މި ޙާލަތުގައި މުސާރަ ބޮޑުކުރުމަކީ ޤައުމަށް ފައިދާހުރި ކަމެއް ނޫން ކަމަށް ދަނގެތީ ދާއިރާގެ މެމްބަރު މުޙައްމަދު ނާޒިމް ވިދާޅުވެއްޖެއެވެ.

ނާޒިމް މިހެން ވިދާޅުވީ އޭނާ ކުރެއްވެވި ޓްވީޓެއްގައެވެ.

“އަޅުގަނޑު ދެކޭގޮތުގައި ގައުމުގެ އިޤްތިޞާދީ ހާލަތު ދަށް ދުވަސްވަރެއްގައި ދައުލަތުގެ އިސްވެރިންގެ މުސާރަ ބޮޑުކުރުމަކީ ގައުމަށް ފައިދާހުރިގޮތެއް ނޫން” ނާޒިމް ވިދާޅުވެފައިވެއެވެ.

އިތުރަށް ނާޒިމް ވިދާޅުވީ ޚާއްސަކޮށް މަޖިލިސް މެންބަރުންގެ މުސާރަ ބޮޑުކޮށް މެންބަރުން އިތުރުކުރުމަކީ ކަންބޮޑުވާކަމެއް ކަމަށެވެ.

މިގޮތުން މަޖިލީހުގެ މާލިއްޔަތު ކޮމިޓީގެ އަޤްލަބިއްޔަތުން މަޖިލިސް މެންބަރުންގެ މުސާރަ ބޮޑުކުރަން ފާސްކުރިކުރުން މަޖިލީހުގެ ތަޅުމުން ފާސްނުކުރުމަށް ނާޒިމް ވަނީ ގޮވައިލައިފައެވެ.

ނާޒިމް މިފަދައިން ޓްވީޓް ކުރައްވައިފައި މިވަނީ ރައްޔިތުންގެ މަޖިލީހުން މުސާރަ ކަނޑައަޅާ މަގާމުތަކުގެ މުސާރަ ބޮޑުކުރުމުގެ ކަންކަން އިއްޔެ މާލިއްޔަތު ކޮމިޓީގައި ކުރިއަށް ގެންގޮސް ފައިވާ ދަނޑިވަޅެއްގައެވެ.

މި ކޮމިޓީ ކުރިއަށް ދިޔައިރު އެންމެ ފުރަތަމަ ހުށައަޅައިފައިވަނީ އަސާސީ މުސާރައިގެ ގޮތުގައި 57،000ރ. އާއި ލިވިން އެލަވަންސް ގޮތުގައި 82،000 ރުފިޔާ މެންބަރުންނަށް ކަނޑައެޅުމަށެވެ.

ނަމަވެސް ކޮމިޓީގެ މެންބަރުންގެ މެދުގައި އޮފް ދަ ރެކޯޑުގައި ބައެއް މަޝްވަރާއަށް ފަހު އަސާސީ މުސާރަ ވަނީ 55،000ރ. އަށް ބަދަލުކޮށްފައެވެ. މި ބަދަލާ އެކު މާލިއްޔަތު ކޮމިޓީގެ އިއްތިފާގުން ވަނީ މެންބަރުންގެ މުސާރަ 80،000ރ. އަށް ބޮޑުކުރަން ފާސްކޮށްފައެވެ.

އެހެންކަމުން ކޮމިޓީ އެލަވަންސަށް ދޭ 20،000ރ. ހިމަނައިގެން މެންބަރެއްގެ މުސާރައިގެ ގޮތުގައި 100،000 ރުފިޔާ ޖެހެއެވެ.

މިކަމާއި ގުޅިގެން ސޯޝަލް މީޑިއާގައި ގިނަ ބަޔަކު އަންނަނީ ކަންބޮޑުވުން ފާޅު ކޮށް މަޖިލީހުގައި ތިއްބެވި މެމްބަރުންނަށް ފާޑު ވިދާޅުވަމުންނެވެ. އަދި މިނިންމުމަށް ރުހުން ނުދިނުމަށް ސޯޝަލް މީޑިއާގައި ދަނީ މެމްބަރުންނަށް ގޮވައިލަމުންނެވެ.