ބާޒާރުގައި ފިޔާ އަގުބޮޑުކުރަމުން ދަނީ އިމްޕޯޓް ކުރުމުގައި ދަތިކަމެއް ނެތީސް ކަމަށް އިކޮނޮމިކް މިނިސްޓްރީން ބުނެފިއެވެ.

އިކޮނޮމިކް މިނިސްޓްރީން މިފަދައިން ބުނީ ރާއްޖޭގެ ބާޒާރުގައި ބައެއް ފަރާތް ތަކުން ފިޔާގެ އަގު ބޮޑު ކުރަމުން ދާތީ އާންމުން މިނިސްޓްރީއަށް ހުށައެޅި ޝަކުވާ ތަކާއި ގުޅިގެން ނެރުނު ނޫސް ބަޔާނެއްގައެވެ.

އެ ނޫސް ބަޔާނުގައި ވަނީ މިނިސްޓްރީން ބެލި ބެލުމުގައި މިހާތަނަށް ފިޔާ އިމްޕޯޓް ކުރުމުގައި އެއްވެސް ދަތިކަމެއް ނެތް ކަމަށެވެ.

އިކޮނޮމިކް މިނިސްޓްރީން ބުނީ  މޫސުމީ ގޮތުން މިވަގުތު އިންޑިއާއަށް ކުރިމަތި ވެފައިވާ ހާލަތާއި ގުޅިގެން، ބައެއް ގައުމު ތަކަށް ފިޔާ އެކްސްޕޯޓް ކުރުން ވަގުތީ ގޮތުން މަޑުޖައްސާލައިފައި އޮތް ނަމަވެސް ، ދިވެހި ރައްޔިތުންނަށް ފިޔާ ލިބުމުގައި ދަތި ކަމެއް ދިމާވާނެ އެއްވެސް ފިޔަވަޅެއް އެގައުމުން އަޅާފައި ނެތް ކަމަށެވެ.

މީގެ އިތުރުން ވެސް އެ މިނިސްޓްރީން ބުނީ ރާއްޖެއަށް ފިޔާ އިމްޕޯޓް ކުރާ ބައެއް ފަރާޓް ތަކާއި މިނިސްޓްރީއިން ކުރެވުނު މަޝްވަރާތަކުގައި އެފަރާތުން ރާއްޖެއަށް އެއްވެސް ދަތިކަމެއް ނެތި ރާއްޖެއަށް ފިޔާ އިމްޕޯޓް ކުރެވޭނެ ކަމުގެ ޔަގީންކަން މިނިސްޓްރީ އަށް ދީފައިވާކަމަށެވެ.

މިނިސްޓްރީން ތަފާތު 23 ފިހާރައަކުން އަގު ބަލައި ކުރި ދިރާސާ އިން ދައްކާ ގޮތުގައި، 23 ނޮވެންބަރު 2023 އާ އަޅާ ބަލާއިރު 10 ޑިސެންބަރު 2023 ގައި ބާޒާރުގައި 20% އާއި 50% އަށް ފިޔާގެ އަގު ބޮޑުވެފައި ހުރިކަން ވެސް މިނިސްޓްރީއަށް ފާހަގަ ކުރެވިފައިވާކަމަަށް  ނޫސް ބަޔާނުގައި ވެއެވެ.

ފިޔާ ފަދަ ޒަރޫރީ ބާވަތްތައް ރާއްޖެއަށް އިމްޕޯޓް ކުރުމުގައި އެއްވެސް ދަތި ކަމެއް ކުރި މަތި ވެއްޖެނަމަ މިކަމަށް އެކަށޭނަ ހައްލެއް ހޯދާނެ ކަމުގެ ޔަގީން ކަން މިނިސްޓްރީން ވަނީ އަރުވާފައެވެ.

އެހެންކަމުން އާންމުންނަށް ދަތިވާގޮތަށް ބާޒާރުގައި ފިޔާގެ އަގު މަތިނުކުރުމަށް މިނިސްޓްރީން ވަނީ ހުރިހާ ވިޔަފާރިވެރިންނަށް އިލްތިމާސް ކޮށްފައެވެ.