ވަޒީރުންނަށް ރުހުންދިނުމަކީ އިދިކޮޅުން މަޖިލީހުގެ ދައުރު ދިގުދަންމަން ބޭނުންކުރާ ވަސީލަތަކަށް ހެދުމަކީ ލަދުވެތި ކަމެއް ކަމަށް ކުރީގެ ޕްރޮސިކިޔުޓަރ ޖެނެރަލް މުހްތާޒް މުޙްސިން ވިދާޅުވެއްޖެއެވެ.

މުޙްތާޒް މިހެން ވިދާޅުވީ އޭނާ މިއަދު އެކްސްގައި ކުރެއްވު ޕޯސްޓެއްގައެވެ.

މުޙްތާޒް މިހެން ވިދާޅުވެފައިވަނީ ރައްޔިތުންގެ މަޖިލީހުގެ މެޖޯރިޓީ އޮތް އެމްޑީޕީ އިން ރައީސް ޑރ މުޙައްމަދު މުޢިއްޒުގެ ކެބިނެޓްގެ ބައެެއް މިނިސްޓަރުންނަށް ރުހުން ނުދޭނެ ކަމަށް ބުނަމުންގެންދާތީއެވެ. 

އަދި މިއަދުވެސް ވަޒީރުންނަށް ރުހުން ދިނުމުގެ މައްސަލައާ ގުޅޭގޮތުން ރައްޔިތުންގެ މަޖިލީހުގެ ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީގެ ބައްދަލުވުން ކޯރަމް ހަމަނުވުމުގެ ސަބަބުން ކެންސަލްވެފައި ވާތީއެވެ.

މުޙްތާޒް ވިދާޅުވީ ވަޒީރުންގެ ރުހުމަކީ އިދިކޮޅުން މަޖިލީހުގެ ދައުރު ދިގުދަންމަން ބޭނުންކުރާ ވަސީލަތަކަށް ހެދުމަކީ ލަދުވެތި އަދި އެހާމެ ފިނޑި ޢަމަލެއް ކަމަށެވެ.

“ލައްޒަތުގެ ކޯރުން ފެން ބުއި ޒަމާން މާޒީވެ ހިނގައްޖެ، ދަރުބޮނޑި އައްސާފައި އޮތް ވަކަގަނޑު މިހާރު އެއޮތީ ފީވެފަ، ބައިކޮށްލަން އެހާމެ ފަސޭހަވާނެ” މުހްތާޒް ވިދާޅުވެފައިވެއެވެ.

19 ވަނަ މަޖިލިސްގެ ދައުރު ތިންްވަނަ ފަހަރަށް ވަނީ މިމަހުގެ 28 ވަނަ ދުވަހާއި ހަމައަށް ދިގު ދަންމައިލައިފައެވެ. އެންމެ ފުރަތަމަ ދައުރު ދަންމާލީ، މިމަހު 7 ވަނަ ދުވަހާއި ހަމައަށެވެ.

އެފަހަރު ދައުރު ދަންމާލީ ބަޖެޓުގެ މަސައްކަތް ހިމެނޭހެން މުހިއްމު ގިނަ މައްސަލަތަކެއް ހުރީތީއެވެ. އޭގެފަހުން އަނެއްކާވެސް ދެވަނަ ފަހަރަށް ދައުރު ދަންމާލީ މިމަހުގެ 18 ވަނަ ދުވަހާއި ހަމައަށެވެ.

މަޖިލީހުގެ މި ދައުރު ދަންމާލަން ފާސްކޮށްފައިވާއިރު، މަޖިލިހުގެ ކުރީގެ ރައީސް މުހައްމަދު ނަޝީދާއި ކުރީގެ ނާއިބު ރައީސް އީވާ އަބްދުاللهގެ އިތުބާރު ނެތްކަމުގެ މައްސަލާގައި މަޖިލީހުގެ މަސައްކަތެއް ނުކުރެވި ގިނަ ދުވަސްތަކެއް ބޭކާރުވެގެން ގޮސްފައިވެއެވެ.