އަމީނީމަގުގެ އެންމެ ފަހު ފިޔަވަހީގެ މަސައްކަތަށް ކުރިއަށްގެންދަނީ ބަސް ދުއްވުމަށް ލުއިފަސޭހަވާނެހެން މަގު ފުޅާކުރެވިގެން ކަމުގައި އިމާރާތްކުރުމާއި ބެހޭ ވަޒީރު އަބްދުﷲ މުއްޠަލިބް ވިދާޅުވެއްޖެއެވެ.
މިނިސްޓަރު މުއްޠަލިބް މިފަދައިން ވިދާޅުވީ އަމީނީ މަގުގެ މަސައްކަތް ކުރިއަށްދާ ސަރަހައްދަށް ޒިޔާރަތްކުރައްވައި މަގުގެ މަސައްކަތް ކުރިއަށްދާ ގޮތް ބައްލަވާލެއްވުމަށް ފަހު މިއަދު އެކްސްގައި ކުރެއްވި ޕޯސްޓެއްގައެވެ.
އަދި ވިދާޅުވީ، އަމީނީ މަގުގައި މިހާރު ހަދަމުންދާ ބަޔަކީ ބޮޑެތި ބަސްތަައް ދަތުރުކުރާ ބަޔަކަށް ވުމުން، މަގުގެ އެ ބައި ހެދިގެން ދާނީ ފުޅާކޮށް ކަމުގައެވެ.
މީގެ އިތުރުން އަމާޒަކީ އެ މަގުގެ މަސައްކަތް ދިރާސީ އަހަރުގެ ދެވަނަ ޓާމުގެ ކިޔެވުން ފެށުމުގެ ކުރިން ނިންމުންކަމުގައި ވެސް މިނިސްޓަރު ވިދާޅުވިއެވެ.
އަމީނީ މަގުގެ ފިޔަވަހީގެ މަސައްކަތް މި މަހުގެ ކުރީކޮޅު ފެށިއިރު، މީގެ ކުރިން ކުރިޔަށްގެންދިޔަ ސެގްމެންޓުތަކުގެ ދަށުން ޕްރޮޖެކްޓު ކުރިޔަށް ގެންދެވިފައި ވަނީ އިއްޒުއްދީން މަގާއި ހަމައަށެވެ.
އޭގެ ފަހުން ގިނަ ދުވަސްތަކެއް ވަންދެން މަސައްކަތް މަޑުޖެހިފައި އޮތުމަށް ފަހު، މަސައްކަތް ފެށިއިރު އާރުޑީސީން ބުނީ އަމާޒަކީ 50 ދުވަހުގެ ތެރޭގައި މަސައްކަތް ނިންމާލުން ކަމަށެވެ.
މި މަޝްރޫއުގެ ދަށުން މިހާރު ކުރިޔަށްދަނީ ފެންހިންދާ ނިޒާމަށް ބޭނުންވާ ޓޭންކުތަކާއި ހޮޅީގެ ވިއުގަ އެޅުމިގެ މަސައްކަތުގެ އިތުރުން ނަރުދަމާގެ މަސައްކަތް ކަމުގައި އާރްޑީސީން ބުނެއެވެ.
މިއާއެކު އެމްޑަބްލިއުއެސްސީގެ ފެންހޮޅި ޓެސްޓު ކުރުމާއި ގުޅޭ މަސައްކަތްތައް ވެސް ކުރިޔަށްދާކަމަށް އާރުޑީސީން މައުލޫމާތު ދިނެވެ.
Advertisement
This content is created and paid for by advertisers and does not involve Voice Journalists
