ރައްޔިތުންގެ މަޖިލީހުގެ މެންބަރުންގެ މުސާރަ ބޮޑުކުރުމުގެ ކުރިން ހާޒިރުނުވާ މެންބަރުންގެ މުސާރައިން ކެނޑޭ އުސޫލު އެކުލަވާލާފައިވާނެކަމަށް ރައްޔިތުންގެ މަޖިލީހުގެ ހެންވޭރު ދެކުނު ދާއިރާގެ މެންބަރު ހުސެއިން ޝަހީމް (އަނދުން ހުސެއިން) ވިދާޅުވެއްޖެ އެވެ. 

އޭނާ މިފަދައިން ވިދާޅުވެފައި ވަނީ ރައްޔިތުންގެ މަޖިލީހުގެ މެންބަރުންގެ މުސާރަ ބޮޑުކުރުމަށް މާލިއްޔަތު ކޮމިޓީން ނިންމުމާއި ގުޅިގެން ފާޑުކިޔުންތައް އަމާޒުވާން ފެށުމުން އެމްޑީޕީގެ ޕާލަމެންޓްރީ ގުރޫޕުގެ ފަރާތުން ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުންނެވެ. 

މެންބަރު ހުސެއިން ވިދާޅުވީ ރައްޔިތުންގެ މަޖިލީހުން ކަނޑައަޅާ މުސާރަތައް ބޮޑުކުރީ ފަހަރެއްގައި ވެސް ރައްޔިތުންގެ މަޖިލީހުގެ މެންބަރުންގެ އަމިއްލަ މަސްލަހަތު އިސްކޮށް، މެންބަރުންނަށް މާލީ މަންފާތަކެއް ހޯދައިދިނުމުގެ ބޭނުމުގައި ނޫން ކަމަށެވެ. 

އެގޮތުން އެމްޑީޕީން އެންމެ ފުރަތަމަ މަސައްކަތްކުރީ މަޖިލީސް މެންބަރުން ޒިންމާދާރު ކުރުވުމަށް ކަމަށާއި އެގޮތުން މުސާރަ ބޮޑުކުރުމުގެ ކުރިން، މަޖިލީހަށް އަދި ކޮމިޓީތަކަށް ގަވާއިދުން ހާޒިރުނުވާނަމަ، މެންބަރުންގެ މުސާރައިން ކެނޑޭ އުސޫލު އެމްޑީޕީ މެޖޯރިޓީން އެކުލަވާލާފައި އޮންނާނެކަމަށް އޭނާ ވިދާޅުވި އެވެ. 

މެންބަރު ހުސެއިން ވިދާޅުވީ މުސާރަ ބޮޑުކުރުމަކީ ސިޔާސީ ބޭފުޅުންނަށް މަންފާ ހޯދައިދިނުމަށް ކުރެއްވިކަމެއްގެ ގޮތުގައި އެއްވެސް ރައްޔިތަކު ނުދެކުމަށް އެދިވަޑައިގަންނަވާ ކަމަށެވެ. 

ރައްޔިތުންގެ މަޖިލީހުގެ މެންބަރުންގެ މުސާރަ ބޮޑުކުރުމަށް ކޮމިޓީގެ އަޣުލަބިއްޔަތުން ނިންމި ނިންމުމާއި ގުޅިގެން އެމްޑީޕީއަށް ފާޑުކިޔުން އަމާޒުކުރަމުންދަނީ މިވަގުތު މަޖިލިސް މެޖޯރިޓީ ޕާޓީއަކީ އެމްޑީޕީކަމަށް ވާތީކަން ފާހަގަކުރައްވާ މެންބަރު ހުސެއިން އިތުރަށް ވިދާޅުވީ އެ ނިންމުމަކީ ސަރުކާރަށް ވެސް އެއްބާރުލުން ދިނުމުގެ ގޮތުން ނިންމެވި ނިންމެވުމެއް ކަމަށެވެ.