ފޯނުން ކޯޓު އަމުރު ދެއްކުމަށް ފަހު އަމުރުގެ ކޮޕީއެއް ހަވާލު ނުކުރުމުގެ ސަބަަބުން ހައްޔަރުން ދޫކޮށްލަން ޖެހުނު މީހާ އަނެއްކާވެސް ހައްޔަރުކޮށްފިއެވެ. 

400,000 ރުފިޔާގެ އަގުހުރި މުދާ ވަގަށް ނެގި މައްސަލައިގައި ހައްޔަރު ކުރި 39 އަހަރުގެ މި މީހާ އެންމެ ފުރަތަމަ ހައްޔަރުކޮށްފައި ވަނީ، ހުއްދަ ނޫން ތަނަކަށް ވަދެ، މުދަލަށް ގެއްލުން ދިނުމާއި ވައްކަމުގެ ތުހުމަތަށް ކޯޓު އަމުރެއްގެ ދަށުން މިދިޔަ ހުކުރު ދުވަހުގައެވެ. 

އެހެންނަމަވެސް އޭނާގެ ބަންދާ މެދު ގޮތެއް ނިންމުމަށް ހުކުރު ދުވަހު ކޯޓަށް ހާޒިރު ކުރުމުން، ހައްޔަރު ކުރި އިޖުރާއަތް ގޯސް ކަމަށް ކަނޑައަޅައި އެ ކޯޓުންވަނީ އޭނާ މިނިވަންކޮށްފައެވެ. 

އޭނާ ހައްޔަރު ކުރި އިޖުރާއަތު ގޯސްކަމުގައި ކޯޓުން ކަނޑައެޅީ,ޖިނާއީ އިޖުރާތުގެ ގާނޫނުގައި ބަޔާންކޮށްފައިވާ ގޮތަށް އޭނާ ހައްޔަރު ކުރި އިރު، ކޯޓު އަމުރު ހަވާލު ނުކުރުމެވެ. 

އެހެން ނަމަވެސް އަލުން އޭނާ ހައްޔަރުކޮށް، ބަންދާ މެދު ގޮތެއް ނިންމުމަށް އިއްޔެ ކޯޓަށް ހާޒިރު ކުރުމުން ކްރިމިނަލް ކޯޓުގެ ޤާޒީ އިބްރާހިމް ޒިހުނީ ވަނީ ދެ ވަނަ ފަހަރަށް ހައްޔަރު ކުރި ގޮތް ރަނގަޅު ކަމަށް ކަނޑައަޅައި އޭނާ ބަންދަށް 10 ދުވަސް ޖަހާފައެވެ. 

އަދި އެނާގެ މައްޗަށް ތުހުމަތު ކުރެވޭ ކުށް ކުރި ކަމަށް ތުހުމަމތުކުރެވޭ މިންވަރަށް ހެއްކާއި ގަރީނާ ހުށަހަޅާފައިވާ ކަމަށް އެ ކޯޓުގެ އަމުރުގައި ބުނެފައިވެއެވެ. 

އެގޮތުން މި މައްސަލައިގެ ޝަރީއަތަކަށް ފުލުހުން ވަނީ ސީނަށް ދިޔަ ފުލުހުންގެ ބަޔާނާއި ހެކިންނާއި ތުހުމަތު ކުރެވޭ އިތުރު މީހުންގެ ބަޔާން ހިމެނޭހެން މައްސަލައާ ގުޅުން ހުރި ސީސީޓީވީގެ މަންޒަރުތައް ވެސް ހުށަހަޅައިފައެވެ. 

ކްރިމިނަލް ކޯޓުގައި ކުރިއަށްދިޔަ ބަންދުގެ އަޑުއެހުމުގައި އޭނާ ބުނެފައިވާ ގޮތުން ފުލުހުން އޭނާ ހައްޔަރު ކުރީ އަނިޔާ ކުރުމަށް ފަހުއެވެ. 

މީގެ އިތުރުން އޭނާގެ އަންހެނުން އުޅެނީ ވިހައިގެން ކަމަށާއި އަޅާލާނެ އިތުރު މީީހަކު ނުހުންނާނެ ކަމަށްވެސް އަޑުއެހުމުގައި އޭނާ ވަނީ ބުނެފައެވެ.