ޣައްޒާއިން ރިޕޯޓް ކުރާ އަލްޖަޒީރާގެ ކެެމެރާމެން ސަމަރް އަލް ދައްޣާ އިޒްރާއިލުން ޝަހީދުކޮށްލައިފިއެވެ.

އިޒްރާއިލުން ޚާންޔޫނިސް އަށް ދިން ހަމަލާއެއްގައި ސަމަރް އަބޫ ދައްޣާ ޝަހީދުވެފައިވާއިރު އޭނާއާއެކު އެވަގުތު މަސައްކަތް ކުރަމުންދިޔަ އަލްޖަޒީރާގެ ރިޕޯޓަރު ވާއިލް އަލްދަޙްދޫޙް އަށްވެސް ވަނީ އެކިވަރުގެ އަނިޔާތައް ލިބިފައި ކަމަށް އަލްޖަޒީރާގައި ބުނެފައިވެއެވެ.

އަބޫދައްޣާ ޝަހީދުވި ހަަމަލާ އިޒްރާއިލުން ދީފައިވަނީ ޚާން ޔޫނިސްގެ ފަރްޙާާނާ ސްކޫލަށެވެ.

ހަމަލާއާއި ގުޅިގެން އަބޫ ދައްޣާ އަށް ވީ އަނިޔާ ނުވަތަ އޭނާއަށް ފަރުވާ އެއް ދިނުމަށް އޭނާ އާއި ހިސާބަށް ފޯރުމަށް އަވަސް ފަރުވާދޭ ފަރާތްތަކަށް ފުރުސަތެއް ނުލިބުނެވެ. ސަބަބަކީ ހުއްޓުމެއް ނެތި އިޒްރާއިލުން އެތަނަށް ބޮން އަޅަމުން ދިޔުމެވެ.

މީހުން ސަލާމަތް ކުރާ މީހުންނަށް އަބޫ ދައްޣާއާއި ހިސާބަށް ވާސިލް ވެވުނު އިރު އޭނާ ވަނީ ޝަހީދުވެފައި ކަމަށް އަލްޖަޒީރާގައި ބުނެފައިވެއެވެ. އަބޫ ދައްޣާ އާއެކު އެސަރަހައްދުގައި ހަރަކާތްތެރިވަމުން ދިޔަ ވާއިލް އަލްދަޙްދޫޙްގެ އަތަށް ވަނީ ތޫނު އެއްޗެއް ހެރުމުގެ ސަބަބުން ޒަޚަމްވެފައެވެ. އޭނާ ވަނީ ނައްސިރް ހޮސްޕިޓަލަށް ގެންގޮސް ފަރުވާ ދޭން ފަށާފައެވެ.

މަންޒަރު ދުށް އެހެން މީހުންވެސް އެތަނަށް އެވަގުތު ދެމުން ދިޔަ ވަރުގަދަ ހަމަލާތަކުގެ ވާހަކަތައް ދައްކައިފައިވެއެވެ.

އިޒްރާއިލްގެ ހަމަލާގައި ސަމަރް އަބޫދައްޣާ ޝަހީދުކޮށްލުމާއި އެކު އަލްޖަޒީރާއިން ވަނީ އެކަން ކުށްވެރިކޮށް ހިތާމަ ފާޅުކޮށްފައެވެ. އަދި އަލްޖަޒީރާއިން ވަނީ އިންސާފަށް އެދި ގޮވައިލައިފައެވެ.

އިޒްރާއިލްގެ ހަމަލާތަކުގައި މިހާތަނަށް ފަލަސްޠީނުން އެކި އެކި ނޫސްތަކަށް މަސައްކަތް ކުރާ، ފަަލަސްޠީނުގެ 59 ނޫސްވެރިޔަކު ވަނީ ޝަހީދު ކޮށްލައިފައެވެ.