ހުތުބާ ކިޔާ މީހުންގެ ދަތިކަން ރާއްޖޭގެ ހުރިހާ ރަށެއްގައިވެސް އެބަހުރިކަމަށް އިސްލާމީ ކަންތައްތަކާ ބެހޭ ވަޒީރު، ޑރ މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
ފޭސްބުކްގައި ކުރެއްވި ޕޯސްޓެއްގައި އޭނާ ވިދާޅުވީ، މި ފަހުން ރަށްރަށަށް ކުރެއްވި ޒިޔާރަތްތަކާއި ކައުންސިލްތަކާ އެކު ބޭއްވި ބައްދަލުވުމުގެ ތެރެއިން ފާހަގަވެވަޑައިގެންނެވި އެއް ކަމަކީ ގިނަ ރަށްތަކުގައި ހުތުބާ ކިޔާ މީހުންގެ ދަތިކަން ހުރި ކަމަށެވެ. ސަބަބެއް ކަމަށް ޑރ. ޝަހީމް ވިދާޅުވީ ހުކުރު ހުތުބާ ކިޔުމާއި އިމާމުކަން ކުރުމަކީ ދޮށީ އުމުރުގެ މީހުން ކުރަމުން ދިޔަ ކަމަކަށްވެފައި އޮތުން ކަމަށެވެ.
ހުތުބާ ކިޔާނެ މީހުންގެ ދަތި ވާހަކަ ކޮންމެ ކައުންސިލަކުން ދަނީ ހުށަހަޅަމުން
ޑރ މުހައްމަދު ޝަހީމް އަލީ ސަޢީދު
އެގޮތުން އެކަމަށް އޮތް ހައްލަކީ ހުތުބާގެ އިމާމުކަން ކުރަން ޒުވާނުންނަށް ފުރުސަތު ފަހިކޮށް ދިނުން ކަމުގައި ވަޒީރު ވިދާޅުވިއެވެ.
މީގެ އިތުރުން އޭނާ ވިދާޅުވީ އިމާމު ކޯހުގައި ކިޔަވައިދޭ ހުރިހާ އެއްޗެއް ގްރޭޑް 10، 11 އަދި 12 ގައި ކިޔަވައިދޭކަމަށާއި ޑިގްރީ ފެންވަރުގައި ކިޔަވައިދޭ މައުޟޫތައް އެ ގްރޭޑްތަކުގެ އިސްލާމް ފޮތުގައި އެބަހުރި ކަމަށެވެ. އެ މާއްދާ ރަނގަޅަށް ކިޔަވައިފި ކުއްޖެއްނަމަ އެ ކުއްޖަކަށް އިމާމުވެ ނަމާދު ނުކުރެވޭނެ ގޮތެއް ނޯންނާނެ ކަމަށް ވެސް އިސްލާމީ ކަންތައްތަކާ ބެހޭ ވަޒީރު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
