ރައީސުލްޖުމްހޫރިއްޔާ ޑރ މުހައްމަދު މުޢިއްޒުގެ އަނބިކަނބަލުން ސާޖިދާ މުހައްމަދަކީ މަސައްކަތްތެތި ކަނބަލެއް ކަމަށާ، އެކަމަނާއާއި މެދު ޒާތީ ވެވަޑައިގަންނަވާ ކަމަށް މާފަންނު މެދު ދާއިރާގެ މެންބަރު އިބްރާހީމް ރަޝީދު (ބޮންޑެ) ވިދާޅުވެއްޖެއެވެ. 

ސިވިލް ސާވިސްގެ ވަޒީފާގައި މެޑަމް ސާޖިދާ ހުންނަވަނީ ގާނޫނާއި ހިލާފަށްކަމަށް ބުނެ، އެކަމަނާއާއި ސިވިލްސާވިސް ކޮމިޝަނުން ހަދާފައިވާ ކޮންޓްރެކްޓް ބާތިލް ކުރުމަށް އެމްޑީޕީން މަޖިލީހަށް ހުށަހެޅި ކުއްލި މައްސަލައަށް ބަހުސް ކުރައްވަމުން ބޮންޑެ ވިދާޅުވީ ސިވިލް ސަރވިސްގެ ގަވާއީދާއި ޚިލާފަށް ކަމެއް ކޮށްފައިވާނަމަ އެ މައްސަލަ މަޖިލީހަށް ވަރަށް ފަސޭހައިން ނިންމޭނެ ގޮތްތައް އޮތް ކަމަށެވެ.

އެހެންނަމަވެސް، މެޑަމް ސާޖިދާގެ މައްސަލައިގައި އެމްޑީޕީ މެންބަރުން ކަން ކުރައްވާ ގޮތުން އެކަން ސިފަވަނީ ސިޔާސީކަމެއްގެ ގޮތުގައިކަމަށް އޭނާ ވިދާޅުވި އެވެ. 

ބޮންޑެ ވިދާޅުވީ ނިމިދިޔަ އެމްޑީޕީގެ ވެރިކަމުގެ ފަސް އަހަރު، އެމްޑީޕީން ކުރި މަސައްކަތަކީ ކުރީގެ ރައީސް މުހައްމަދު ނަޝީދާއި ފުރައްސާރަކުރުމާއި، ދިމާކުރުންކަމަށެވެ. އަދި މިހާރު އެމަނިކުފާނު ނެތުމުން އެމްޑީޕީއިން އުޅެނީ މެޑަމް ސާޖިދާ އާ "އަޅައިގަނެގެން" ކަމަށް އޭނާ ވިދާޅުވި އެވެ. 

މިއާއެކު ބޮންޑެ ވިދާޅުވީ ސާޖިދާއަކީ މީގެ ކުރިންވެސް އެމްއެފްޑީއޭ ގައި ވަރަށް ބުރަކޮށް މަސައްކަތް ކުރައްވަމުން އަންނަ ބޭފުޅެއް ކަމަށެވެ. އަދި، އެމްޑީޕީން އެކަމަނާގެ ކޮންޓްރެކްޓް ބާތިލް ކުރަން އުޅެނީ އެކަމަނާއާއި ޒާތީ ގޮތުން ޖައްސާލުމަށް ކަމަށް ވެސް އޭނާ ވިދާޅުވި އެވެ.

މީގެ އިތުރުން ބޮންޑެ ވިދާޅުވީ މިހާރު އެމްޑީޕީ ވެފައިވަނީ ފަސާދަ ޕާޓީއަކަށް ކަމަށާ، އެފަދައިން އެޕާޓީން ކަންކަން ކޮށްގެން ކުރިއަށް އޮތް މަޖިލީހުގެ އިންތިޙާބުގައިވެސް އެންމެ ގޮނޑިއެއްވެސް ކާމިޔާބު ނުވާނެ ކަމަށެވެ.