ރ.އަތޮޅު ފުޓްސަލް ޗެލެންޖު 2023 ގައި މިއަދު ހަވީރު ކުޅެވުނު ގުރޫޕް އޭގެ އަލިފުށީ ރެކްރިއޭޝަން ކުލަބު އަދި އިނގުރައިދޫ ވާދަކުރި މެޗު 4-3 ގެ ނަތީޖާއަކުން ކާމިޔާބުކޮށް ގުރޫޕް އޭގެ އެއްވަނަ އިނގުރައިދޫ އިން ހޯދައިފި އެވެ.

މުބާރާތުގައި އިނގުރައިދޫ އިން ކުޅުނު ފުރަތަަމަ މެޗުގައި 2-1 ގެ ނަތީޖާއަކުން މަޑުއްވަރީ އަތުން މޮޅުވިއިރު، ދެވަނަ މެޗުގައި އިންނަމާދޫ އަތުން އެޓީމު މޮޅުވީ 4-1 ގެ ނަތީޖާއަކުންނެވެ. އަދި އަލިފުށީ ރެކްރިއޭޝަން ކުލަބުން މުބާރާތުގައި ކުޅުނު ފުރަތަަމަ މެޗުގައި 2-1 ގެ ނަތީޖާއަކުން އިންނަމާދޫ އަތުން މޮޅުވިއިރު، ދެވަނަ މެޗުގައި މަޑުއްވަރީ އަތުން ވެސް އެޓީމު މޮޅުވެފައިވަނީ 2-1 ގެ ނަތީޖާއަކުންނެވެ.

އަލިފުށީ ރެކްރިއޭޝަން ކުލަބާއި އިނގުރައިދޫ ވާދަކުރި މެޗުގެ ތެރެއިިން 

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ފުރަތަަމަ ލަނޑުޖަހައި ކުރިހޯދީ އިނގުރައިދޫ ޓީމުންނެވެ. މިލަނޑު ފުރަތަމަ ހާފުގެ 15 ވަނަ މިނެޓުގައި ކާމިޔާބުކޮށްދިނީ އެޓީމުގެ މަމްދޫހް އެވެ. މިއީ އެޓީމުގެ ކެޕްޓަން އައިހަމް ތަނަވަސްކޮށްދިން ފުރުސަތެއްގައި އަލިފުށީ ޕެނަލްޓީ އޭރިއާ ބޭރުން ތިރިތިރިން ފޮނުވާލި ބާރު ހަމަލާއެއް ގޯލުގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ.

އަލިފުށީ ރެކްރިއޭޝަން ކުލަބާއި އިނގުރައިދޫ ވާދަކުރި މެޗުގެ ތެރެއިިން 

ނަމަވެސް ޖެހިގެން އައި މިނެޓުގައި އަލިފުށިން ވަނީ ލަނޑެއް ކާމިޔާބުކޮށް މެޗުގެ ނަތީޖާ އެއްވަރުކޮށްފައެވެ. މިލަނޑު އެޓީމަށް ކާމިޔާބުކޮށްދިނީ ރަޒާން އަލީ އެވެ. މިއީ އެޓީމުގެ ކެޕްޓަން ސަމީން އިލްޔާސް ތަނަވަސްކޮށްދިން ފުރުސަތެއްގައި އިނގުރައިދޫގެ ޕެނަލްޓީ އޭރިއާ ބޭރުން ތިރިތިރިން ފޮނުވާލި ބޯޅަ ގޯލުގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ. މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 1-1 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

އަލިފުށީ ރެކްރިއޭޝަން ކުލަބާއި އިނގުރައިދޫ ވާދަކުރި މެޗުގެ ތެރެއިިން 

މެޗުގެ ދެވަަނަ ހާފު ވަރުގަދަކޮށް ފެށީ އިނގުރައިދޫ ޓީމުންނެވެ. އެގޮތުން ދެވަނަ ހާފު ފެށިގެން ދެވަނަ މިނެޓުގައި އިނގުރައިދޫ ޓީމުން ވަނީ ލަނޑެއް ކާމިޔާބުކޮށް ދެވަނަ ފަހަރަށް މެޗުގެ ލީޑު ހޯދާފައެވެ. މިލަނޑު އެޓީމަށް ކާމިޔާބުކޮށްދިނީ އެޓީމުގެ ފުރަތަަމަ ލަނޑު ވެސް ކާމިޔާބުކޮށްދިން މަމްދޫހް އެވެ. އަދި މިއީ ވެސް އެޓީމުގެ އައިހަމް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މިމެޗުގައި އިނގުރައިދޫ ޓީމުން ކާމިޔާބުކުރި ތިންވަނަ ލަނޑު ދެވަނަ ހާފުގެ 27 ވަނަ މިނެޓުގައި ކާމިޔާބުކޮށްދިނީ އެޓީމުގެ ކެޕްޓަން އައިހަމް އެވެ. މިއީ އެޓީމުގެ މަމްދޫހް ތަނަވަސްކޮށްދިން ފުރުސަތެއްގައި ކައިރީގައި ހުރި ކުޅުންތެރިއާ ކައިރިން ނައްޓާލުމަށް ފަހު ފޮނުވާލި ބާރު ހަމަލާ ގޯލްގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ. އަދި ފަހުހާފުގެ 38 ވަނަ މިނެޓުގައި އެޓީމުގެ މަމްދޫހް ވަނީ އިތުރު ލަނޑެއް ކާމިޔާބުކޮށް މިމެޗުގައި އޭނާގެ ހެޓްރިކް ފުރިހަމަކޮށްފައެވެ.

ނަމަވެސް އޭގެ ދެމިނެޓު ފަހުން އަލިފުށީ ޓީމުގެ އިބްރާހިމް ސިނާހް އެޓީމުގެ ދެވަނަ ލަނޑު ކާމިޔާބުކުރި އިރު މެޗުގެ އިތުރު ވަގުތުގެ ތެރޭގައި ރަޒާން ވަނީ އިތުރު ލަނޑެއް ކާމިޔާބުކޮށް އެޓީމަށް ނަތީޖާގެ ފަރަގު ކުޑަކޮށްދީފައެވެ. މިލަނޑާއެކު މެޗުގެ ކުޅުން ނިމިގެންދިޔައީ 4-3 ގެ ނަތީޖާއަކުން އިނގުރައިދޫ ކުރީގައި އޮވެގެންނެވެ. އަދި މިމެޗުގެ މޭން އޮފް ދަ މެޗަކަށް އިނގުރައިދޫ ޓީމުގެ މުހައްމަދު މަމްދޫހް އެވެ. 

މިމެޗުން ލިބުނު ތިން ޕޮއިންޓާއެކު ކުޅުނު ތިން މެޗުން ވެސް މޮޅުވެ 9 ޕޮއިންޓާއެކު ގުރޫޕްގެ އެއްވަނަ ޓީމުގެ ގޮތުގައި އިނގުރައިދޫ ޓީމުން މުބާރާތުގެ ސެމީ ފައިނަލުން ޖާގަ ހޯދިއިރު، މިމެޗުން ބަލިވި އަލިފުށީ ރެކްރިއޭޝަން ކުލަބު ކުޅުނު ތިން މެޗުން ލިބުނު 6 ޕޮއިންޓާއެކު ގްރޫޕުގެ ދެވަނަ ޓީމުގެ ގޮތުގައި އެޓީމަށް ވެސް ވަނީ ސެމީގެ ފުރުސަތު ލިބިފައެވެ.