ދައުލަތުގެ ބެލުމުގެ ދަށުގައި ތިބޭ ކުދިން "އެޑޮޕްޓް" ކޮށްގެން ގެންގުޅޭނެ އާއިލާތަކާ ހަވާލުކުރުމަށް "ކޮންމެ ކުއްޖަކަށް އާއިލާއެއް" ނަމުގައި ހާއްސަ ޕްރޮގްރާމެއް އިޖްތިމާޢީ އަދި ޢާއިލީ ތަރައްގީ އާ ބެހޭ ވުޒާރާއިން ފަށައިފިއެވެ.
"ކޮންމެ ކުއްްޖަކަށް ޢާއިލާއެއް" އަކީ އައު ސަރުކާރުގެ ސިޔާސަތުގެ ތެރޭގައި ހިމެނޭ ކަމެކެވެ. މި ސިޔާސަތުގެ މުހިންމު ކަމާއި ގުޅިގެން، ޕީއެސްއެމް ގެ ރާއްޖެ މިއަދު ޕްރޮގްރާމް ގައި ވާހަކަ ދައްކަވަމުން އިޖްތިމާޢީ އަދި ޢާއިލީ ތަރައްގީ އާ ބެހޭ ވުޒާރާގެ ނާއިބު އައިމިނަތު ނަމްޒާ ވިދާޅުވީ، ދައުލަތުގެ ބެލުމުގެ ދަށުގައި ތިބި ކުދިންނަށް، އެ ކުދިން ބަލަމުންދާ ހިޔާ ތަކުގައި ތިބި މީހުންގެ ފަރާތުން ލޯތްބާއި އަޅާލުން ދެވެމުންދާ ކަމަށެވެ.
"އެހެންނަމަވެސް ޢާއިލީ ވެއްޓެއްގައި ބޮޑުވާން، އެ ފުރުސަތު އެކުދިންނަށް ހޯދައި ދިނުމަކީ ކުޑަކުދިންގެ މިސްތަގުބަލުގެ ވާހަކަ ދައްކާއިރު އަޅުގަނޑުމެން ކުރަންޖެހޭ އެންމެ މުހިންމު އެއް ކަންތައް. ޢާއިލީ ވެއްޓެއްގެ ތެރެއިން، އެ ރައްކާތެރި ކަމާއި، ލޯތްބާއި، ކުލުނާއި، އޯގާތެރިކަން އެކުދިންނަށް ފޯރުކޮށްދިނުން އެއީ އަޅުގަނޑުމެން ކުރަންޖެހޭ ކަމެއް."
އިޖްތިމާޢީ އަދި ޢާއިލީ ތަރައްގީ އާ ބެހޭ ވުޒާރާގެ ނާއިބު އައިމިނަތު ނަމްޒާ
ނަމްޒާ ވިދާޅުވީ، ކުދިންނަށް ކަންކަން ކޮށްދެވެން ފަށާނީ، ކޮންމެ ކުއްޖަކަށްވެސް އާއިލާއެއް ލިބޭ ހިސާބުން ކަމަށް ގަބޫލުކުރައްވާ ކަމަށެވެ. އެހެނީ، ކުދިން ގިނަ ކަންކަން ދަސްކުރަމުންދަނީ ޢާއިލާގެ ތެރެއިން ކަމަށާ، ކޮންމެ ކުއްްޖަކަށް ޢާއިލާއެއް ހޯދައި ދިނުމުގެ މަގުސަދަކީ ކޮންމެ ކުއްޖަކަށްވެސް ލިބެން ޖެހޭ އަސާސީ ކަންކަން ފުރިހަމަވާ ބައެއްގެ ގޮތުގައި ހެދޭނީ އެކުދިންނަށް ޢާއިލާއެއްގެ ލޯބި ލިބިގެން ކަން ނަމްޒާ ފާހަގަކުރެއްވިއެވެ.
