އިންތިޚާބުތަކުގައި ބަލިވާނެކަން އެނގުމުން ސަރުކާރު ވައްޓާލަން އުޅުމަކީ ބަލިވާނެ ކަމުގެ ނިޝާނެއް ކަމަށް ކުރީގެ ބަންޑާރަ ނައިބު އަލްއުސްތާޒާ ޢާއިޝަތު ޢާޒިމާ ޝަކޫރު ވިދާޅުވެއްޖެއެވެ.

ޢާޒިމާ މިހެން ވިދާޅުވީ އެކްސްގައި ކުރެއްވި ޕޯސްޓެއްގައެވެ.

ޢާޒިމާ ވިދާޅުވީ އިންތިޚާބުތަކުގައި ބަލިވާނެކަން އެނގުމުން ސަރުކާރު ވައްޓާލަން އުޅުމަކީ ބަލިވާނެ ކަމުގެ ނިޝާނެއް ކަމަށާއި މޮޅުވުމަކީ ދަނޑު މަތީގައި މޮޅުވުން ކަމަށެވެ.

މިފަދައިން ޢާޒިމާ ވިދާޅުވެފައިވަނީ 19 ވަނަ ރައްޔިތުންގެ މަޖިލީހުގައި މިވަގުތު ތިބި އިދިކޮޅު މައި ޕާޓީ އެމްޑީޕީގެ މެންބަރުންގެ އަޣްލަބިއްޔަތުން އިންތިޚާބީ ރައީސާއި ނައިބު ރައީސް އަޒުލްކުރެވޭނެ ފަދަ ގޮތަކަށް ރައްޔިތުންގެ މަޖިލީހުގެ ޤަވާއިދަށް ބަދަލު ގެނައުމަށް ކޮމިޓީ އިން ނިންމުމާއި ގުޅިގެނެެވެ.

މިކަމާއި ގުޅިގެން ޢާޒިމާ އިތުރަށް ވިދާޅުވީ ރައީސް އާއި ނައިބު ރައީސް މަޤާމުން އަޒުލުކުރެވޭނީ ރައްޔިތުންގެ މަޖިލީހުގެ ޖުމްލަ މެންބަރުންގެ ތިން ބައިކުޅަ ދެބައި މެންބަރުންގެ އަޣްލަބިއްޔަތުން ކަމަށެވެ.

އެގޮތުން “ވޯޓް އޮފް ނޯ ކޮންފިޑެންސް” އާއި “އިމްޕީޗްމެންޓް” ތަފާތު ނޭނގޭ ބަޔަކު، ޤަވާއިދަކުން ދުސްތޫރު ބަދަލުކުރަން ހިފީމާ އެނގެނީ ޤާނޫނީ ވިސްނުމުގެ ބަލިކަށިކަން ކަމުގައި ޢާޒިމާ ވިދާޅުވިއެވެ.

އެ ޤަވާއިދަށް ބަދަލު ގެނައުމަށް ބޭއްވި ކޮމިޓީ ބައްދަލުވުމުގައި ރައީސް އާއި ނައިބު ރައީސް އަޒުލްކުރުމާއި، މަޖިލީހުގެ މެންބަރުގެ ޢަދަދު ގުނާނެ ގޮތުގެ ޤަވާއިދަށް މުހިންމު ނިންމުންތަކެއް ނިންމައިފައިވެއެވެ.

މިގޮތުން އިހަވަންދޫ ދާއިރާގެ މެންބަރު މުޙައްމަދު ޝިފާޢު ވަނީ މަޖިލީހުގެ މެންބަރުންގެ ޢަދަދު ގުނާއިރު، މެންބަރުން އިސްތިއުފާ ދިނުމުން ނުވަތަ އެނޫންވެސް ސަބަބަކާއި ހުރެ ހުސްވެފައިވާ ގޮނޑިތަކާ ނުލައި މެންބަރުންގެ ޢަދަދު ގުނުމަށް ހުށަހަޅުއްވާފައެވެ.

