ސްކޭމް ތަކަށް ހޭލުންތެރި ކުރުމުގެ ޕްރޮގްރާމެއް ދ އަތޮޅުގައި ފުލުހުން ކުރިއަށް ގެންގޮސްފިއެވެ.

ދ. އަތޮޅު ޕޮލިހާއި އިކޮނޮމިކް ކްރައިމް ޑިޕާޓްމަންޓް ގުޅިގެން “ސްކޭމް އެވެއާނަސް ވީކް” ނަމުގައި ދ. އަތޮޅުގެ ހުރިހާ ރަށެއްގައި ހޭލުންތެރިކުރުވުމުގެ ޕްރޮގްރާމެއް ވަނީ ކުރިއަށް ގެންގޮސްފައެވެ.

ޑިސެމްބަރު 3 އިން ފެށިގެން ހަފުތާއެއްގެ މުއްދަތަށް ކުރިއަށް ގެންދިޔަ މި ޕްރޮގްރާމަކީ ދ. އަތޮޅު ޕޮލިސް ސްޓޭޝަންތަކަށް ހުށަހެޅޭ ސްކޭމްގެ މައްސަލަތަކުން ރައްޔިތުން ރައްކާތެރިކުރުވުމަށާއި ކުރިއަށް މިއޮތް ސްކޫލް ބަންދާ ދިމާކޮށް ރާއްޖެއިން ބޭރަށް ދަތުރުކުރާ މީހުން ޑޮލަރު ގަންނަމުންދާނެ ނިސްބަތް އިތުރުވާނެ ކަމަށް ލަފާކޮށް ކުރިއަށް ގެންދިޔަ ހޭލުން ތެރިކަމުގެ ޕްރޮގްރާމް ތަކެކެވެ.

Advertisement

އަދި ކުޑަހުވަދޫގައި މޯލްޑިވްސް އިސްލާމިކް ބެންކުގެ ގޮތްޕެއް ހުޅުވައި، ޑޮލަރު ގެ މުއާމަލާތްތައް އޭޓީއެމް މެދުވެރިކޮށް ކުރެވޭގޮތަށް މަގުފަހިވުމާ ގުޅިގެން މިފަދަ މައްސަލަތައް އިތުރުވުމުގެ ފުރުސަތު އޮތުމާއެކު މިފަދަ މައްސަލަތަކުން ރައްޔިތުން ރައްކާތެރިކޮށް ހޭލުންތެރި ކުރުވުމަށް ކުރިއަށް ގެންދިޔަ ޕްރޮގްރާމެއް ކަމަށް ފުލުހުން ބުނެފައިވެއެވެ.

މި ޕްރޮގްރާމްގައި، ދ. އަތޮޅުގައި ދިރިއުޅޭ ދިވެހީންނާއި ބިދޭސީން ރަށްރަށުގައި ގިނަ އަދަދަކަށް ޖަމާވެތިބޭ ތަންތަނަށާއި ގޭބިސީތަކަށާއި އޮޑިދޯނިފަހަރަށް ޒިޔާރަތްކޮށް މައުލޫމާތުދީފައިވާ ކަަމަށް ފުލުހުން ބުނެއެވެ. އެގޮތުން، މަކަރާއި ހީލަތުން ފައިސާހޯދުމަށް އެކި ނަންނަމުގައި ގުޅާ މީހުންގެ ކިބައިން ރައްކާތެރިވާނެ ގޮތާއި، އެފަދަ މީހުން އާންމުގޮތެއްގައި ބޭނުންކުރާ އުކުޅުތައް ބުނެދީ އެފަދަ ކަންކަމުން ރައްކާތެރިވާނެގޮތުގެ މައުލޫމާތުދީފައިވެއެވެ. އަދި ހޭލުންތެރިކުރުމުގެ މައުލޫމާތު ހިމެނޭ ލީފްލެޓް ދީފައިވާ ކަމަށްވެސް ފުލުހުން ވަނީ ބުނެފައެވެ.

އޭގެ އިތުރުން، ސަރުކާރުގެ މުއައްސަސާތަކާއި ޖަމުއިއްޔާ ޖަމާއަތްތަކަށް ހާއްސަކޮށްގެން މައުލާުމާތު ދިނުމުގެ ސެޝަންތައް ކުރިއަށް ގެންގޮސްފައިވާ ކަމަށްވެސް ފުލުހުން ބުނެފައިވެއެވެ.

އެގޮތުން ސްކޭމް ކޯލްތަކުގެ ބާވަތްތަކާއި، ޑޮލަރު ވިއްކާނެކަމަށް ބުނެ އޮޅުވާލައިގެން ފައިސާ ހޯދާ މީހުން ބޭނުންކުރާ ބައެއް އުކުޅުތަކާއި، ފޭކް ސްލިޕް ފޮނުވައިގެންނާއި ޕިސިންގ ލިންކުތައް މެދުވެރިކޮށް ހިންގަމުންދާ ސްކޭމްތަކާއި، ފޭސްބުކް އެކްޓިވޭޓް އަދި ޑިއެކްޓިވޭޓް ކުރުމުގެ ނަމުގައި ފޮނުވާ ކޯޑުތަކާއި ޓްރޭޑް ކޮށްދޭނެކަމަށް ބުނެ އޮޅުވާލައިގެން ފައިސާ ހޯދާގޮތްތަކާ އަދި އީ-ސިމް އާ ގުޅުންހުރި ސްކޭމްގެ މައްސަލަތަކަށް ސަމާލުވުމަށް ރައްޔިތުން ހޭލުންތެރިކުރުވުމަށް މައުލޫމާތުދީފައިވެއެވެ.

“ސްކޭމް އެވެއާނަސް ވީކް” ގެ ހަރަކާތްތައް ނިންމާލިއިރު ދ. އަތޮޅުގެ 18 އަހަރުންމަތީގެ އާބާދީގެ %50 އަށްވުރެ ގިނަ ރައްޔިތުން ހޭލުންތެރިކޮށް މައުލޫމާތު ހިއްސާކޮށްފައިވާ ކަމަށާއި، މި ޕްރޮގްރާމް މިހާ ފުރިހަމައަށް ކުރިއަށް ގެންދިއުމަށް ދ. އަތޮޅުގެ ހުރިހާ ރަށެއްގެ ކައުންސިލް އަދި ރަށްރަށުގެ ރައްޔިތުންގެ ވަރަށް ފުރިހަމަ އެއްބާރުލުމެއް ލިބިފައިވާ ކަމަށް ފުލުހުން ބުނެފައިވެއެވެ.