ރަތްކަނޑު ހުރަސްކޮށް އިޒްރާއިލަށް ދާ ހުރިހާ ބޯއްޓެއް ހިފަހައްޓާނެ ކަމުގެ އިންޒާރު ޔަމަނުގެ ހޫތީން ދީފިއެވެ.

އަލްޖަޒީރާގައި ހޫތީންގެ ބަޔާނަކާއި ހަވާލާދީ ބުނެފައިވަނީ ރަތް ކަނޑު ހުރަސްކޮށް އިޒްރާއިލަށް މުދާ ހިފައިގެން ދަނީ ކޮންމެ ޤައުމެއްގެ ބޯއްޓެއް ކަމަށް ވިޔަސް އެ ޖަމާޢަތުގެ އަމާޒަކަށް އެބޯއްޓު ހަދާނެ ކަމަށެވެ. އަދި އިޒްރާއިލަށް މުދާ ފޮނުވާ ބައިނަލް އަޤްވާމީ ޝިޕިންގް ކުންފުނިތަކަށް ވެސް ހޫތީން ވަނީ ބޯއްޓުތައް ހިފަހައްޓާނެ ކަމުގެ އިންޒާރު ދީފައެެވެ.

“ޣައްޒާއަށް ބޭނުންވާ ކާބޯތަކެެއްޗާއި، އަސާސީ ސާމާނު ނުލިބޭ ކަމަށް ވާނަމަ ރަތްކަނޑު ހުރަސްކޮށް އިޒްރާއިލަށްދާ މުދާ ބޯޓުތަކަށް އަހަރެމެންގެ މުޖާހިދުން ހަމަލާދީ ހިފަހައްޓާނެ، ކޮންމެ ޤައުމެއްގެ ކޮންމެ ބޯއްޓެއްވިޔަސް” ހޫތީންގެ ސްޕޯކްސްޕާސަން ބުނެފައިވެއެވެ.

Advertisement

މިފާއިތުވި ހަފްތާތަކުގައިވެސް ހޫތީން ވަނީ ރަތްކަނޑުން އިޒްރާއިލަށް މުދާ ހިފައިގެން ދިޔަ ބޯއްޓު ތަކެއް ހިފައިފައެވެ. ހޫތީން ބުނެފައިވަނީ އެމީހުންގެ އެމަސައްކަތަކީ ފަލަސްޠީނުގެ ރައްޔިތުންނާއި އެކު ތިބިކަން ދައްކުވައިދިނުމަށް ކުރާ ކަމެއް ކަމަށެވެ.

އިނގިރޭސި ވިލާތާއި އެމެރިކާއިން ވަނީ ހޫތީންގެ މި ޢަމަލުތައް ކުށްވެރިކުރާ ކަމަށް ބުނެފައެވެ. އިނގިރޭސި ވިލާތާއި އެމެރިކާއިން ވަނީ އިރާނުން ހޫތީންނަށް ވާގިވެރިވާ ކަމަށް ބުނެފައެވެ. މި ކަމުގެ ރައްދެއްގެ ގޮތުން އިރާނުން ބުނެފައިވަނީ ހޫތީންނަކީ އެމީހުންގެ ނިންމުންތައް މިނިވަންކަމާއި އެކު ނިންމާ ބައެއް ކަމަށް ބުނެފައެވެ.