އަލްމަވާޞީ ގައި 50ހާހަށްވުރެ ގިނަ މީހުން ޖަމާވެ ތޮއްޖެހިއްޖެއެވެ.
އަލްޖަޒީރާއަށް ރިޕޯޓްކުރި ނޫސްވެރިޔަކު އަލްޖަޒީރާގައި ބުނެފައިވަނީ ރަފާޙް ގައި ހުރި އަލްމަވާޞީ އޭ ކިޔާ ސަރަހައްދަށް 50ހާހަށްވުރެ ގިނަ މީހުން ޖަމާވެ ތޮއްޖެހިފައިވާ ކަމަށެވެ.
އަލްމަވާޞީ އަކީ ޣައްޒާގެ ދެކުނުގައި ދިރިއުޅޭ ރައްޔިތުންނަށް ރައްކާތެރި ތަނެއް ކަމަށްބުނެ އިޒްރާއިލް ޔަހޫދީން ޣައްޒާގެ ރައްޔިތުން ޖަމާވަމުންދާ ސަރަހައްދެކެވެ.
އެތަނަކީ ހީތްރޫ އެއަރޕޯޓަށްވުރެ ވެސް ކުޑަ ތަނެއް ކަމަށް އަލްޖަޒީރާގައި ބުނެފައިވެއެވެ.
އަލްމަވާސީ އިން ރިޕޯޓްކުރި ނޫސްވެރިޔާ ބުނެފައިވަނީ އެތަނަށް އެމީހުން ދިއުމަށް ބޭނުންކުރި ވެހިކަލް ގައި އެތަނަށް ދިޔުމާއި އެކު އެ ވެހިކަލްއާއި ދިމާއަށް އެތަނުގައި ތޮއްޖެހިފައިތިބި މީހުންތައް ދުވެފައި އައި ކަމަށެވެ. އަދި އެމީހުން ހީކުރީ ރިޕޯޓަރުން ނަކީ އިންސާނީ އެހީ ހިފައިގެން ދިޔަ ބައެއް ކަމަށެވެ.
މީގެއިތުރުން އަލްމަވާޞީގައި ތބި މީހުންނަށް ކާއެއްޗެއް ނުލިބޭތާ ދެދުވަސްވެފައި ވާ ކަމަށާއި، ބޮންއަޅައިގެން އެމީހުން ޝަހީދުނުވާނެނަމަ ބަނޑުހައިހޫނު ކަމުގެ ސަބަބުން އެމީހުން މަރުވެގެންހިނގައިދާނެ ކަމަށެވެ.
އެތަނުގައި ތިބި މީހުން ބަނޑުހައި ކަންމަތީގައި ކަރުހިއްކުން ނުފިލާ ޙާލުގައި ކަމަށް އަލްޖަޒީރާގައި ބުނެފައިވެއެވެ.
އަލްމަވަސީ ގައި މިވަގުތު 50ހާހަށްވުރެ ގިނަ މީހުން އެބަތިބި ކަމަށާއި، އެތަނުގައި ޖަހައިފައިހުރި ޓެންޓުތައް ފުރި ބާރުވެފައިވާ ކަަމަށް އަލްޖަޒީރާގައި ބުނެފައިވެއެވެ.
އަދި އެސަރަހައްދުގެ ބިމެއްގެ ވެރިއެއް ނަަމަ އެތަނުގައި ވަގުތީ ބޯހިޔާވަހިކަން ހޯދަމުންދާ މީހުންނަށް ބިމުގެ ތަންތަން ކޮޅު ކުއްޔަށް ދެމުން ނުވަތަ ވިއްކަމުންދާ ކަމަށް އަލްޖަޒީޜާގައި ބުނެފައިވެއެވެ.
އެތަނުގެ ޙާލަތު ވަރަށް ގޯސްވެފައިވާ ކަަމަށާއި، އެސަރަހައްދަށް ވަރަށް ވައިގަދަ ކަމަށާއި އެތަނަށް އެހާމެ ފިނިގަދަ ވެފައިވާ ކަމަށްވެސް އަލްޖަޒީރާގައި ބުނެފައިވެއެވެ.
އަދި ވާރޭ ވެހިއްޖެނަމަ އެތަނުގައި ފެންބޮޑުވެ ދާނެ ކަމަށް ލަފާ ކުރެވޭ ކަމަށާއި، އެތަނުގައި ހެދިފައިވާ ޓެންޓްތަކަކީ މީހުން ދިރިއުޅެން އެހާ އެކަށީގެންވާ ގޮތައް ހެދިފައިވާ ތަންތަންކަމަށް ބުނެފައިވެއެވެ.
Advertisement
This content is created and paid for by advertisers and does not involve Voice Journalists
