިންތިޚާބުގެ ދެވަނަ ބުރުގައި ވާދަކުރެއްވި ދެ ކެނޑިޑޭޓުންވެސް ކަނޑައެޅިފައިވާ ވަގުތުގެ ކުރިން މާލީ ބަޔާން ކުށަހަޅައިފައިވާކަމުގައި އިލެކްޝަންސް ކޮމިޝަނުން ބުނެފިއެވެ. 

އެ ކޮމިޝަނުގެ ނައިބް ރައީސް އިސްމާއީލް ހަބީބް ވިދާޅުވީ، ދެ ކެންޑިޑޭޓުން ވެސް ސުންގަޑި ހަމަވުމުގެ ކުރިން މާލީ ބަޔާންތައް ހުށަހަޅާފައި ވާކަމަށާއި އެ މާލީ ބަޔާންތައް ދިރާސާކޮށް ބަލަންޖެހޭ ކަންކަން ބެލުމަށްފަހު އެކަން ނިމުނުހާ އަވަހަކަށް  ބަޔާންތައް އާންމު ކުރާނެކަމަށެވެ. 

ވޮއިސް އާއި ވާހަކަދައްކަވަމުން ނައިބްރައީސް ހަބީބު އިތުރަށް ވިދާޅުވީ، މިހާރު ކުރިއަށް ދަނީ ބަޔާންތައް ދިރާސާކޮށް އިތުރަށް ބަލަންޖެހޭ ކަންކަން ބެލުމުގެ މަރުހަލާ ކަމަށާއި އެ މަރުހަލާ ފުރިހަމަ ކުރެވުނުހާ އަވަހަކަށް ދެ ކެނޑިޑޭޓުންގެ މާލީ ބަޔާންވެސް އާންމު ކުރާނެކަމަށެވެ. 

ރިޔާސީ އިންތިހާބުގެ ދެވަނަ ބުރުގައި ވާދަ ކުރެއްވި ރައީސް ޑރ. މުހައްމަދު މުއިއްޒުއާއި ކުރީގެ ރައީސް، އިބްރާހިމް މުހައްމަދު ސޯލިހުހެ މާލީ ބަޔާން ހުށަހެޅުމުގެ ސުންގަޑި ހަމަވީ މި ހުސްވި ނޮވެމްބަރު 29 ގައެވެ. 

އިންތިހާބަކަށްފަހު ކެންޑިޑޭޓުންގެ ކެމްޕޭނު ހަރަދުތައް ކުރި ގޮތުގެ ތަފުސީލު ހިމެނޭ މާލީ ބަޔާނެއް ހުށަހެޅުމަކީ ގާނޫނީ ގޮތުން ލާޒިމު ކަމެކެވެ. އެ ބަޔާނުގައި އިންތިހާބާ ގުޅިގެން ކެންޑިޑޭޓު ކޮށްފައިވާ ހަރަދުތަކުގެ ތަފުސީލާއި އިންތިހާބަށް ހަރަދު ކުރުމަށް ފައިސާ ހޯދި ގޮތުގެ ތަފުސީލުގެ އިތުރުން، ފައިސާއާއި ތަކެތި ދިން ފަރާތްތަކާއި ދިން މިންވަރުގެ ތަފުސީލު ހިމަނަން ޖެހޭނެއެވެ.

އޭގެއިތުރުން ކެންޑިޑޭޓުގެ ބޭންކު އެކައުންޓުން ކޮށްފައިވާ ހުރިހާ މުއާމަލާތެއް އެނގޭނެ އެކައުންޓު ސްޓޭޓުމަންޓާއި ސައްހަ މައުލޫމާތުކަން އަންގައިދޭ ފައިސާގެ ރަސީދު، އިންވޮއިން އަދި ބިލު ކޮޕީވެސް އެ ބަޔާނާއެކު ހުށަހަޅަންޖެހޭނެއެވެ.