ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ބަދަލުގެ ގޮތުގައި ގިނަ އަދަދެއްގެ ފައިސާ ދީފައިވާކަމަށް ފަތުރާ ވާހަކައަކީ ދޮގު ވާހަކައެއްކަމަށް މާލީ ވުޒާރާއިން ބުނެފިއެވެ.
އޮންލައިން ނޫހެއްގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުގެ ފުރަތަމަ ދެ ހަފުތާ ތެރޭގައި ބަދަލުގެ ގޮތުގައި 101.7 މިލިއަން ރުފިޔާ ދޫކޮށްފައިވާ ކަމަށް ބުނެ ޚަބަރު ފެތުރުމާއި ގުޅިގެން، މާލީ ވުޒާރާއިން އެކްސްގައި ކުރި ޕޯސްޓެއްގައި ވަނީ އެއްވެސް ފަރާތަކަށް ބަދަލު ދިނުމަށް އައު ޕޭމަންޓެއް މި ސަރުކާރު ހަދާފައިނުވާނެ ކަމަށެވެ.
އަދި ބަދަލު ދިނުމާ ގުޅޭ ގޮތުން ފަތުރަމުންދާ ޚަބަރާ ގުޅިގެން ކަންކަން އިތުރަށް ސާފުކުރުމަށް ވަރަށް އަވަހަށް މިނިސްޓްރީން ނޫސްބަޔާނެއް ނެރޭނެ ކަމަށެވެ.
އައު ސަރުކާރުން ބަދަލުގެ ގޮތުގައި ގިނަ އަދަދެއްގެ ފައިސާ ދޫކުރިކަމަށް މީޑިއާއަކުން ޚަބަރު ފަތުރާފައިވާއިރު، ސަރުކާރާ އަމިއްލަ ފަރާތްތަކާ ދެމެދު ވެފައިވާ އެއްބަސްވުންތަކާ ގުޅިގެން އުފެދިފައިވާ މައްސަލަތައް ހައްލުކޮށް، ގެއްލުމުގެ ބަދަލު ދިނުމަށް އުފައްދާފައިވާ ސެޓްލްމަންޓް ކޮމެޓީ އުވާލާފައިވަނީ ވެސް މި ސަރުކާރުންނެވެ.
އެގޮތުން، ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެ ކޮމިޓީ އުވާލައްވާފައިވަނީ ނިމިދިޔަ ނޮވެމްބަރު މަހުގެ 21 ވަނަ ދުވަހުއެވެ.
މި ކޮމިޓީ އުވާލާފައި ވަނީ، "ސަރުކާރާ އަމިއްލަ ފަރާތްތަކާ ދެމެދު ވެފައިވާ އެއްބަސްވުންތަކާ ގުޅިގެން އުފެދިފައިވާ މައްސަލަތައް ޙައްލުކުރުމުގައި ޢަމަލުކުރާނެ ގޮތުގެ އުޞޫލު" ގެ ނަމުގައި 28 ނޮވެމްބަރު 2022 ން ފެށިގެން ޢަމަލުކުރަމުން ގެންދަނީ، ޤާނޫނީ އޮނިގަނޑެއްނެތި އަދި ޤާނޫނީ ބާރެއްނެތި އެކުލަވާލާފައިވާ އުޞޫލަކަށްކަމަށް ދައުލަތުގެ ބަންޑާރަ ނާއިބު ރައީސުލްޖުމްހޫރިއްޔާއަށް ލަފާ ވެސް ދެއްވާފައިވަނިކޮށްކަން ރައީސް އޮފީހުން ވަނީ ފާހަގަކޮށްފައެވެ.
އަދި ރައީސް މުއިއްޒު އެ ކޮމެޓީ އުވައިލެއްވިއިރު، އެ ކޮމިޓީއިން ވަނީ އެކި ފަރާތްތަކަށް ބަދަލުގެ ގޮތުގައި 225 މިލިއަނަށް ވުރެ ގިނަ ރުފިޔާ ދިނުމަށް 17 ނޮވެމްބަރު 2023 ގެ ކުރީން ނިންމައިފައިކަން ވެސް ރައީސް އޮފީހުން ފާހަގަކޮށްފައިވެއެވެ.
ފައިސާގެ އިތުރުން ދޭން ކަނޑައެޅި ހަރުމުދަލާއި ރަށްރަށާއި ފަޅުފަޅު ފަދަ ތަންތަން އަގުމަގުކުރުމުން، އެކި ފަރާތްތަކަށް ބަދަލުގެ ގޮތުގައި 1 ބިލިއަން ރުފިޔާގެ އަގުހުރި ހަރުމުދަލާއި ފައިސާ ދައުލަތުގެ މިލްކިއްޔާތުގެ ތެރެއިން ދޭން އެ ކޮމެޓީއިން ނިންމާފައިވާކަމަށް ވެސް ރައީސް އޮފީހުން އަންދާޒާކޮށްފައިވެއެވެ.
Advertisement
This content is created and paid for by advertisers and does not involve Voice Journalists
