ފުލުހުންގެ އިސްވެރިނަށް ދޭން ނިންމި ޕްރޮމޯޝަންތައް ހުއްޓުވުމަށް އޭސީސީއަށް އަމަުރު ދެވެން ނެތް ކަމަށް ސިވިލް ކޯޓުން ބުނެފިއެވެ.

ފުލުހުންގެ ބައެއް އިސްވެރިނަށް ދޭން ނިންމި ޕްރޮމޯޝަން ދިނުން ހުއްޓުވުން އެދި އޭސީސީ އިން ސިވިލް ކޯޓަށް ހުށައެޅީ މި މަހުގެ ހަތްވަނަ ދުވަހުއެވެ.

އޭސީސީއިން ސިވިލް ކޯޓަށް ހުށައެޅި މައްސަލައިގައިވަނީ ފުލުހުންގެ ތެރެއިން ބައެއް އިސްވެރިން މަޤާމުގެ ނުފޫޒު ބޭނުންކޮށްގެން އެ އިދާރާގެ ވަކި މުވައްޒަފުން ތަކަކަށް ނާޖާއިޒް ފައިދާ ހޯދައިދިނުމުގެ ގޮތުން މަޤާމުގެ ކުރިއެރުން ހޯދަން އުޅޭ ކަމަށެވެ.

އެއާއި އެކު އެކޮމިޝަނުން އެކަންތަކުގެ ތަހްޤީޤް އެކޮމިޝަނުން ފަށައި ފައިވާ ކަމަށާއި، އަދި އެކޮމިޝަނުން ވަކި ގޮތެއް އަންގަންދެން އެކަން ހުއްޓުވުމުގެ ވަގުތީ އަމުރަކަށް އެކޮމިޝަނުން ވަނީ އެދިފައެވެ.

ނަމަވެސް އެކޮމިޝަންގެ އެއެންގުމަކީ ޤާނޫނީ އިމުގެ ބޭރުން އަންގައިފައިވާ އެންގުމެއް ކަމަށް ބުނެ ފުލުހުން އޭސީސީގެ އަމުރަށް ޢަމަލުކުރުމެއް ނެތި ފުލުހުން އެފަރާތްތްކަށް މަޤާމުގެ ކުރިއެރުން ދީފައިވާ ކަމަށް ވަނީ އޭސީސީއިން ބުނެފައެވެ.

އަދި މިކަމާއި ގުޅިގެން އޭސީސީއިން އެދުނީ މައްސަލައިގައި ޝަރީއަތުން ވަކިގޮތެއް ކަނޑައެޅެންދެން، ޕްރޮމޯޝަންގެ ކަންކަން ތަންފީޒުކުރުމަށް ކުރަންޖެހޭ ކަންކަން ކުރިއަށް ނުގެންގޮސް މަޑުޖައްސާލުމުގެ އަމުރަކަށެވެ.

އޭސީސީގެ މި ދަޢުވާތަކަށް ޖަވާބުދެމުން ފުލުހުން ބުނެފައިވަނީ ވަގުތީ އަމުރަކަށް އެދޭ ފަރާތަށް ހިމާޔަތް ލިބެން ޖެހޭ މައުޟޫއީ ހައްޤެއް އޮތުމުގެ އިހުތިމާލު ފާޅުކަން ބޮޑު ގޮތެއްގައި ނެތް ކަމަށެވެ.

ވަގުތީ އަމުރެއް ނެރެނުދިނުމުގެ ސަބަބުން، އޭސީސީއަށް ލިބޭނެ އިއާދަ ނުކުރެވޭނެ ގެއްލުމެއް ވެސް ނެތް ކަމަށާއި، ވަގުތީ އަމުރެއް ނެރެނުދީފިނަމަ، އޭސީސީގެ ގެއްލޭ މަސްލަހަތަށްވުރެ ދައުލަތުގެ ރައްކާތެރިކުރެވޭ މަސްލަހަތު ބޮޑުކަމަށް ފުލުހުންގެ ފަރާތުން ބުންޏެވެ.

އެހެންކަމުން އޭސީސީން އެދިފައިވާ ގޮތަށް ވަގުތީ އަމުރެއް ނެރެދެވެން ނެތްކަމަށް ދެކޭ ކަމަށް ފުލުހުންގެ ފަރާތުން ބުނެފައިވެއެވެ.

