ކުޑަ ކުދިންގެ މެދުގައި މަގުބޫލު ކާޓޫން ސީރީސް އަކުން އަނެއްކާވެސް އެއްޖިންސުން ގުޅުން ހިންގުމާއި ފިރިހެނުން އަންހެނުންނަށް ވުން ޕްރޮމޯޓް ކޮށްފި އެވެ. 

މިފަހަރު އެއްޖިންސުން ގުޅުން ހިންގުމާއި، ފިރިހެނުން އަންހެނުންނަށް ވުން ޕްރޮމޯޓް ކޮށްފައި ވަނީ، އެންމެ ތުއްތު ކުދިންނާއި، އުމުރުން ގާތްގަނޑަކަށް 8 އަހަރަށްދާ ކުދިންގެ މެދުގައިވެސް މަގުބޫލު ކާޓޫން، ރައިމްސް/ލަވަ ސީރީސް އެއް ކަމަށް "ކޮކޯމެލަން ލޭން" ސީރީސްގެ ލަވަ އަކުންނެވެ. 

ނެޓްފްލިކްސް އިން ދައްކާ މި ސިރީސްގެ އެއްޖިންސުން ގުޅުން ހިންގުން ޕްރޮމޯޓް ކުރި ލަވައިގައި، ދައްކަނީ ދެ "ބައްޕަ" އިން ދަރި އަކު ބަލާ ތަނެވެ. އަދި އެމީހުން ގެންގުޅޭ ފިރިހެން ތުއްތު ކުއްޖެއްގެ އަންހެން ހެދުމެއް ލައްވައި، އެކަން އެގޮތަށް ކުރުމަކީ މައްސަލައެއް ނޫން ކަމަށް ވެސް ލަވައިގެ ތެރެއިން ބުނެދެއެވެ. 

Advertisement

ތުއްތު ކުދިންގެ ސިކުނޑި ތަކަށް މިފަދަ އިންސާނީ ތަބީޢަތާއި ނުގުޅޭ، ކަންކަން، އެކުދިންނަށް އެންމެ ކަމުދާ ކާޓޫންތައް މެދުވެރިކޮށް ވެއްދުމުގެ މަސައްކަތް ހުޅަނގުން ކުރަމުންދާތީ ޣައިރު މުސްލިމުންގެ ނުރުހުންވެސް ވަނީ އެ ސީރީޒް އުފައްދާ މީހުންނަށް އަމާޒުވެފައެވެ. 

އަދި އިސްލާމް ދީނުގައި ކަނޑައެޅިގެން ހަރާމް، މަނާ ކުރެވިފައިވާ ކަންކަން މިފަދަ ގޮތް ގޮތަށް ޕްރޮމޯޓް ކުރަމުންދާތީ ބޭރުގެ އާއި ރާއްޖޭގެވެސް ބައެއް ޢިލްމުވެރިން ވަނީ އެކަން ކަމަށް ސަމާލުވެ، ކުދިންނައް ޓީވީންނާއި އިންޓަނެޓްގެ ޒަރީޢާއިން ކުދިންނަށް އެއްޗެހި ދެއްކުމުގައި އިތުރަށް ބެލުމަށް އިލްތިމާސް ކުރައްވާފައެވެ. 

މީގެ ކުރިންވެސް ކުޑަ ކުދިންނާއި ފުރާވަރުގެ ކުދިންގެ މެދުގައިވެސް މަޝްހޫރު، ޑިސްނީގެ އެނިމޭޓެޑް ބައެއް ކާޓޫނުން ފިލްމު އެއްޖިންސުން ގުޅުން ހިންގުން ޕްރޮމޯޓް ކޮށްގެން އެ ފިލްމުތައް ދެއްކުން ބައެއް މުސްލިމް ގައުމުތަކުން މަނާވެސް ކޮށްފައި ވެއެވެ.