ދޮގާއި ފިތުނަ ފެތުރުން ހުއްޓުވަން ކުރާ މަސައްކަތަކީ ހިޔާލުފާޅު ކުރުމަށް ހުރަސްއެޅުމެއް ނޫންކަމުގައި ރައްޔިތުންގެ މަޖިލީހުގެ ކުރީގެ މެންބަރު އިބްރާހީމް އިސްމާއީލް (އިބްރާ) ވިދާޅުވެއްޖެއެވެ.
ރަޖިސްޓްރީނުކޮށް ހިންގަމުންދިޔަ ދެ ވެބްސައިޓެއް ބަންދުކުރުމާ ގުޅޭގޮތުން އެކްސްގައި އިބްރާ ކުރެއްވި ޕޯސްޓެއްގައި ވިދާޅުވީ، ދޮގު ހަބަރު ފެތުރުމަކީ ގާނޫނު އަސާސީގައި ދީފައި އޮންނަ ހިޔާލުފާޅު ކުރުމުގެ ހައްގު ނޫން ކަމަށެވެ.
މީގެ އިތުރުން އިބްރާ ވިދާޅުވީ ހިޔާލު ފާޅުކުރުމަކީ ކަމަކާމެދު ތިމާ ދެކޭގޮތް ހާމަކުރުން ކަމަށާއި އަދި އެކަންކުރުމުގެ މިނިވަންކަން ކޮންމެ މީހަކަށްމެ، ލިބިގެންވާ ކަމަށެވެ
އެހެން ނަމަވެސް ހަބަރެއް ފަތުރާނަމަ، އެކަމެއްގެ ތެދު ދޮގު ކަށަވަރު ކުރަންޖެހޭނެ ކަމަށާއި އަދި ދޮގު ހަބަރު ފަތުރާ، ފިތުނަ އުފެއްދުމަކީ ކުށެއް ކަމަށް ވެސް އިބްރާ ވަނީ ވިދާޅުވެފައެވެ.
އެހެން މީހަކު ނުވަތަ ބަޔަކު ވަކި ކަމެއް ކުރިކަމަށް ނުވަތަ ނުކޮށް ދޫކޮށްލިކަމަށް ބުނުމަކީ ހިޔާލު ފާޅުކުރުމެއް ނޫނެވެ. އެއީ ހަބަރު ފެތުރުމެވެ. އެފަދަކަމެއްގެ ވާހަކަ ބުނާނަމަ، އެކަމެއްގެ ތެދު ދޮގު ކަށަވަރު ކުރުމާއި، އެވާހަކައެއް ބުނާ މީހާއާމެދު ދައުވާއެއް އުފުލިއްޖެ ނަމަ، ތިމާ ބުނީ ތެދެއްކަން ސާބިތުކޮށްދިނުމަކީ ބުނާ މީހާގެ މައްޗަށް އޮންނަކަމެކެވެ.
އިބްރާހީމް އިސްމާއީލް (އިބްރާ)
ހިޔާލެއް ފާޅުކޮށްގެން ދައުވާއެއް ނުއުފުލޭނެކަން ހަނދާންކޮށްދެއްވާ އިބްރާ ވިދާޅުވީ އެހެން އެކަން އޮތް ނަމަވެސް ދޮގުވާހަކަ ފަތުރާނަމަ ދައުވާއަށް ޖަވާބުދޭންޖެހޭނެ ކަމަށެވެ. އަދި އެންމެން ވެސް މި ތަފާތު ދަސްކުރަންވެއްޖެ ކަމަށް ވިދާޅުވިއެވެ.
ރަޖިސްޓްރީނުކޮށް ހިންގަމުންދިޔަ ދެ ވެބްސައިޓެއް ބަންދުކުރުމުން ގިނަ ބަޔަކު އަންނަނީ އެކަމަށް ފާޑުކިޔަމުންނެވެ.
މިމައްސަލައާ ގުޅުވައިގެން ރައީސް އޮފީހުގެ ޗީފް ސްޕޯކްސްޕާސަން މުހައްމަދު ޝަހީބު ވިދާޅުވެފައިވަނީ ގާނޫނާއި ގަވާއިދުތަކުގެ ދަށުން ރާއްޖޭގައި ރަޖިސްޓްރީކޮށްގެން ހިންގާ އެއްވެސް ނޫސް މަޖައްލާއެއް ސަރުކާރުން ބަންދުކޮށް ނުވަތަ ބްލޮކްނުކުރާނެ ކަމަށެވެ. މީގެ އިތުރުން ނޫސްވެރިކަމުގެ މިނިވަންކަން އޭގެ އެންމެ ފުޅާމިނުގައި ދެމެހެއްޓުން މި ސަރުކާރުން ކަށަވަރުކުރާނެކަމަށް ވެސް ޝަހީބު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