ނަމްޒާ އިތުރަށް ވިދާޅުވީ ދައުލަތުގެ ބެލުމުގެ ދަށުގައި، 18 އަހަރު ނުފުރޭ 164 ކުދިން ތިބި ކަމަށެވެ. އޭގެ ތެރޭގައި އެކި އުމުރުފުރާގެ ކުދިން ތިބިއިރު، ގިނަ މީހުން އާއްމުކޮށް އެޑޮޕްޓް ކުރަން ބޭނުންވަނީ އެންމެ ތުއްތު ކުދިންކަން ނަމްޒާ ފާހަގަކުރެއްވިއެވެ. އެހެންނަމަވެސް، އެއަށްވުރެ ބޮޑު ކުދިންނަކީވެސް ޢާއިލީ ވެއްޓެއްގެ ލޯބި ލިބެންޖެހޭ ކުދިން ކަމަށް ނަމްޒާ ވިދާޅުވި އެވެ.
"ކޮންމެ ކުއްްޖަކަށް ޢާއިލާއެއް" ސިޔާސަތު ތަންފީޒު ކުރުމަށް ފެށި ޕްރޮގްރާމާއި ގުޅޭ އިތުރު މައުލޫމާތު ދެއްވަމުން އިޖްތިމާޢީ ވުޒާރާގެ ސީނިއަރ ލިގަލް ކައުންސެލް ޢާއިޝަތު އިފާދް ވިދާޅުވީ ކުދިން ވަގުތީގޮތުން ނުވަތަ ދާއިމީ ގޮތުންވެސް ބަލަން ބޭނުންވާ އާއިލާތަކަށް އެ ޕްރޮގްރާމް ގެ ދަށުން ފުރުސަތު ފަހިވެގެންދާނެ ކަމަށެވެ.
އެގޮތުން ވަގުތީ ގޮތުން ކުއްޖަކު ބެލުމާ ހަވާލުވާނަމަ ހަވާލުކުރާނީ ވަކި މުއްދަތެއް ކަނޑައެޅުމަށް ފަހު އެ މުއްދަތަކަށް ކަމަށާ، އެންމެ މަދުވެގެން ހަވާލު ކުރާނެ މުއްްދަތަކީ ދެ އަހަރު ދުވަސް ކަމަށް އޭނާ ވިދާޅުވި އެވެ.
އަދި އެ ދުވަސްވަރުގެ ތެރޭގައި، އެ ކުއްޖާގެ އުފަން އާއިލާއަށް ކުއްޖާއަށް އަނބުރާ ދެވޭނެ މަގު ފަހިވޭތޯ ބަލައި އެކަން ކުރުމަށް މިނިސްޓްރީން މަސައްކަތް ކުރާނެ ކަމަށާ، އެކަން ނުވެއްޖެ ނަމަ، ކުއްޖާ ބަލަމުން އަންނަ އާއިލާއަށް އެ ކުއްޖާ ދާއިމީކޮށް ބެލުމުގެ ފުރުސަތު ލިބޭނެ ނުވަތަ ގާނޫނީ ބެލެނިވެރިކަން ހޯދުމުގެ ފުރުސަތު ވެސް އޮންނާނެ ކަމަށް އޭނާ ވިދާޅުވި އެވެ.
ވަގުތީ ގޮތުން ކުއްޖާ ބެލުން ޢާއިލާ އަކާއި ހަވާލު ކުރުމުގެ މަގުސަދަކީ މިހާރުން މިހާރަށްވެސް ކުދިންނަށް ޢާއިލާއެއްގެ ލޯބި ހޯދައި ދިނުންކަމަށް ނަމްޒާ ވިދާޅުވި އެވެ. އަދި އެގޮތުން ކުދިން ހަވާލު ކުރުމުގެ މަސައްކަތް ވޭހާވެސް ކުރުކޮށް، އަދި ލުއި ފަސޭހަކޮށް ކުރުމުގެ މަސައްކަތް ކުރައްވާނެ ކަމަށް އޭނާ ވިދާޅުވި އެވެ.
ނަމްޒާ އިތުރަށް ވިދާޅުވީ ކުދިން ބެލުމަށް ޝައުގުވެރިވާ ފަރާތްތަކަށް އެކަމާ ބެހޭ މައުލޫމާތު ފޯރުކޮށްދިނުމަށްޓަކައި މިނިސްޓްރީގެ ފަރާތުން ވަރަށް އަވަހަށް މާލެ، ވިލިމާލެ އަދި ހުޅުމާލޭގައި ސެޝަންތަކެއް ބާއްވާނެ ކަމަށެވެ.
Advertisement
This content is created and paid for by advertisers and does not involve Voice Journalists