ދެފަރާތުގެ ވާހަކަތައް އަޑުއެއްސެވުމަށް ފަހު މައްސަލަ ބެއްލެވި ގާޒީ ޢަލީ ޢަބްދުالله ވިދާޅުވެފައިވަނީ އޭސީސީއިން އެދިފައިވާހެން ވަގުތީ އަމުރެއް ނެރެދެވެން ނެތް ކަމަށެވެ.

ގާޒީ ޢަލީ ޢަބްދުالله ވިދާޅުވީ ކޯޓަށް ހުށަހެޅިފައިވާ ދައުވާއެއްގައި ކޯޓުން ގޮތެއް ކަނޑައެޅުމުގެ ކުރިޔަށް ވަގުތީ ފަރުވާއެއް ހޯދައިދިނުމުގެ ގޮތުން ނުވަތަ ވަގުތީ ރައްކާތެރިކަމެއް ހޯދައިދިނުމުގެ ގޮތުން ވަގުތީ އަމުރެއް ނެރެވިދާނެ ކަމަށެވެ.

ހަމަމިއާއި އެކު އަވަސް މައްސަލައެއްގެ ގޮތުގައި ވަގުތީ އަމުރެއް ނެރެދިނުމަށް، ވަގުތީ އަމުރަށް އެދޭ ފަރާތުން އެދިފައިވާ އެދުމުގެ މައްޗަށް ބަލާއިރު އަވަސް މައްސަލައެއްގެ ގޮތުގައި ވަގުތީ އަމުރަކަށް އެދޭނަމަ، އަމުރަށް އެދޭ ފޯމު ހުށަހަޅާއިރު، ކޯޓުން ނެރެދޭންވީ އަމުރުގެ އިބާރާތެއް އޮންނަން އެދޭގޮތް ބަޔާންކުރާ ލިޔުމެއް ހިމަނަންވާނެ ކަމަށާއި އަދި އެ ލިޔުމުގެ ސްފޮޓު ކޮޕީ ކޯޓަށް ހުށަހަޅަންވާނެ ކަމަށްވެސް ގާޒީ ވަނީ ވިދާޅުވެފައެވެ.

ވަގުތީ އަމުރަށް އެދޭ ފަރާތުން ކޯޓު އަމުރު އޮންނަން އެދޭ ގޮތް ބަޔާންކުރާ ލިޔުމާއި އަދި އެ ލިޔުމުގެ ސޮފްޓު ކޮޕީ ކޯޓަށް ހުށަހަޅާފައިނުވާ ކަމަށްވެސް ގާޒީ ވަނީ ވިދާޅުވެފައެވެ.

އޭސީސީއަށް ހުށަހަޅާ މައްސަލައެއްގެ ތަހުޤީޤު ކުރުމަށްފަހު، ތުހުމަތުވާ ފަރާތަށް ދެކޮޅަށް އެކަށީގެންވާ ހެކި ލިބިއްޖެނަމަ ދައުވާކުރަން ޕްރޮސިކިއުޓާ ޖެނެރަލް އޮފީހަށް ފޮނުވަން ވާނެ ކަމަށް ވެސް ގަޒީ ވިދާޅުވިއެވެ.

އޭސީސީން، ފުލުހުންގެ ޚިދުމަތުގެ މައްޗަށް އެންގި އެންގުމަށް، ފުލުހުންގެ ޚިދުމަތުން ޢަމަލު ނުކުރުމަކީ ވަގުތީ އަމުރަށް އެދޭ ފަރާތަށް އެންޓި ކޮރަޕްޝަން ކޮމިޝަންގެ ޤާނޫނުން ދީފައިވާ ތަހުޤީގު ކުރުމުގެ ބާރަށް ހުރަސް އެޅިގެންދާ ކަމަކަށް ނުވާތީ، ވަގުތީ އަމުރުތައް ނެރުމުގައި ކޯޓުން ފުރިހަމަވޭތޯ ބަލަން ޖެހޭ ކަމަށް ކަނޑައަޅުއްވާފައިވާ އާންމު ތިން ޝަރުތު، ވަގުތީ އަމުރަށް އެދޭ ފަރާތުގެ ކިބައިގައި ފުރިހަމަވެފައި ނުވާކަން އެނގޭ ކަަމަށްވެސް ގާޒީ ވަނީ ވިދާޅުވެފައެވެ.

މިހުރިހާ ކަމަކަށް ރިޢާޔަތް ކުރެއްވުމަށް ފަހު ގާޒީ ނިންމެވީ އޭސީސީއިން އެދުނު ފަދައިން ވަގުތީ އަމުރެއް ނެރެދެވެން ނެތް ކަމަށެވެ.