ރައީސް އާއި ނައިބުރައީސްގެ މުސާރައަަށް އިތުރުކުރާ ބައި ހަދިޔާ ކުރުމަށް ރައީސް ޑރ މުޙައްމަދު މުޢިއްޒު ނިންމެވި ނިންމެވުމަށް ނައިބު ރައީސް ހުސެއިން މުޙައްމަދު ލަޠީފް ތާއީދު ކުރައްވާކަން ހާމަކުރައްވައިފިއެވެ.

މިކަމާއި ގުޅިގެން ނައިބުރައީސް ކުރައްވައިފައިވާ ޓްވީޓެއްގައި ވިދާޅުވެފައިވަނީ ރައީސް، ނާއިބު ރައީސް އަދި ވަޒީރުންގެ މުސާރައަށް މި ގެނައި ބަދަލަކީ އެއްވެސް މަޝްވަރާއަކާ ނުލާ ގެނެވުނު ބަދަލަކަށް ވީހިނދު، އެ މުސާރައިގެ ކުރިއެރުން ކުޑަކުދިންގެ ހިޔާފަދަ އިޖްތިމާޢީ ފަންޑަކަށް ހަދިޔާ ކުރައްވަން ރައީސް ޑރ މުޙައްމަދު މުޢިއްޒު ނިންމެވި ނިންމެވުމަށް ފުރިހަމައަށް ތާޢީދު ކުރަައްވާ ކަމަށެވެ.

މަޖިލީހުން ރައީސް އާއި ނައިބުރައީސް އަދި ވަޒީރުންނާއި މަޖިލީހުގެ މެންބަރުން ހިމެނޭހެން މުސާރަ ބޮޑުކުރުމަށް ކުރެވެން ފެށި މަޝްވަރާތަކާއި އެކު ރައީސް ޑރ މުއިއްޒު ވިދާޅުވެފައިވަނީ މިކަމަކީ ސަރުކާރުން އެދޭ ކަމެއް ނޫން ކަމަށެވެ.

Advertisement

"ރައީސް، ނައިބުރައީސް ވަޒީރުންގެ މުސާރަ ބޮޑު ކުރަން ސަރުކާރުން އެދިފައެއް ނުވާނެ، އަދި ބޮޑު ކުރާކަށް ބޭނުމެއްވެސް ނޫން" ރައީސް ޑރ މުޢިއްޒު ވިދާޅުވެފައިވެއެވެ.

މިކަމާއި ގުޅިގެން ރައްޔިތުންގެ މަޖިލީހުގެ ބައެއް މެންބަރުން ވެސް އެކަމަށް ތާއީދު ނުކުރައްވާނެ ކަމަށް ވިދާޅުވެފައިވެއެވެ. އަދި ރާއްޖޭގެ ސިޔާސީ މަސްރަހުން ފާހަގަކޮށްލެވޭ ގިނަ ބަޔަކު ދަނީ މިކަމާ ގުޅިގެން ފާޑުކިޔަމުންނެވެ.