ރައީސުލްޖުމްހޫރިއްޔާ އިބްރާހިމް މުހައްމަދު ސާލިޙްގެ ސަރުކާރަށް ކުރި ތުހުމަތުތަކުގެ ހަގީގަތް ބެލުމަށް ޕަބްލިކް އިންކުއެރީއެއް ހެދުމަށް މަޖިލީހަށް ހުށައެޅި ރިޕޯޓު ފާސްކޮށްފިއެވެ.
މި ގަރާރު މަޖިލީހަށް ހުށައެޅުއްވީ ތިނަދޫ އުތުރު ދާއިރާގެ މެންބަރު އަބްދުލްމުޣުނީއެވެ. އެ މެމްބަރު ހުށައެޅި ގަރާރުގައި ވަނީ ނިމިދިޔަ އެމްޑީޕީގެ ސަރުކާރުގެ ސިޔާސަތުތަކުގެ ސަބަބުން ގައުމީ ސަލާމަތަށް އަސަރު ކޮށްފައިވާކަމަށް ބުނެ ކުރި ތުހުމަތުތަކުގެ ހަގީގަތް ދެނެގަނެ، ރައްޔިތުންނަށް ހާމަކުރުމުގެ ގޮތުން ޕަބްލިކް އިންކުއަރީއެއް ހިންގުމަށް ގޮވާލާފައެވެ.
މިގަރާރު ފާސްވީ މިއަދުގެ މަޖިލީހުގެ ޖަލްސާއަށް ހާޒިރުވެ ތިއްބެވި 57 މެމްބަރުންގެ ތެރެއިން 49 މެމްބަރުންގެ ވޯޓާއި އެކުއެވެ. ނުފެންނަ ކަމަށް އެއްވެސް މެމްބަރަކު ވޯޓު ދެއްވާފައިނުވާއިރު، އެއް މެމްބަރަކު ވަނީ ވަކި ގޮތަކަށް ވޯޓު ދިނުމަށް ބޭނުންފުޅު ނުވާކަމަށް ވޯޓު ދެއްވާފައެވެ.
އެހެންކަމުން މި ގަރާރު ދިރާސާކުރުމަށް ސަލާމަތާއި ބެހޭ ކޮމިޓީއިން ފޮނުވާފައިވާކަން މަޖިލީހުގެ ރައީސް މުހައްމަދު އަސްލަމް ވަނީ އިއުލާން ކުރައްވާފައެވެ.
ކުރީގެ ރައީސް މުހައްމަދު ސާލިހުގެ ވެރިކަމުގެ ފަސް އަހަރުގެ ތެރޭގައި އެމަނިކުފާނުގެ މައްޗަށް ކުރި އެންމެ ބޮޑު ތުހުމަތަކީ، އަވައްޓެރި އިންޑިއާ ދެމެދު ގޮތް ނޭނގޭ އެއްބަސްވުންތަކެއް އެކުލަވާލުން ހިމެނެއެވެ. އަދި ކޮރަޕްޝަނަށް ޒީރޯ ޓޮލަރެންސްގެ ސިޔާސަތުގެ ދަށުން ސަރުކާރު ހިންގަވާނެކަމަށް ވައުދުވި ނަމަވެސް އެމްއެމްޕީއާރުސީގެ މައްސަލަ ބެލިފައި ނުވުމާއި، ތަފާތު އެކި މައްސަލަތައް ބެލުމަށް އެމަނިކުފާނު އުފެއްދެވި ކޮމިޝަންތަކަށް އެދެވޭ މަސައްކަތެއް ކުރެވިފައި ނުވުންވެސް މި ތުހުމަތު ތަކުގެ ތެރޭގައި ހިމެނެއެވެ.
މީގެ އިތުރުންވެސް ދިވެހި ރާއްޖޭގެ އިޤްތިޞާދާއި ގުޅުވައި، އެމަނިކުފާނުގެ މައްޗަށް ތުހުމަތުތަކެއް ވަނީ ކޮށްފައެވެ. މިގޮތުން ކުރެވުނު ތުހުމަތުތަކުގެ ތެރޭގައި، ކޮވިޑު-19 ބަލިމަޑުކަމުގެ އަސަރު ރާއްޖެއަށް ކުރި އިރު ވައްކަން ކުރިކަމުގެ ތުހުމަތު ހިމެނެއެވެ. އަދި ރާއްޖޭގެ އިގްތިސާދަށް ގެއްލުންވާ ގޮތަށް، ބައެއް ނިންމުންތައް ނިންމުމާއި ބޮޑެތި އަދަދުތަކުން ބަދަލު ނަގައިދިނުންގެ އިތުރަށް ރައީސާއި ގާތް މީހުންގެ ކުންފުނިތަކަށް މަޝްރޫއުތައް ނުއަގުގައި ހަވާލު ކުރުން ވެސް މި ތުހުމަތު ތަކުގެ ތެރޭގައި ހިމެނެއެވެ.
މިކަމާއި ބެހޭގޮތުން ރައީސް އިބްރާހިމް މުހައްމަދު ސާލިހު ވިދާޅުވީ، އެކަންކަމަށް ރައްދު ނުދެވުމާއި އަދި ރަނގަޅު ގޮތުގައި ރައްޔިތުންނަށް މައުލޫމާތު ނުދެވި ހުރުމަކީ ލިބުނު ގެއްލުމެއްކަން ގަބޫލު ކުރައްވާކަމަށެވެ. ޕާޓީގެ ކުރިމަގާއި ގުޅޭގޮތުން މަޝްވަރާކުރުމަށް އއ. އުކުޅަސްގައި ބޭއްވި ގައުމީ މަޖިލިސް ބައްދަލުވުމުގައި އޭރުގެ އިދިކޮޅު ފަރާތްތަކުން ސަރުކާރަށް ކުރި ތަފާތު އެކި ތުހުމަތުތަކުގެ އިންކުއަރީއެއް ހެދުމަށް ވަނީ ފާސްކޮށްފައެވެ.
Advertisement
This content is created and paid for by advertisers and does not involve Voice Journalists
