ކޮންމެ މުސްލިމެއްގެވެސް އެންމެ މުހިއްމު މަޤްސަދަކަށް ވާންޖެހޭނީ މާތް ﷲ ގެ ޝަރީޢަތް ބިންމަތީގައި ޤާއިމްކުރުން ކަމުގައި އިސްލާމީ މަރުކަޒުގެ އިމާމް ޝައިޚް މުހައްމަދު ލަތީފް ވިދާޅުވެއްޖެއެވެ. 

ރައީސް ޑރ މުހައްމަދު މުއިއްޒުގެ ސަރުކާރުން މަރުގެ ހުކުމް ތަންފީޒުކުރުމަށް ނިންމައި އެކަން މި ސަރުކާރުގެ ދަޚިލީ ވަޒީރު އަލީ އިހްސާނު އިއްޔެވަނީ އެ ވުޒާރާއިން ބޭއްވި ނޫސްވެރިންގެ ބައްދަލުވުމުމުގައި އިއުލާނު ކުރައްވައިފައެވެ. 

މިކަމާއި ވިދިގެން ބައެއް ފަރާތްތަކުން އަންނަނީ އެ ނިންމުމަށް ފާޑުކިޔައި ޚިޔާލު ފާޅުކުރަމުންނެވެ. 

Advertisement

މި ދަނޑިވަޅާއި ދިމާކޮށް ޝައިޚް މުހައްމަދު ލަތީފް މިއަދު ކުރެއްވި ޓުވީޓެއްގައި ވިދާޅުވީ  މާތް ﷲ ގެ ޝަރީޢަތް ބިންމަތީގައި ޤާއިމްކުރުމަކީ ކޮންމެ މުސްލިމެއްގެވެސް އެންމެ މުހިއްމު މަޤްސަދުކަމުގައި ހެދުމަށް މާތްﷲ އަމުރުކުރައްވައިފައިވާކަމަށެވެ. 

މީގެ އިތުރުން އެ ޓުވީޓުގައި ވަނީ ޤިޞާޞް ހިފުމަކީވެސް މާތް ﷲ ގެ މަތިވެރި ޝަރީޢަތުގެ ތެރެއިންވާކަމެއް ކަމަށާއި އެކަން ކުރުމަށް ހިތްވަރުދިނުމުގެ ބަދަލުގައި އެކަން ކުރުމަށް ހުރަސްއެޅޭ ގޮތަށް ވާހަކަ ދެއްކުމަކީ މުސްލިމަކު ކޮށްގެންވާނެ ކަމެއްނޫންކަމަށެވެ. 

މި ސަރުކާރުން ޤިޞާސް ހިފުމަށް ނިންމާފައިވާކަން އިއުލާނުކުރުމާއެކު ކުރީގެ ރައީސް އަލްއުސްތާޛް މައުމޫން އަބްދު ޤައްޔޫމްވެސް ވަނީ އެކަމާމެދު ކަންބޮޑުވާކަން ދޭހަވާ މޭރުމަކުން ޓުވީޓު ކުރައްވައިފައެވެ. އެގޮތުން އެ މަނިކުފާނުގެ ޓުވީޓުގައި ވަނީ، މަރުގެ ޙުކުމް ތަންފީޒު ކުރުމަކީ ޤައުމީ ތަރައްޤީގެ އުސް ލަނޑުދަނޑިއެއް ކަމެއް ދެނެވަޑައިނުގަންނަވާކަމުގައެވެ.