އަޒުލުކުރުމުގެ އުސޫލަށް ގެނައި އިސްލާޙަކީ ރައްޔިތުން ގެނައި ވެރިކަަމަށް ބިރުދެއްކުމަށް ހިންގާ އަމަލެއް ކަމަށް ވެލިދޫ ދާއިރާގެ ކުރީގެ މެމްބަރު ޔާމިން ރަޝީދު ވިދާޅުވެއްޖެއެވެ.

ޔާމިން މިހެން ވިދާޅުވީ އެކްސްގައި އެނާ ކުރެއްވި ޕޯސްޓެއްގައެވެ. 

ޔާމިން ވިދާޅުވެފައިވަނީ ރައީސް އާއި ނައިބު ރައީސް އަޒުލުކުރުމުގެ އުސޫލަށް ގެނައި އިސްލާހަކީ، ޤާނޫނު އަސާސީ އާއި ބީރަށްޓެހި، އުސޫލީ ހަމަތަކަށް ގޮންޖަހާ، ރައްޔިތުން ގެނައި ވެރިކަމަށް ބިރުދެއްކުމަށް ހިންގާ އަމަލެއް ކަމަށެވެ.

“މަޖިލީހުގެ ތަޅުމުން އެގޮތަށް ނިއްމައިފިނަމަ، ޤައުމުގެ ސިޔާސީ ހަމަޖެހުން ގެއްލިގެންދާނެ” ޔާމިން ވިދާޅުވެފައިވެއެވެ.

ޔާމިން މިހެން ވިދާޅުވެފައިމިވަނީ 19 ވަނަ ރައްޔިތުންގެ މަޖިލީހުގައި މިވަގުތު ތިބި އިދިކޮޅު މައި ޕާޓީ އެމްޑީޕީގެ މެމްބަރުންގެ އަޣްލަބިއްޔަތުން އިންތިޚާބީ ރައީސާއި ނައިބު ރައީސް އަޒުލް ކުރެވޭނެ ފަދަ ގޮތަކަށް ރައްޔިތުންގެ މަޖިލީހުގެ ޤަވާއިދަށް ބަދަލު ކުރުމަށް ކޮމިޓީ އިން ނިންމުމާއި ގުޅިގެނެެވެ.

އެ ޤަވާއިދަށް ބަދަލު ގެނައުމަށް ބޭއްވި ކޮމިޓީ ބައްދަލުވުމުގައި ރައީސް އާއި ނައިބު ރައީސް އަޒުލްކުރުމާއި، މަޖިލީހުގެ މެންބަރުގެ ޢަދަދު ގުނާނެ ގޮތުގެ ޤަވާއިދަށް މުހިންމު ނިންމުންތަކެއް ނިންމައިފައިވެއެވެ.

މިގޮތުން އިހަވަންދޫ ދާއިރާގެ މެންބަރު މުޙައްމަދު ޝިފާޢު ވަނީ މަޖިލީހުގެ މެންބަރުންގެ ޢަދަދު ގުނާއިރު، މެންބަރުން އިސްތިއުފާ ދިނުމުން ނުވަތަ އެނޫންވެސް ސަބަބަކާއި ހުރެ ހުސްވެފައިވާ ގޮނޑިތަކާ ނުލައި މެންބަރުންގެ ޢަދަދު ގުނުމަށް ހުށަހަޅުއްވާފައެވެ.

ރައްޔިތުންގެ މަޖިލީހުގެ ޤަވާއިދުގެ އޮތް ގޮތާއި، 19 ވަނަ މަޖިލީހުގެ މިހާތަނަށް ޢަމަލުކުރެވެމުން ވެސް އަންނަ ގޮތުން، މަޖިލީހުގެ މެންބަރުންގެ ޖުމްލަ ޢަދަދު ގުނާނީ އެ ދައުރެއްގެ ޖުމްލައަށް ބަލައިގެންނެވެ.

ނަމަވެސް މި ޤަވާއިދު ބަދަލުކުރުމަށް މެންބަރު ޝިފާޢު ވަނީ ހުށަހަޅުއްވައިފައެވެ.

ޝިފާއު ހުށަހެޅުއްވި މި އިސްލާޙުތައް ފާސްވެއްޖެނަަމަ ދެން މަޖިލީހުގެ މެންބަރުންގެ ޢަދަދު ގުނާނީ 80 އިންނެވެ. އެހެން ވެއްޖެ ކަމަށްވާނަމަ ރައީސް އާއި ނައިބު ރައީސް އަޒުލްކުރުމަށް ބޭނުންވާނީ 54 މެންބަރުންނެވެ. ރައްޔިތުންގެ މަޖިލީހުގައި އެމްޑީޕީއަށް ނިސްބަތްވާ 55 މެންބަރަކު މިހާރުވެސް އެބަ ތިއްބެވިއެވެ.

ނަމަވެސް، ޤާނޫނު އަސާސީގެ 71 ވަނަ މާއްދާގައި ކަނޑައަޅާފައިވާ އުސޫލުގެ ދަށުން މި ހިނގާ 19 ވަނަ ރައްޔިތުން މަޖިލީހުގެ ޖުމްލަ މެންބަރުންގެ އަދަދަކީ 87 އެވެ.

އަދި މަޖިލީހުގެ ޤަވާއިދަށް ގެނެވޭ އިސްލާހެއް މެދުވެރިކޮށް ޤާނޫނު އަސާސީގައި ސާފުކޮށް ބަޔާންކޮށްފައިވާ މާއްދާއަކަށް މުޅިން އައު މާނަކުރުމެއް މަޖިލީހުގެ މެންބަރުންނަކަށް ނުގެނެވޭނެ ކަމަށް ހަމަ އެ ޤާނޫނު އަސާސީގައި ވާއިރު، އެކަން ކުރުމުގެ ބާރުލިބެނީ ޤާނޫނުއަސާސީގެ 274 ވަނަ މާއްދާއިން ހަމައެކަނި ސުޕްރީމް ކޯޓަށްކަމަށް ވެސް ވެއެވެ.