ސުލޫކީ މިންގަނޑާ ހިލާފުވާ ވަކީލުންގެ މައްސަލަ، ބާ ކައުންސިލުގެ އަމިއްލަ އިސްނެގުމުގެ މަތިން ބެލުމުގައި އަމަލު ކުރާނެ އިޖުރާއަތު ކަނޑައަޅާ އެ އުސޫލު ގެޒެޓު ކޮށްފިއެވެ.
ގާނޫނީ ވަކީލުންގެ ނަޒާހަތްތެރިކަން ކަށަވަރުކުރުމަށާއި ގާނޫނީ ވަކީލުންގެ ފަރާތުން މަސައްކަތުގެ ދާއިރާގައި ހިފަހައްޓަންޖެހޭ ސުލޫކީ މިންގަނޑާ ހިލާފަށް ކުރާ ކަންތައްތަކަށް ފާރަވެރިވުމަށް އެކުލަވާލި މި އުސޫލު ގެޒެޓްކޮށްފައިވަނީ، "އަމިއްލަ އިސްނެގުމުގެ މަތިން ސުލޫކީ މައްސަލަ ބެލުމާ ބެހޭ އުސޫލު" ގެ ނަމުގައެވެ.
މި އުސޫލު އެކުލަވާލުމުގެ މަގުސަދުގެ ގޮތުގައި ހިމަނާފައިވާ ކަންކަމުގެ ތެރޭގައި، އާންމު މަޞްލަޙަތާ ގުޅުންހުރި މައްސަލަތަކުގައި މީސްމީޑިއާއާއި އެހެނިހެން ޕްލެޓުފޯމުތަކުގައި ޤާނޫނީ ވަކީލަކު ދައްކާ ވާހަކައަކުން ނުވަތަ ޝާއިޢުކުރާ ލިޔުމަކުން ނުވަތަ ފޮޓޯއަކުން ޤާނޫނީ ފަންނުގެ ދާއިރާގެ އިތުބާރު ގެއްލޭ ފަދަ ޢަމަލެއް ކޮށްފިކަމަށް ތުހުމަތުކުރެވޭނަމަ، އެފަދަ ފަރާތެއްގެ މައްސަލައެއް ބާ ކައުންސިލުގެ އަމިއްލަ އިސްނެގުމުގެ މަތިން ބަލައި ފިޔަވަޅު އަޅަންޖެހޭ ފަރާތްތަކާމެދު ފިޔަވަޅު އެޅުމާއި ފަންނުގެ ނަޒާހާތްތެރިކަން ދެމެހެއްޓުމުގެ ގޮތުން ކުރަންޖެހޭ އެންމެހައި ކަންކަން ކުރުން ހިމެނެއެވެ.
މިއަދު އެކުލަވާލީ މި އުސޫލުގެ ދަށުން ގާނޫނީ ވަކީލެއްގެ ހުއްދަ، ބާ ކައުންސިލުން ހިފަހައްޓާފައި ވަނިކޮށް، ގާނޫނީ ހިދުމަތް ފޯރުކޮށްދިނުމާއި ކޯޓުތަކުގައި ތަމްސީލުކުރަމުންދާ ފަރާތްތައް ދެނެގަތުމާއި ދާއިރާގެ އިތުބާރު ގެއްލޭ ފަދަ އަމަލެއް ކޮށްފި ކަމަށް ތުހުމަތު ކުރެވޭނަމަ، އެފަދަ މައްސަލައެއް ބާ ކައުންސިލުގެ އަމިއްލަ އިސްނެގުމުގެ މަތިން ބަލައި ފިޔަވަޅު އެޅޭނެއެވެ.
އެގޮތުން އަމިއްލަ އިސްނެގުމުގެ މަތިން ބާ ކައުންސިލުން މައްސަލަތައް ބެލުމުގައި, ރާއްޖޭގެ ގާނޫނީ ފަންނު، ގާނޫނީ ވަކީލުންގެ ސުލޫކީ ގަވާއިދު، ޕަބްލިކް ނޯޓަރީއެއްގެ ގޮތުގައި މަސައްކަތް ކުރުމުގެ ގަވާއިދު، އަސްލާ އެއްގޮތް ކަމުގެ ތައްގަނޑު ޖެހުމާ ބެހޭ ގަވާއިދު އަދި ގާނޫނީ ވަކީލުން އަމަލުކުރުމަށް، ބާ ކައުންސިލުން އެކުލަވާލާފައިވާ ގަވާއިދަށް ރިއާޔަތް ކުރުމަށް މިއަދު އެކުލަވާލީ އުސޫލުގައި ވަނީ ހިމަނައިފައެވެ.
ބާ ކައުންސިލްގެ އަމިއްލަ އިސް ނެގުމަށް، މައްސަލައެއް ބެލުމާ މެދު ގޮތެއް ނިންމާނީ ބާ ކައުންސިލްގެ އެގްޒެކްޓިވް ކޮމެޓީގެ ބައްދަލުވުމަކުންނެވެ.
އަދި ރިއާޔަތް ކުރުމަށް ނިންމާފައިވާ ގަވާއިދުތަކުގައި ހިމެނިފައި ނުވާ ކަމެއްގައި ގޮތެއް ނިންމަން ޖެހިއްޖެ ނަމަ، އެކަން ވެސް ކަނޑައަޅާނީ ބާ ކައުންސިލްގެ އެގްޒެކްޓިވް ކޮމެޓީއަކުން ކަމަށް ވެސް އުސޫލުގައިވެއެވެ.
Advertisement
This content is created and paid for by advertisers and does not involve Voice Journalists
