މަސްވެރިކަމުގެ ސިނާއަތުގައި ހުރި މައްސަަލަތައް ހައްލުކުރުމަށްޓަކައި މަސްވެރިކަމާ ބެހޭ ވަޒީރު އަޙްމަދު ޝިޔާމް ކުރައްވަމުންގެންދަވާ މަސައްކަތްޕުޅުތަކަށް ރާއްޖޭގެ ނަން މަޝްހޫރު 'ޒުވާން މަސްވެރިޔާ' ޙަސަން ޝާޖިން ތައުރީފުކޮށްފިއެވެ.
މީސްމީޑިއާގައި ކުރި ޕޯސްޓެއްގައި ޝާޖިން ބުނެފައިވަނީ، މަސްވެރިކަމާއި ބެހޭ ވަޒީރު ޝިޔާމް މަގާމާ ހަވާލުވެވަޑައިގެންނެވިތާ ކުޑަދުވަސްކޮޅެއްގެ ތެރޭގައި މަސްވެރިންގެ ގާތަށް ދަތުރުކުރައްވައި ސީދާ މަސްވެރިންނާއި ބައްދަލުކުރައްވައި ކަންބޮޑުވުންތައް އަޑުއެއްސެވުމުން ހާމަވަނީ މަސްވެރިކަމުގައި ދިމާވެފައިވާ ގޮންޖެހުންތައް ހައްލުކޮށްދެއްވުމަށް އިސްކަންދެއްވާ މިންވަރު ކަމަށެވެ.
އަދި މި މަސައްކަތަކީ ފިނިކޮޓަރީ އިނދެ ކުރާ ފޯނުކޯލަކުން ހާލަތު ބަލައިގެން އަސްލު މަންޒަރު ސިފަނުވާނެ މަސައްކަތެއްކަން ވަޒީރު ގަބޫލުފުޅު ކުރައްވާކަމުގެ ހެތްކެއްކަމަށް ވެސް ޝާޖިންގެ ޕޯސްޓްގައިވަނީ ބުނެފައެވެ.
ރައްޔިތުންގެ ހާލަތު ބެއްލެވުމަށް ހަފުތާ ބަންދުގައި ސަރުކާރުގެ ވަފުދުތަކުން ރާއްޖޭގެ އެކި ކަންކޮޅުތަކަށް ކުރައްވާ ޒިޔާރަތުގެ ތެރެއިން ވަޒީރު ޝިޔާމް މި ހަފުތާ ބަންދުގައި ވަޑައިގެންނެވީ ހުވަދުއަތޮޅަށެވެ.
އެގޮތުން ވަޒީރު ވަނީ އެ އަތޮޅުގެ ގިނަ ރަށްރަށުގެ މަސްވެރިންގެ ކަންބޮޑުވުންތައް އަޑުއައްސަވައި އެކަންކަން ހައްލުކޮށްދެއްވާނެ ކަމުގެ ޔަގީންކަން ދެއްވައިފައެވެ.
މީގެ އިތުރުން ވަޒީރުކަމާއި ހަވާލުވެވަޑައިގެންނެވިތާ ކުޑަދުވަސްކޮޅެއްގެ ތެރޭގައި މަސްވެރިއެއްގެ ކަންބޮޑުވުން އައްސަވައި ސީދާ ވަޒީރު އެ މަސްވެރިޔާއާއި ގުޅުއްވައިގެން ވަނީ އޭނާގެ ކަންބޮޑުވުންތައް އަޑުއައްސަވާފައެވެ.
Advertisement
This content is created and paid for by advertisers and does not involve Voice Journalists
