ގިނަ ބަޔަކު ވަޒީފާއަށް ސަލާން ޖަހަމުންދާ ދަނޑިވަޅެއްގައި މެމްބަރުންގެ މުސާރަ ބޮޑުކުރުން މާލޭގެ މޭޔަރު ކަމަށް ވެރިކަން ކުރާ ކޯލިޝަންގެ ފަރާތުން ވާދަކުރައްވާ ޢާއިޝަތު ޢާޒިމާ ޝަކޫރު ކުށްވެރިކުރައްވައިފި އެވެ.

ޢާޒިމާ މިހެން ވިދާޅުވީ އޭނާ މިއަދު ކުރެއްވެވި ޓްވީޓެއްގައެވެ.

ޢާޒިމާ ވިދާޅުވީ މަޖިލީހުގެ މުސާރަ މިދަނޑިވަޅުގައި ބޮޑުކުރުމަކީ ދިވެހި ދައުލަތް އިތުރަށް ދަރުވާލުމަށް ހިންގޭ ނާތަހުޒީބު އަމިއްލައެދުންބޮޑު މުޑުދާރު ޢަމަލެއް ކަމަށެވެ.

“ދިވެހީންގެ އެތަށްބަޔަކު ވަޒީފާއަށް ސަލާންޖަހަމުންދާ މިދަނޑިވަޅުގައި އަމިއްލައަށް މެންބަރުން އެމީހުންގެ މުސާރަބޮޑުކުރުން ކުށްވެރިކުރަން” ކުރީގެ ބަންޑާރަ ނައިބު ޢާޒިމާ ވިދާޅުވެފައިވެއެވެ.

ޢާޒިމާ މިހެން ވިދާޅުވެފައި މިވަނީ ރައްޔިތުންގެ މަޖިލީހުން މުސާރަ ކަނޑައަޅާ މަގާމުތަކުގެ މުސާރަ ބޮޑުކުރުމުގެ ކަންކަން އިއްޔެ މާލިއްޔަތު ކޮމިޓީގައި ކުރިއަށް ގެންގޮސް ފައިވާ ދަނޑިވަޅެއްގައެވެ.

މި ކޮމިޓީ ކުރިއަށް ދިޔައިރު އެންމެ ފުރަތަމަ ހުށައަޅައިފައިވަނީ އަސާސީ މުސާރައިގެ ގޮތުގައި 57،000ރ. އާއި ލިވިން އެލަވަންސް ގޮތުގައި 82،000 ރުފިޔާ މެންބަރުންނަށް ކަނޑައެޅުމަށެވެ.

ނަމަވެސް ކޮމިޓީގެ މެންބަރުންގެ މެދުގައި އޮފް ދަ ރެކޯޑުގައި ބައެއް މަޝްވަރާއަށް ފަހު އަސާސީ މުސާރަ ވަނީ 55،000ރ. އަށް ބަދަލުކޮށްފައެވެ. މި ބަދަލާ އެކު މާލިއްޔަތު ކޮމިޓީގެ އިއްތިފާގުން ވަނީ މެންބަރުންގެ މުސާރަ 80،000ރ. އަށް ބޮޑުކުރަން ފާސްކޮށްފައެވެ.

އެހެންކަމުން ކޮމިޓީ އެލަވަންސަށް ދޭ 20،000ރ. ހިމަނައިގެން މެންބަރެއްގެ މުސާރައިގެ ގޮތުގައި 100،000 ރުފިޔާ ޖެހެއެވެ.

މިކަމާއި ގުޅިގެން ސިޔާސީ އެކިއެކި ފަރާތްތަކުން އަންނަނީ މިކަމާއި ވަރަށް ބޮޑަށް ފާޑު ވިދާޅުވަމުންނެވެ.