ޓާޓާއިން އަޅާ އިމާރާތެއްގެ މަތިން ދަގަނޑުބުރިއެއް ވެއްޓި މީހަކު ޒަޚަމްވެއްޖެއެވެ.

މި ހާދިސާ ހިނގައިފައިވަނީ ރޯޝަނީ ގޯޅީގައި ޓާޓާ ކޮންސްޓްރަކްޝަން ކުންފުނިން އަޅަމުންދާ އިމާރާތެއްގެ މަތިން ވެއްޓުނު ދަގަނޑުބުރިއެއް މަގުމަތީގައި ހުރި އަންހެނެއްގެ ބޮލުގައި ޖެހިއެވެ.

މިކަމާއި ގުޅިގެން ފުލުހުން ބުނީ ރޯޝަނީ ގޯޅީގައި ހަދަމުން ދިޔަ އިމާރާތެއްގެ މަތިން ދަގަނޑުބުރިއެއް ވެއްޓި އަންހެނަކަށް އަނިޔާވެގެން އުޅޭކަމުގެ ރިޕޯޓް 19:29 ހާއިރު ފުލުހުންނަށް ލިބިފައިވާ ކަމަށެވެ.

Advertisement

އަދި މި ހާދިސާގައި އަނިޔާވި މީހާ އަށް އޭޑީކޭ ހޮސްޕިޓަލުގައި ފަރުވާދެމުންދާ ކަމަށް ވެސް ފުލުހުން ވަނީ ބުނެފައެވެ.

މިކަން ހިނގި މަންޒަރު ދުށްމީހަކު ބުނީ އިސްލާމިކް ބޭންކް ގޯޅިތެރޭ ކުނިނަގަން އުޅުނު ވެމްކޯގެ އަންހެން މުވައްޒަފެއްގެ ބޮލަށް ދަގަނޑުބުރިއެއް ވެއްޓި އަނިޔާވެފައިވާ ކަމަށެެވެ.

އަދި އެ ދަގަނޑުބުރި ވެއްޓުނީ އެ ގޯޅިތެރޭ ޓާޓާ ކޮންސްޓްރަކްޝަން ކުންފުނިން ހަދަމުންދާ އިމާރާތުން ކަމަށާއި އެ ދަގަނޑުބުރި ވެއްޓުމާ އެކު އެ އަންހެންމީހާގެ ބޮލުންނާއި ނޭފަތުން ބައިވަރު ލޭ ފޭބިކަމަށެވެ.

މީގެއިތުރުން އެ ދަގަނޑުބުރި ވެއްޓުނީ ވަރަށް މަތިން ކަމަށް ބެލެވޭކަމަށާއި އެ މީހާގެ ބޮލުގައި ޖެހުމާ އެކު، އޭނާ އެތަނަށް ޚަބަރުހުސްވެގެން ވެއްޓުނު ކަމަށެވެ.

ފުލުހުން ބުނީ މި ހާދިސާއާ ގުޅިގެން ބަލަން ޖެހޭ ކަންކަން ބަލަމުންދާ ކަމަށެވެ.