ފަލަސްތީނުގެ ޣައްޒާ އަށް އިންސާނީ އެހީ ފޯރުކޮށްދިނުމަށް ގޮވާލައި އދ. ގެ ސެކިއުރިޓީ ކައުންސިލުން ގަރާރެއް ފާސްކޮށްފިއެވެ.
މުސްލިމް ގިނަ ގައުމުތަކެއްގެ ބައިވެރިވުމާ އެކު، ޔުނައިޓެޑް އަރަބް އެމިރޭޓްސް (ޔޫއޭއީ) އިން އދ. ގެ ސެކިއުރިޓީ ކައުންސިލަށް ހުށަހެޅި ގަރާރު ފާސްކޮށްފައި ވަނީ 13 ގައުމެއްގެ ވޯޓާ އެކުގައެވެ.
މި ގަރާރު ފާސްކުރަން ވޯޓު ދޭނެކަމަށް އެމެރިކާ އިން ކުރި ބުނި ނަމަވެސް ވޯޓަށް އެހުމުން އެ ގައުމުން ވަކި ކޮޅަކަށް ވޯޓު ދީފައެއް ނުވެއެވެ. އެމެރިކާގެ އިތުރުން ރަޝިޔާއިން ވެސް ވަކި ކޮޅަކަށް ވޯޓު ދީފައެއް ނުވެއެވެ.
މި ގަރާރާއި ދެކޮޅަށް އެއްވެސް ގައުމަކުން ވޯޓު ދީފައެއް ނުވެއެވެ.
އެ ގަރާރުގައި ވަނީ ބައިނަލްއަގްވާމީ އިންސާނީ ގާނޫނުތަކުގެ ދަށުން ޣައްޒާގެ އާންމުންނާއި މަދަނީ ތަކެތި ހިމާޔަތްކުރުމާއި އިންސާނީ އެހީތެރިކަން ފޯރުކޮށްދިނުމާއި އިންސާނީ އެހީތެރިކަން ފޯރުކޮށްދިނުން ކަށަވަރު ކޮށްދިނުމުގެ މައްޗަށް އަލި އަޅުވާލާފައެވެ.
އދ. ގެ ސެކިއުރިޓީ ކައުންސިލުން މި ގަރާރު ފާސްކުރުމަށް ފަހު އެދުނީ މުޅި ފަލަސްތީނުގެ ޣައްޒާގެ އާބާދީއަށް އިންސާނީ އެހީތެރިކަން ރައްކާތެރި އަދި ހުރަހެއް ނެތި ވަގުތުން، ފޯރުކޮށްދިނުމަށް ފުރުސަތު ދިނުމާއި މަގުފަހިކޮށްދިނުމަށެވެ.
އަދި ފަލަސްތީނުގައި ތިބި ރައްޔިތުންނަށް ރައްކާތެރިކަމާ އެކު އެ ފަރާތްތަކަށް ބޭނުންވާ އިންސާނީ އެހީ ފޯރުކޮށްދޭތޯ ކަށަވަރުކުރުމަށް ސަލާމަތީ މަޖިލީހުން މިއަދު ވަނީ ޣައްޒާއަށް ސީނިއާ ހިއުމަނިޓޭރިއަން އެންޑް ރިކޮންސްޓްރަކްޝަން ކޯޑިނޭޓަރަކު އައްޔަންކުރުމަށް އެދިފަ އެވެ.
އަދި ކަމާބެހޭ ހުރިހާ ފަރާތްތަކާ މަޝްވަރާކުރުމަށްފަހު ޣައްޒާއަށް އިންސާނީ އެހީތެރިކަން ފޯރުކޮށްދިނުން އަވަސްކުރުމަށް ވެސް މި ގަރާރުގައު ވަނީ ގޮވާލާފައެވެ.
Advertisement
This content is created and paid for by advertisers and does not involve Voice Journalists