ފެށިގެން މިދާ އައު ސަރުކާރުގެ އިސް މަޤާމުތަކާއި ހަވާލުވެވަޑައިގެންނެވުމަށް  ޕީޕީއެމް/ޕީއެންސީގެ ބައެއް މެންބަރުން ވަނީ އިސްތިިއުފާ ދެއްވައިފައެވެ. އެއާއެކު، މަޖިލީހުގެ މެންބަރުންގެ އަދަދު މިހާރު 80 އަށް މަދުވެފައިވާއިރު، މެންބަރުންގެ ޖުމުލަ ޢަދަދަކީ 87 ކަމަށް އަދިވެސް ދަނީ ބަލަމުންނެވެ.

ރައްޔިތުންގެ މަޖިލީހުގެ ޤަވާއިދުގެ އޮތް ގޮތާއި، 19 ވަނަ މަޖިލީހުގެ މިހާތަނަށް ޢަމަލުކުރެވެމުން ވެސް އަންނަ ގޮތުން، މަޖިލީހުގެ މެންބަރުންގެ ޖުމްލަ ޢަދަދު ގުނާނީ އެ ދައުރެއްގެ ޖުމްލައަށް ބަލައިގެންނެވެ.

ނަމަވެސް މި ޤަވާއިދު ބަދަލުކުރުމަށް މެންބަރު ޝިފާޢު ވަނީ ހުށަހަޅުއްވައިފައެވެ.

އެގޮތުން ޝިފާޢުގެ ހުށަހެޅުއްވުމާއެކު ކޮމިޓީއިން ގެެނެސްފައިވާ ބަދަލުތަކަކީ:

• ގަވާއިދުގެ ބޭނުމަށްޓަކައި މަޖިލީހުގެ ޖުމްލަ މެންބަރުންގެ އަދަދު ގުނުމުގައި ބަލާނީ އެ ވަގުތު މަޖިލީހުގެ މެންބަރުކަމުގައި ދެމިތިބި މެންބަރުންގެ ޖުމްލަ ޢަދަދަށް ކަން

• މަޖިލީހުގެ ގޮނޑިއެއް ހުސްވެއްޖެ ނަމަ، އެ ގޮނޑިއަށް މެންބަރަކު އިންތިޚާބުކުރުމާ ހަމައަށް މަޖިލީހުގެ ޖުމްލަ މެންބަރުންގެ ޢަދަދު ގުނާއިރު ހުސްވި އެ ދާއިރާގެ ގޮނޑި ނުގުނުން

ޝިފާއު ހުށަހެޅުއްވި މި އިސްލާޙުތައް ފާސްވެއްޖެނަަމަ ދެން މަޖިލީހުގެ މެންބަރުންގެ ޢަދަދު ގުނާނީ 80 އިންނެވެ. އެހެން ވެއްޖެ ކަމަށްވާނަމަ ރައީސް އާއި ނައިބު ރައީސް އަޒުލްކުރުމަށް ބޭނުންވާނީ 54 މެންބަރުންނެވެ. ރައްޔިތުންގެ މަޖިލީހުގައި އެމްޑީޕީއަށް ނިސްބަތްވާ 55 މެންބަރަކު މިހާރުވެސް އެބަ ތިއްބެވިއެވެ.

ނަމަވެސް، ޤާނޫނު އަސާސީގެ 71 ވަނަ މާއްދާގައި ކަނޑައަޅާފައިވާ އުސޫލުގެ ދަށުން މި ހިނގާ 19 ވަނަ ރައްޔިތުން މަޖިލީހުގެ ޖުމްލަ މެންބަރުންގެ އަދަދަކީ 87 އެވެ.

އަދި މަޖިލީހުގެ ޤަވާއިދަށް ގެނެވޭ އިސްލާހެއް މެދުވެރިކޮށް ޤާނޫނު އަސާސީގައި ސާފުކޮށް ބަޔާންކޮށްފައިވާ މާއްދާއަކަށް މުޅިން އައު މާނަކުރުމެއް މަޖިލީހުގެ މެންބަރުންނަކަށް ނުގެނެވޭނެ ކަމަށް ހަމަ އެ ޤާނޫނު އަސާސީގައި ވާއިރު، އެކަން ކުރުމުގެ ބާރުލިބެނީ ޤާނޫނުއަސާސީގެ 274 ވަނަ މާއްދާއިން ހަމައެކަނި ސުޕްރީމް ކޯޓަށްކަމަށް ވެސް ވެއެވެ.