އަންނަ އަހަރުގެ ކުރީކޮޅު ބޭއްވުމަށް ތައްޔާރުވަމުން އަންނަ 20 ވަނަ ރައްޔިތުންގެ މަޖިލީހުގައި އެމްޑީޕީ ޓިކެޓުގައި ވާދަކުރަން ބޭނުންވާ އެ ޕާޓީގެ މެންބަރުންނަށް ޝައުގުވެރިކަން ފާޅުކުރުމަށް ހުޅުވާލި މުއްދަތު އިތުރުކޮށްފިއެވެ.

މިކަން ހާމަކޮށް އެ ޕާޓީން މިއަދު ކުރި އިއުުލާނެއްގައި ބުނީ، އެމްޑީޕީގެ ޓިކެޓުގައި ވާދަކުރަން ބޭނުންވާ މެންބަރުންނަށް ޝައުގުވެރިކަންފާޅުކުރުމަށް 16 ޑިސެމްބަރުގައި ހުޅުވާލި މުއްދަތު 30 ޑިސެމްބަރ 2023 ވާ ހޮނިހިރު ދުވަހުގެ ހަވީރު 04:00 ގެ ނިޔަލަށް އިތުރުކުރެވިފައިވާ ކަމަށެވެ.

އެ ޕާޓީގެ ފަރާތުން ރައްޔިތުންގެ މަޖިލިހުގައި ވާދަކުރުމަށް އެދޭ ފަރާތްތަކުގެ ކިބައިގައި ހުރުން ލާޒިމްކުރާ ޝަރުތުތަކެއްގެ ގޮތުގައި އެ ޕާޓީން ކަނޑައަޅައިފައިވަނީ އެމްޑީޕީގެ މެންބަރެއް ކަމުގައިވުމާއެކު ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީގެ 73 ވަނަ މާއްދާ އާއި ރައްޔިތުންގެ މަޖިލީހުގެ އިންތިހާބުގެ ގާނޫނުގެ 8 ވަނަ މާއްދާގައިވާ ގޮތުގެމަތިން ރައްޔިތުންގެ މަޖިލީހުގެ އިންތިހާބަށް ކުރިމަތިލާ މީހެއްގައި ހުންނަންޖެހޭކަމަށް ބަޔާންކުރާ އެންމެހާ ޝަރުތުތައް ފުރިހަމަވުމެވެ. 

Advertisement

މީގެ އިތުރުން އެ އިއުލާނުގައިވަނީ އެ ޕާޓީގެ ފަރާތުން ކުރިމަތިލުމަށް ޝައުގުވެރިވާ ފަރާތްތަކުން، ގޫގްލް ފޯމު މެދުވެރިކޮށް ޝައުގުވެރިކަން ފާޅުކުރުމަށް އެދިފައެވެ.

އަދި ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަންގެ ކުށާއި ދަރަނީގެ ރިކޯޑު ސާފުކުރާ ފޯމް އެއިދާރާއިން ސާފުކޮށް ފުރިހަމަކޮށް، ފޯމާ އެކު ހުށައެޅުމަށް ވެސް ވަނީ އެދިފައެވެ. 

ޕްރައިމަރީ ބާއްވަންޖެހޭ ދާއިރާތަކަށް ޕްރައިމަރީ އޮންނާނީ އަންނަ ޖެނުއަރީ މަހުގެ 26 އަދި 27 ވަނަ ދުވަހު ކަމަށް އެ ޕާޓީން ބުނެއެވެ.