ފްރަންޓް ލައިންގައި މަސައްކަތް ކުރާ ފުލުހުންނަށް ނަފްސާނީ ދުޅަހެޔޮކަމާއި ގުޅޭ ޕްރޮގްރާމެއް ހިންގައިފިއެވެ.
ފުލުހުން ހާމަކޮށްފައިވާ ގޮތުގައި މި ޕްރޮގްރާމަކީ “ސްޓްރެސް އެންޑް ޓްރޯމާ އިން ޕޮލިސިންގ'' ނަމުގައި ހިންގި ޕްރޮގްރާމެކެވެ.
ފުލުހުން ބުނެފައިވަނީ ދިވެހި ފުލުހުންގެ ޚިދުމަތުގެ ވޯކްފޯސް ހެލްތް އެންޑް ވެލްބީންގ އާއި ދަ ވައިބް ޖަމުއިއްޔާ ގުޅިގެން ފެށި މި ސިލްސިލާގެ ފުރަތަމަ ޕްރޮގްރާމް ކުރިއަށް ގެންގޮސްފައިވަނީ މި މަހު 10 ވަނަ ދުވަހު ކަމަށެވެ.
ފްރަންޓް ލައިންގައި މަސައްކަތްކުރާ ފުލުހުންނަށް ހާއްސަކޮށްގެން މި ޕްރޮގްރާމް ކުރިއަށް ގެންގޮސްފައިވަނީ "ޓީ އެންޑް ޓޯކް" ކޮންސެޕްޓުގެ ދަށުން ކަމަށާއި، މި ޕްރޮގުރާމުގައި، ނަފްސާނީ ދުޅަހެޔޮކަމުގެ މުހިންމުކަން، ފުލުހުން ނަފްސާނީ ދުޅަހެޔޮ ބަޔަކަށް ވުމުގެ މުހިންމުކަން، ފްރަންޓްލައިންގައި މަސައްކަތްކުރާ ފުލުހުން ތަހައްމަލްކުރަމުންދާ ތަފާތު ވައްތަރުގެ ޓްރޯމާތައް އަދި އެ ޓްރޯމާއިން އަރައިގަތުމަށް ބޭނުންކުރެވިދާނެ ބައެއް އުކުޅުތައް ކިޔައިދީ ތަފާތު އެކި މައުލޫމާތު ހިއްސާކޮށްފައިވާ ކަމަށެވެ.
މި ޕްރޮގްރާމުގައި މައުލޫމާތުދެއްވީ އެންލައިޓް އަ މައިންޑްފުލް ކޮމިއުނިޓީގެ ފެސިލިޓޭޓާރުންނާއި ދަ ވައިބް ޖަމުއިއްޔާގެ ފެސިލިޓޭޓަރުންނެވެ. ފްރަންޓްލައިންގައި މަސައްކަތްކުރާ ހުރިހާ ޑިޕާޓްމަންޓް ހިމެނޭހެން 27 މުވައްޒަފުން މި ޕްރޮގްރާމްގައި ބައިވެރިވި ކަމަށް ފުލުހުން ހާމަކޮށްފައިވެއެވެ.
"ސްޓްރެސް އެންޑް ޓްރޯމާ އިން ޕޮލިސިންގ" ގެ ދަށުން، ފްރަންޓްލައިންގައި މަސައްކަތްކުރާ ފުލުހުންގެ ނަފްސާނީ ދުޅަހެޔޮކަން މޮނިޓަރކުރުމަށް ވޯކްފޯސް ހެލްތް އެންޑް ވެލްބީންގ އިން ދަނީ އިތުރު ސެޝަންތަކެއް ހިންގުމަށް ވެސް މަސައްކަތްކުރަމުން ދާ ކަމަށްވެސް ފުލުހުން ބުނެފައިވެއެވެ.
މި ޕްރޮގްރާމުގެ މަޤްސަދަކީ ފުލުހުންނަށް ކުރިމަތިވާ ޓްރޯމެޓިކް ހާދިސާތަކުން ފަސޭހައިން އަރައިގަތުމަށް ދަސްކޮށްދިނުމާއި ފުލުހުންގެ ރެޒިލިއަންސް ވަރުގަދަކުރުން ކަމަށްވެސް ފުލުހުން ބުނެފައިވެއެވެ.
Advertisement
This content is created and paid for by advertisers and does not involve Voice Journalists
