ކޯރަމް ހަމަނުވެގެން މިއަދު ބާއްވަން އެޖެންޑާ ކުރި ރައްޔިތުންގެ މަޖިލީހުގެ ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީގެ ބައްދަލުވުން ކެންސަލްކޮށްފިއެވެ.
މި ބައްދަލުވުމަކީ މިނިސްޓަރުންނަށް ރުހުން ދިނުމުގެ މައްސަލައިގައި ކޮމިޓީން ގޮތެއް ނިންމަން މިއަދު ބާއްވަން ހަމަޖެހުނު ބައްދަލުވުމެކެވެ.
ވަޒީރުންގެ ނަންތައް ދިރާސާކުރި މަޖިލީހުގެ ސަރުކާރު މަސްއޫލިއްޔަތު އަދާކުރާ މިންވަރު ބަލާ ކޮމިޓީން މިދިޔަ ހަފްތާގެ އާދިއްތަ ދުވަހު ވަނީ ހުރިހާ ބޭފުޅުންގެ ވެސް ވަޒީރުކަމުގެ ޝަރުތު ހަމަވާ ކަމަށް ނިންމާފައެވެ.
ކޮމިޓީން ފާސް ކުރީ ވަޒީރުނަށް ރުހުން ދިނުމަށް މަޖިލީހުގެ ތަޅުމުގައި ނަގާ ވޯޓުގައި ކޮންމެ ވަޒީރަށް ވަކިވަކިން ވޯޓަށް އެހުމަށެވެ.
މިނިސްޓަރުންނަށް ރުހުން ދޭން މިދިޔަ ހަފްތާގެ ހޯމަ ދުވަހުގެ ޖަލްސާގައި ތާވަލުކޮށްފައިވީ ނަމަވެސް، މިނިސްޓްރީތަކުގެ މެންޑޭޓަށް މި ސަރުކާރުން ގެނައި ބަދަލުތައް ރައީސް އޮފީހުން މަޖިލީހަށް ފޮނުވާފައި ނުވާތީ އާއި ކޮމިޓީ ރިޕޯޓުގައި މަޖިލީހުގެ ޤަވާއިދުގައި ބުނާ ކަންކަން ފުރިހަމަ ނޫން ކަމަށް ބުނެ، ރިޔާސަތުން ވަނީ އެ މައްސަލަ އަނބުރާ ކޮމިޓީއަށް ފޮނުވާލާފަ އެވެ.
އެ މައްސަލަ ކޮމިޓީއަށް އަނބުރާ ފޮނުވާލިތާ ފަސް ދުވަސް ފަހުން ބާއްވަން ހަމަޖެހުނު މިއަދުގެ ކޮމިޓީ ބައްދަލުވުން ކުރިއަށް ގެންދެވިފައެއް ނުވެއެވެ.
މިއަދުގެ ބައްދަލުވުމަށް މުގައްރިރު ހިމެނޭގޮތުން ވަޑައިގެންނެވީ އެންމެ ތިން މެންބަރުންނެވެ.
ކޯރަމް ހަމަވާނީ ކޮމިޓީގައި ތިއްބަވާ 12 މެންބަރުންގެ ތެރެއިން މަދުވެގެން ހަތަރު މެންބަރުން ހާޒިރުވެގެނެވެ.
ވަޒީރުންނަށް ރުހުން ދިނުމުގެ މައްސަލަ ވަކި ކޮޅެއްގައި ނުޖެހި ލަސްވަމުން ދާތީ އެކަމާ މެދު ބައެއް މެންބަރުން ވަނީ ކަންބޮޑުވުން ފާޅުކޮށްފަ އެވެ.
Advertisement
This content is created and paid for by advertisers and does not involve Voice Journalists
